ଭଣ୍ଡାରିପୋଖରୀ, ୨୨ା୧୨(ଡି.ଏନ୍.ଏ.)-ଭଦ୍ରକ ଜିଲା ଭଣ୍ଡାରିପୋଖରୀ ତହସିଲ ଅଧୀନ ବୈତରଣୀ ନଦୀର ବିଭିନ୍ନ ଘାଟରୁ ଚୋରାରେ ବାଲି ପରିବହନ ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହି ବାଲିଚୋରିକୁ ରୋକିବା ପାଇଁ ତହସିଲ ପକ୍ଷରୁ ଏକ ସ୍କ୍ବାଡ ଗଠନ କରାଯାଇ ବିଭିନ୍ନ ଘାଟରେ ଚଢ଼ାଉ କରାଯାଉଛି। ବାଲି ମାଫିଆମାନେ ଆଗୁଆ ସୁରାକ ପାଇ ଘାଟରୁ ଗାଡ଼ି ଉଠାଇ ଫେରାର ହେଉଯାଉଥିବାରୁ ସ୍କ୍ବାଡକୁ ଖାଲି ହାତରେ ଫେରିବା ସାର ହେଉଛି। ତେବେ ଶନିବାର ତହସିଲ ପକ୍ଷରୁ ଏକ ସ୍କ୍ବାଡ ବୈତରଣୀ ନଦୀର ବାଲିପୋଖରୀ ପଞ୍ଚାୟତର କୁମ୍ଭାରିଆଠାରେ ଦୁଇଟି ଘାଟ ଓ ବାଲିପୋଖରୀ ଏସ୍କେପ୍ଠାରେ ଦୁଇଟି ସ୍ଥାନ ସମେତ ଅନ୍ୟ ଏକ ସ୍ଥାନରେ ନଦୀ ଭିତରକୁ ଗାଡ଼ି ଯାଇ ବାଲି ଯେମିତି ଆଣି ନ ପାରିବ ସେଥିଲାଗି ଜେସିବି ସାହାଯ୍ୟରେ ୭ ଫୁଟ ଗଭୀର ଓ ୨୫ ରୁ ୩୦ ଫୁଟ ଲମ୍ବର ନାଳ ଖୋଳିିଛନ୍ତି। ବାଲି ଚୋରି ରୋକିବା ସକାଶେ ତହସିଲ ସ୍କ୍ବାଡକୁ ସହଯୋଗ କରିବା ଲାଗି ଥାନାରୁ ଆସିଥିବା ଏକ ଟିମ୍ ରବିବାର ସକାଳେ ସ୍ଥାନୀୟ ଅତିରିକ୍ତ ତହସିଲଦାର ଶରତ କୁମାର ସ୍ବାଇଁ, ସୁପରଭାଇଜର ରବୀନ୍ଦ୍ର କୁମାର ଜେନାଙ୍କ ଉପସ୍ଥିତିରେ ତହସିଲର ବନ୍ଦାଳୋ, ମଢିଆଳୀ, ଝୁଟଣା ଆଦି ସ୍ଥାନରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ କେହି ଧରାପଡ଼ି ନ ଥିଲେ। ତେବେ ସେମାନେ ଫେରିବା ସମୟରେ ୧୬ ନଂ ଜାତୀୟ ରାଜପଥର ଭାଗଡ଼ା ନିକଟରୁ ଏକ ବାଲି ବୋଝେଇ ହାଇୱା ଟ୍ରକ ଭଦ୍ରକ ଆଡ଼କୁ ଯାଉଥିବା ଦେଖି ଅଟକାଇଥିଲେ। ଚାଳକ ୱାଇ ଫର୍ମ ପୂରଣ ହୋଇଥିବା ଦେଖାଇବା ସତ୍ତ୍ୱେ ଦସ୍ତଖତ ନ ଥିବାରୁ ହାଇୱାଟିକୁ ଜବତ କରି ଭଣ୍ଡାରିପୋଖରୀ ଥାନାରେ ରଖାଯାଇଛି। ରବିବାର ଥିବାରୁ ଜରିମାନା ଆଦାୟ ହୋଇନାହିଁ। ଏହି ତହସିଲର ମଣିନାଥପୁର, ମୁଢ଼ାପଦା ଅଞ୍ଚଳରୁ ରାତିରେ ବେଆଇନ ଭାବେ ବାଲି ଚାଲାଣ ହେଉଥିବାରୁ ଏହାକୁ ରୋକିବା ପାଇଁ ଅତିରିକ୍ତ ତହସିଲଦାର ଶରତ କୁମାର ସ୍ବାଇଁ ରାତିରେ ସ୍କ୍ବାଡ ନେଇ ବିଭିନ୍ନ ଘାଟରେ ଚଢ଼ାଉ କରିବେ ବୋଲି ସୂଚନା ମିଳିଛିି।
