ବାଲିଆପାଳ, ୯।୨(ସ୍ବ.ପ୍ର.)-ବାଲିଆପାଳ ବିଦ୍ୟୁତ୍ ବିଭାଗର ଖାମଖିଆଲି ନୀତି ଯୋଗୁ ଡଗରା ବେଳାଭୂମି ରାସ୍ତାରେ ନିଶ୍ଚିତ ବିପଦରୁ ଅଳ୍ପକେ ରକ୍ଷା ପାଇଯାଇଛନ୍ତି ୭୦ ପର୍ଯ୍ୟଟକ। ଏହାକୁ ନେଇ ରବିବାର ପୂର୍ବାହ୍ନରେ ସେଠାରେ କିଛି ସମୟ ପାଇଁ ଉତ୍ତେଜନା ପ୍ରକାଶ ପାଇଥିଲା।
ବାରିପଦା ଉତ୍ତରଓଡ଼ିଶା ବିଶ୍ୱବିଦ୍ୟାଳୟରୁ ଛାତ୍ରୀଛାତ୍ର ଏବଂ ଅଧ୍ୟାପକମାନେ ଏକ ଘରୋଇ ବସ୍ରେ ଡଗରା ବେଳାଭୂମିକୁ ପିକ୍ନିକ କରିବା ପାଇଁ ବାରିପଦାରୁ ଡଗରା ଆସିଥିଲେ। ବସ୍ଟି ଡଗରା ରାସ୍ତାର ଗଦାଧର ଗିରି ସ୍କୁଲ ନିକଟରେ ଯାଉଥିବା ବେଳେ ରାସ୍ତା ଉପରେ ଓହଳି ରହିଥିବା ୧୧କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସିଥିଲା। ମାତ୍ର ବସ୍ର ଡ୍ରାଇଭର ନିଜର ଉପସ୍ଥିତି ବୁଦ୍ଧି ଯୋଗୁ ତୁରନ୍ତ ବସ୍କୁ ପଛକୁ ବୁଲାଇ ଦେଇଥିଲେ ଓ ବସ୍ରୁ ବିଦ୍ୟୁତ୍ ତାର ଅଲଗା ହୋଇଯାଇଥିଲା। ବିଦ୍ୟୁତ ସଂସ୍ପର୍ଶରେ ବସ୍ ଭିତରେ ଥିବା ଜଣେ ପର୍ଯ୍ୟଟକ ଆହତ ହୋଇଥିବା ଜଣାପଡ଼ିଛି। ବସ୍ଟି ତୁରନ୍ତ ପଛକୁ ଆସିବାରୁ ବାଇକ୍ରେ ଯାଉଥିବା ଜଣେ ବ୍ୟକ୍ତି ବାଇକ ଛାଡ଼ିଦେଇ ଜୀବନ ବଞ୍ଚାଇବା ପାଇଁ ରାସ୍ତା ପାଶ୍ୱର୍ର୍କୁ ଡେଇଁ ପଡିଥିଲେ। ବାଇକ୍ଟି ବସ୍ ଚକତଳେ ଚାପିଯାଇ ଭାଙ୍ଗିରୁଜିଯାଇଛି। ବାରମ୍ବାର ବିଦ୍ୟୁତ୍ ବିଭାଗକୁ କହିଲେ ମଧ୍ୟ ନେସ୍କୋ ଅଧିକାରୀମାନେ କେବଳ ଖୁଣ୍ଟଟିଏ ପୋତିଦେଇ ବିପଦପୂର୍ଣ୍ଣ ୧୧କେଭି ତାରଟିକୁ ସେପରି ଓହଳିବାକୁ ଛାଡ଼ି ଦେଇଛନ୍ତି ବୋଲି ପୂର୍ବତନ ଡଗରା ସରପଞ୍ଚ ସତ୍ୟାନନ୍ଦ ମହାନ୍ତ ଅଭିଯୋଗ କରିଛନ୍ତି।
