କଲମପୁର,୯।୮(ଡି.ଏନ.ଏ.)-୩ ଦିନ ଧରି ଲଗାଣ ବର୍ଷାରେ କଳାହାଣ୍ଡି ଜିଲା କଲମପୁର ବ୍ଲକ ଅଞ୍ଚଳରେ ବନ୍ୟା ପରିସ୍ଥିତି ଦେଖାଦେଇଛି। ଅଞ୍ଚଳର ନଈକୂଳିଆ ଟେମରା, ପୋରୁଆଗୁଡା, ଖଙ୍ଗାରଗୁଡା, ସାନକୁଟ୍ରୁ, ବିରିପୁର, ମାଟିଖାଲ, ଜାମପଡା, କର୍ମେଲଡଙ୍ଗରୀଗୁଡା, କର୍ମେଲ, ବାଲିଛଡା, ଖଣ୍ଡିଡଙ୍ଗରୀଗୁଡା, ବଙ୍କାପଲା ଆଦି ଗଁାର ଲୋକେ ନାହିଁ ନ ଥିବା ଅସୁବିଧାରେ ସମ୍ମୁଖିନ ହୋଇଥିଲେ । ବିଶେଷ କରି ବିରିପୁର, ମାଟିଖାଲ, ବଙ୍କାପଲା ଏବଂ ବାଲିଛଡା ଗାଁରେ ବନ୍ୟାରେ ଅଧିକ ପ୍ରଭାବିତ ହୋଇଥିଲା। ଏହି ଗାଁର ଲୋକମାନଙ୍କୁ ସୁରକ୍ଷିତ ରଖିବା ପାଇଁ ବ୍ଲକ ପ୍ରଶାସନ ପକ୍ଷରୁ ସେମାନଙ୍କୁ କଲମପୁର ହାଇସ୍କୁଲକୁ ସ୍ଥାନାନ୍ତରିତ କରାଯାଇଥିଲା। କଲମପୁର ବିଡିଓ ହେମ ସାଗର ଭୋଇ ଓ ବ୍ଲକ କର୍ମଚାରୀମାନେ ନଇ କୁଳିଆ ଗାଁସବୁ ବୁଲି ପରିସ୍ଥିତି ଅନୁଧ୍ୟାନ କରି ଲୋକମାନଙ୍କୁ ଅନ୍ୟତ୍ର ସ୍ଥାନାନ୍ତର କରାଇ ରନ୍ଧାଖାଦ୍ୟ ଯୋଗାଇ ଦେଇଥିଲେ। ଗୁରୁବାର ସକାଳେ ଧର୍ମଗଡ ବିଧାୟକ ମହୋଷଧି ବାଗ ଓ ଜିଲାପାଳ ଡ. ଗାଭାଲି ପରାଗ ହର୍ଷଦ ବିରିପୁର ଗସ୍ତ କରି ବନ୍ୟା ପ୍ରଭାବିତ ଘର ସବୁ ବୁଲି ଦେଖିଥିଲେ। ଭାଙ୍ଗିଯାଇଥିବା ଘର ସହ ଚାଷ ଜମିରେ ପାଣି ମାଡି ନଷ୍ଟ ହୋଇଥିବା ଲୋକଙ୍କୁ କ୍ଷତିପୂରଣ ଯୋଗାଇ ଦିଆଯିବ ବୋଲି କହିଥିଲେ। ଏହି ଅଞ୍ଚଳରେ ଆଉ ୨ଟି ବନ୍ୟା ଆଶ୍ରୟସ୍ଥଳି ନିର୍ମାଣ ପାଇଁ ସରକାରଙ୍କୁ ଅବଗତ କରିବି ବୋଲି ବିଧାୟକ ବାଗ କହିଥିଲେ। ସକାଳୁ ବିରିପୁରଠାରେ ଡାକ୍ତରୀ ଦଳ ପହଞ୍ଚତ୍ ଲୋକମାନଙ୍କ ସ୍ବାସ୍ଥ୍ୟ ପରୀକ୍ଷା କରି ଔଷଧ ବିତରଣ କରିଥିବା ବେଳେ କଲମପୁର ତହସିଲଦାର ସୃତି ରଞ୍ଜନ ମଲ୍ଲିକ, ବିଡିଓ ହେମ ସାଗର ଭୋଇ ଉପସ୍ଥିତ ରହି ଘର ଭାଙ୍ଗିଥିବା ପରିବାରକୁ ପଲିଥିନ ଯୋଗାଇଦେଇଥିଲେ। ବିରିପୁରର ଲୋକମାନଙ୍କୁ ରନ୍ଧାଖାଦ୍ୟ ବଣ୍ଟନ କରାଯାଇଥିଲା। ଏହି ସମୟରେ ବ୍ଲକ ଯୋଗାଣଧିକାରୀ ଦେବଧର ଧରୁଆ, କଲମପୁର ଫାଣ୍ଡି ଅଧିକାରୀ ମନରଞ୍ଜନ ଆଚାର୍ଯ୍ୟ, କମପୁର ପିଇଓ ଶ୍ୟାମ ପ୍ରଶାଦ ମିଶ୍ର, ମୀନଗୁର ପିଇଓ ଗଜାନନ୍ଦ ନାଏକ ପ୍ରମୁଖ ଉପସ୍ଥିତ ଥିଲେ। କଲମପୁର ଅଗ୍ନିଶମ ବିଭାଗ ମଧ୍ୟ ମିନଗୁର ଏବଂ କଲମପୁର ପଞ୍ଚାୟତରେ ରିଲିଫ କାର୍ଯ୍ୟରେ ସହଯୋଗ କରୁଛନ୍ତି।
