ବାଲିଆପାଳ, ୨୧।୬(ଡି.ଏନ.ଏ.)-ବାଲେଶ୍ୱର ଜିଲା ବାଲିଆପାଳ ଅଞ୍ଚଳର ପନିପରିବା ଚାଷୀ ପ୍ରାକୃତିକ ବିପର୍ଯ୍ୟୟ, ଅଭାବୀ ବିକ୍ରି ଓ ଶୀତଳଭଣ୍ଡାର ଅଭାବ ଆଦି କାରଣରୁ କ୍ରମେ ଚାଷ ଛାଡିବାକୁ ବସିଲେଣି। ଫନୀ ବାତ୍ୟାରେ ପନିପରିବା ଫସଲ କ୍ଷତିଗ୍ରସ୍ତ ହେବାରୁ ଏବେ ବେପାରୀମାନେ ପଶ୍ଚିମବଙ୍ଗରୁ ପରିବା ଆଣି ବିକ୍ରି କରୁଛନ୍ତି। ଏହି ବ୍ଲକ ଅନ୍ତର୍ଗତ ସିମୁଳିଆ, କାଳିପଦା ଓ ଲଙ୍ଗଳେଶ୍ୱର ମାର୍କେଟ ସମେତ ରତାଇ ହାଟରେ ପଶ୍ଚିମବଙ୍ଗର ଗଡବେତା ଅଞ୍ଚଳରୁ ଆସୁଥିବା ପନିପରିବା ବିକ୍ରି ହେଉଛି ା ବାଲିଆପାଳ ଅଞ୍ଚଳର ଦେଶୀ ପରିବା ବିକ୍ରି ଲାଗି ପ୍ରଶାସନ କୌଣସି ପଦକ୍ଷେପ ନେଉ ନ ଥିବାରୁ ଚାଷୀମାନେ କ୍ଷତିରେ ପଡୁଥିବା କହିଛନ୍ତି। ବର୍ତ୍ତମାନ ଟ୍ରକ୍ ଓ ପିକ୍ଅପ୍ ଭ୍ୟାନରେ ବାହାରୁ ଆଳୁ, ପିଆଜ ସମେତ ବାଇଗଣ, କଲରା, ବୋଇତାଳୁ, ପୋଟଳ, ଫୁଲ, ବନ୍ଧା ଓ ଉଲକୋବି, ବିଲାତିବାଇଗଣ ବାହାର ଅଞ୍ଚଳରୁ ସ୍ଥାନୀୟ ମାର୍କେଟ ଓ ହାଟକୁ ଆସୁଛି ା ଗଡବେତା ଅଞ୍ଚଳରେ ଉତ୍ପାଦିତ ପରିବା ଅପେକ୍ଷାକୃତ କମ୍ ଦାମରେ ବିକ୍ରି ହେଉଛି। ସମ୍ପ୍ରତି ଝଡବର୍ଷା ଓ ବନ୍ୟା ଯୋଗୁ ବାଲିଆପାଳର ଚାଷୀ କ୍ଷତିଗ୍ରସ୍ତ ହୋଇଥିବାରୁ ବଜାର ସ୍ଥିତିକୁ ମୁକାବିଲା କରିବାରେ ସମର୍ଥ ହେଉନାହାନ୍ତି।
ଉଲ୍ଲେଖନୀୟ ଯେ, ଏହି ବ୍ଲକର ସୁବର୍ଣ୍ଣରେଖା ନଦୀର ଉର୍ବର ପଟୁମାଟିରେ ଭଲପରିବା ଚାଷ ହୋଇଥାଏ। ବିଶେଷକରି କୁମ୍ଭାରୀ, ନିଖିରା, ଘଣ୍ଟୁଆ, ଅସ୍ତି, ବାଲିଆପାଳ, ବିଷ୍ଣୁପୁର, ଜାମକୁଣ୍ଡା ଓ ସମୁଦ୍ର ଉପକୂଳବର୍ତ୍ତୀ ଡଗରା, ବେତଗଡିଆ, ଅଳାଡିହା, ନୂଆଗାଁ, ରତାଇ, ଜମ୍ଭିରାଇ ପଞ୍ଚାୟତରେ ଅଧିକ ପରିବା ଚାଷ ହୋଇଥାଏ। ଏଠାରେ ଶୀତଳଭଣ୍ଡାର ନ ଥିବାରୁ ଚାଷୀମାନେ ଅମଳ ସମୟରେ ବାଧ୍ୟ ହୋଇ ଉପତ୍ାଦିତ ପନିପରିବାକୁ ବାହାରୁ ଆସୁଥିବା ବ୍ୟବସାୟୀଙ୍କୁ ସ୍ବଳ୍ପ ମୂଲ୍ୟରେ ବିକ୍ରି କରି ଦେଉଥିବା କହିଛନ୍ତି। କୃଷି ବିଭାଗ ପନିପରିବା ସଂରକ୍ଷଣ ଓ ବଜାର ସୁବିଧା ନ କଲେ ଚାଷୀମାନେ ବାଧ୍ୟ ହୋଇ ଚାଷ ଛାଡିଦେବେ ବୋଲି ଅନନ୍ତ ରାଉତ, ଅନନ୍ତ ଜେନା, ଶରତ ପ୍ରଧାନ, ମଦନ ମହାନ୍ତି, ଗଣେଶ ଜେନା, ସୀତାଂଶୁ ଜେନା ଓ ଭଗବତୀ ଜେନା ପ୍ରମୁଖ ଚାଷୀ କହିଛନ୍ତି ।