ଭୁବନେଶ୍ୱର, ୧୯।୫(ବ୍ୟୁରୋ): ବାତ୍ୟା ଅମ୍ଫନ ପ୍ରଭାବରେ ଦକ୍ଷିଣ ଓଡ଼ିଶାରେ ବର୍ଷା ଆରମ୍ଭ ହୋଇଯାଇଛି। ଧୀରେ ଧୀରେ ବର୍ଷା ବଢ଼ୁଥିବା ବେଳେ ମଙ୍ଗଳବାର ରାତିରୁ ବୁଧବାର ସନ୍ଧ୍ୟା ଯାଏ ଏହାର ପ୍ରଭାବ ଅଧିକ ରହିବ। ଏ ନେଇ ଭାରତୀୟ ପାଣିପାଗ ବିଭାଗ(ଆଇଏମ୍ଡି) ମହାନିର୍ଦ୍ଦେଶକ ମୃତ୍ୟୁଞ୍ଜୟ ମହାପାତ୍ର ସୂଚନା ଦେଇଛନ୍ତି। ସେ କହିଛନ୍ତି ଯେ, ଜଗତ୍ସିଂପୁର, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱରରେ ଏହାର ବେଶି ପ୍ରଭାବ ରହିବ। ଦକ୍ଷିଣ ଓଡ଼ିଶାରେ ୪୫ରୁ ୫୫ କିମି ବେଗରେ ପବନ ବହିବ। କ୍ରମେ ଏହା ବଢ଼ିବ। ପବନର ବେଗ ବଢ଼ିବା ସହ କାଳକ୍ରମେ ଉତ୍ତର ଉପକୂଳକୁ ଗତି କରିବ। ଉତ୍ତର ଓଡ଼ିଶା ଉପକୂଳରେ ୧୦୦ କିମିରୁ ସର୍ବାଧିକ ୧୨୫ କିମି ବେଗରେ ପବନ ବହିପାରେ।
ଅମ୍ଫାନ ଏବେ ପାରାଦୀପଠାରୁ ୪୮୦ କିମି ଦୂରରେ ରହିଛି। ବୁଧବାର ଅପରାହ୍ନରୁ ସନ୍ଧ୍ୟ ମଧ୍ୟରେ ଏହା ସୁନ୍ଦରବନରେ ଲ୍ୟାଣ୍ଡଫଲ କରିବ। ଲ୍ୟାଣ୍ଡଫଳ କଲା ବେଳେ ପବନର ବେଗ ୧୫୫ରୁ ୧୮୫ କିମି ରହିବ। ଏହା ଏବେ ଘଣ୍ଟା ପ୍ରତି ୧୫ କିମି ବେଗରେ ଗତି କରୁଛି। ସ୍ଥଳଭାଗ ଛୁଇଁଲା ବେଳେ ବାତ୍ୟା ବ୍ୟାପକ କ୍ଷତି ଘଟାଇପାରେ ବୋଲି ସେ କହିଛନ୍ତି।
