ବଶିଷ୍ଠକୁଁ ଉଧାର କଲା ଡାକ୍ତରି ଦଲ: ଚିକିତ୍ସା ଲାଗି ବୁର୍ଲା ଡାକ୍ତରଖାନାରେ ଭରତି
21 ଲୋଇସିଂହା,୩।୭(ଡି.ଏନ୍.ଏ.): ବଲାଙ୍ଗୀର ଜିଲା ଲୋଇସିଂହା ବ୍ଲକ ନେଗିପାଲି ଗାଁର ବଶିଷ୍ଠ ନାଗ(୬୦) ପକ୍ଷାଘାତ ରୋଗ୍ରେ ପୀଡ଼ିତ ଅଛନ୍। ଅଭାବ ଅନାଟନ ଲାଗି ସେ ଚିକିସତ୍ିତ ନାଇଁ ହେଇପାରି ଘରେ ପଡ଼ିରହିଥିଲେ। ଇ ବାବ୍ଦେ ଧରିତ୍ରୀ ସମ୍ବଲପୁର ସଂସ୍କରଣରେ ଖବର ବାହାରିଥିଲା। ଖବର ବାହାରଲା ଉତାରୁ ସୁଆସ୍ତିଅ ବିଭାଗ ତାହାକୁ ଉଧାର କରି ଉଚ ଚିକିସତ୍ା ଲାଗି ବୁର୍ଲା ବଡ଼ ଡାକ୍ତରଖାନାକେ ପଠେଇଛେ।
ପୂବର ସୂଚନା ହିସାବେ ବୁଢ଼ିପଦର ପଁଚେତ୍ ଅଧୀନ ନେଗିପାଲି ହରିଜନ ପଡ଼ାର ବଶିଷ୍ଠ ନାଗ। ପରିବାର କହେଲେ ମାଏକିନା ବୈଦେହି, ୩ ଝି ଆର ୩ ପୁଓକେ ନେଇ ତାକର ସଁସାର। ଜମିବାଡ଼ି ବଲି ବିଶେଷ କିଛି ନାଇଁ, ବଶିଷ୍ଠ କୁଲିମଜୁରି କରି କୁଟୁମ ପୁଷୁଥିଲେ। ଇଥ୍ରେ ସେ ୩ ଝି’ ଆର ବଡ଼ପୁଓକେ ବିହାଚୁରା କରିଛନ୍। ଏହେଦେ ବଡ଼ପୁଓ ନିଜର କୁଟୁମ ଧରି ଉନିଆ ଆଡେ ରହୁଛନ୍। ବଶିଷ୍ଠକଁର ସାନପୁଓ ଝନେ ମେଧାବୀ ଛାତ୍ର। ସାନପୁଓକେ ନେଇ ସେ ଅନେକ ସପନ୍ ଦେଖିଥିଲେ, ହେଲେ ଦୁଖର କଥା ନିଜେ ବଶିଷ୍ଠ ୩ ବଛର ତଲେ ପକ୍ଷାଘାତ ରୋଗ୍ରେ ପୀଡ଼ିତ ହେଇ ଅକରମା ହେଇଗଲେ। ଚିକିସତ୍ା ଲାଗି ସେ ଭିନେ ଭିନେ ଡାକ୍ତରଖାନା ଯାଇ ଉଷୋକଷା କଲେ। ଅଭାବ ପଡ଼ଲାରୁ ୧ ଏକର ଆଟ ବିକି ଚିକିସତ୍ା କରି ଶେଷେ ନିରାଶ ହେଲେ। ପରିବାରର ଏନ୍ତା ପରିସ୍ଥିତି ଦେଖି ମଝିଅଁା ପୁଓ ରମାକାନ୍ତ ପରିବାରର ବୋଝ ଉଠେଇଥିଲେ। ସେ ବସରେ ହେଲ୍ପରି କରି ପରିବାର ଚଲାବାର ସଂଗେ ସାନ ଭାଇକେ ପାଠ୍ ପଢ଼ଉଛନ୍। ବଶିଷ୍ଠକଁର ରୋଗ୍ ଆର ପରିବାରର ସମସିଆ ବାବ୍ଦେ ଧରିତ୍ରୀରେ ଟିକିନିଖିନୁ ଖବର ବାହାରିଥିଲା। ଇତାର ପରେ ଥାନୀୟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଚିକିସତ୍ା ଅଧ୍କାରୀ ସ୍ମୀତା ଶତପଥୀକଁର ନିରଦେଶରେ ଏମ୍ଏଚ୍ୟୁର ଡାକ୍ତରି ଦଲ ବଶିଷ୍ଠକୁଁ ଉଧାର କରି ବଲାଙ୍ଗୀର ଭୀମଭୋଇ ମେଡିକାଲ କଲେଜରେ ଭରତି କରିଥିଲେ। ସେଠାନେ ପ୍ରାଥମିକ ଚିକିସତ୍ା ଉତାରୁ ଉଚ ଚିକିସତ୍ା ଲାଗି ବଶିଷ୍ଠକୁଁ ବୁର୍ଲା ପଠାଯାଇଥିବାର ଡାକ୍ତରଖାନା ତରଫୁ ଜନାଯାଇଛେ। ସେଠାନେ ବୈଦେହି ବଶିଷ୍ଠକଁର ଦେଖ୍ଭାଲ କରୁଥିବାର ଥାନୀୟ ଅଙ୍ଗନଓ୍ବାଡି କରମୀ ସୂଚନା ଦେଇଛନ୍।