ବାଙ୍କୀ, ୨୭ା୨ (ସ୍ବ.ପ୍ର): ବାଙ୍କୀରେ ଘଟିଥିବା ଡବଲ ମର୍ଡର ଘଟଣାକୁ ଅଖିଳଭାରତୀୟ କଂଗ୍ରେସ କମିଟି ସଭାପତି ସୋନିଆ ଗାନ୍ଧୀ ନିନ୍ଦା କରିଛନ୍ତି। ଏହି ଘଟଣାରେ ମୃତ୍ୟୁବରଣ କରିଥିବା ଖଜୁରିପଦା (ନୂଆଗାଁ) ସରପଞ୍ଚ ମମତା ମହାପାତ୍ରଙ୍କ ସ୍ବାମୀ ଭଗବାନ ସ୍ବାଇଁ ଏବଂ ଖବରଦାତା ଆଦିତ୍ୟ ରଣସିଂହଙ୍କ ପରିବାରକୁ ଗାନ୍ଧୀ ପୃଥକ ଭାବେ ଶୋକବାର୍ତ୍ତା ପଠାଇଛନ୍ତି। ସେ ତାଙ୍କ ଶୋକବାର୍ତ୍ତାରେ ସ୍ବର୍ଗତଃ ଭଗବାନ ଓ ଆଦିତ୍ୟ ନିଜ କ୍ଷେତ୍ରରେ ଆଗଧାଡିର ବ୍ୟକ୍ତି ଥିଲେ ବୋଲି ଉଲ୍ଲେଖ କରିଛନ୍ତି। କଂଗ୍ରେସ ଦଳ ଉଭୟଙ୍କ ପରିବାର ସହ ରହିଛି ବୋଲି ସେ ସେଥିରେ ଦର୍ଶାଇଛନ୍ତି। କଂଗ୍ରେସ ନେତା ତଥା ପୂର୍ବତନ ବିଧାୟକ ଡ.ଦେବାଶିଷ ପଟ୍ଟନାୟକ ମଙ୍ଗଳବାର ସ୍ବଗତଃ ସ୍ବାଇଁ ଓ ରଣସିଂହଙ୍କ ଏକଦଶାହ କାର୍ଯ୍ୟରେ ଯୋଗଦେଇ ଉଭୟଙ୍କ ପରିବାରକୁ ଏହି ଶୋକବାର୍ତ୍ତା ପ୍ରଦାନ କରିଥିଲେ। ଅପରପକ୍ଷେ ଏହି ଘଟଣାର ନିରେପକ୍ଷ ଓ ନ୍ୟାୟିକ ତଦନ୍ତ ଦାବି କରି ବାଙ୍କୀ ସ୍ବାର୍ଥରକ୍ଷା ସମିତି ପକ୍ଷରୁ ବୁଧବାର କଟକ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦିଆଯାଇଥିଲା। ଅପରାହ୍ନରେ ବାଙ୍କୀ ପ୍ରେସକ୍ଲବ ବିଦ୍ୟାରନତ୍ ଭବନରେ ସମିତି ପକ୍ଷରୁ ଏକ ଖବରଦାତା ସମ୍ମିଳନୀ ଡକାଯାଇ ସମିତି ପକ୍ଷରୁ ଏହି ହତ୍ୟା ଘଟଣାକୁ ନିନ୍ଦା କରାଯାଇଥିଲା। ରାଜନୀତି ଉଦ୍ଦେଶ୍ୟରେ ସଂଘବଧ ଆକ୍ରମଣ କରି ହତ୍ୟା କରାଯାଇଥିବାରୁ ତଦନ୍ତ ପ୍ରଭାବିତ ହେବାର ଆଶଙ୍କା ରହିଛି। ଘଟଣା ସହ ପରୋକ୍ଷ ଓ ପ୍ରତ୍ୟେକ୍ଷ ଭାବେ ଜଡିତ ସମସ୍ତ ବ୍ୟକ୍ତିଙ୍କୁ ତଦନ୍ତ ପରିସର ଭୁକ୍ତ କରାଗଲେ ପ୍ରକୃତ ଅପରାଧି ଦଣ୍ଡ ପାଇପାରିବେ ବୋଲି ସମ୍ମିଳନୀରେ ସମିତି ସଦସ୍ୟ କହିଥିଲେ। ଏଥିସହ ମୃତକଙ୍କ ପରିବାର ବର୍ଗକୁ ସରକାରୀ ସହାୟତା ଯୋଗାଇ ଦେବାକୁ ସେମାନେ ଦାବି କରିଥିଲେ। ନଳିନୀ ରାୟ ଏହି କାର୍ଯ୍ୟକ୍ରମକୁ ସଂଯୋଜନା କରିଥିଲେ। ବାଙ୍କୀ ସ୍ବାର୍ଥରକ୍ଷା ସମିତି ସଭାପତି ସିଦ୍ଧେଶ୍ୱର ପାଇକରାୟ, ସାଧାରଣ ସମ୍ପାଦକ ସତ୍ୟବ୍ରତ ଦାଶ ଓ ମୃତ ଆଦିତ୍ୟ କୁମାର ରଣସିଂହଙ୍କ ଭାଇ ବିଦିତ୍ୟ ରାୟ ରଣସିଂହ ଏହି ଖବରଦାତା ସମ୍ମିଳନୀରେ ଉପସ୍ଥିତ ରହି ଖବରଦାତାଙ୍କ ସମ୍ମୁଖରେ ବିଭିନ୍ନ ତଥ୍ୟ ଉପସ୍ଥାପନ କରିଥିଲେ। ଗତ ୧୫ ତାରିଖ ଅପରାହ୍ନରେ ବାଙ୍କୀ ଥାନା ଅନ୍ତର୍ଗତ କିଆପଲା ଜୋକଲାଞ୍ଜି ଜଳସେଚନ ପ୍ରକଳ୍ପ ନିକଟରେ ଏହି ଡବଲ୍ ମର୍ଡର ହୋଇଥିଲା। ଦୁର୍ବୃତ୍ତମାନେ ଭଗବାନ ଓ ଆଦିତ୍ୟଙ୍କୁ ମାରଣାସ୍ତ୍ର ସାହାଯ୍ୟରେ ଗୋଡ଼ାଇ ଗୋଡ଼ାଇ ହାଣିଥିଲେ। ଘଟଣାସ୍ଥଳରେ ଆଦିତ୍ୟଙ୍କ ମୃତ୍ୟୁ ହୋଇଥିବା ବେଳେ କଟକ ବଡ଼ ଡାକ୍ତରଖାନାରେ ଭଗବାନଙ୍କ ମୃତ୍ୟୁ ଘଟିଥିଲା। ଏନେଇ ଥାନାରେ ମାମଲା (ନଂ.୩୯/୨୦)ରୁଜୁ ହୋଇଥିଲା।
