ନୂଆଦିଲ୍ଲୀ,୧୯।୪: କରୋନା ପାଇଁ ସାରା ବିଶ୍ୱର ବଜାର ଏବେ କ୍ଷତିଗ୍ରସ୍ତ ହୋଇଛି। କମ୍ପାନୀଗୁଡ଼ିକର ଶେୟାର ମୂଲ୍ୟ ଲଗାତର ଭାବେ ଖସୁଥିବା ଦେଖାଯାଇଛି। ଏଭଳି ସ୍ଥିତି ବିଦେଶୀ କମ୍ପାନୀଗୁଡିକ ଫାଇଦା ଉଠାଇବା ଚକ୍କରରେ ରହୁଥିବା ଦେଖାଯାଇଛି। ବର୍ତ୍ତମାନର ସଙ୍କଟ ସମୟରେ ଅବସରବାଦୀ ଅଧିଗ୍ରହଣ ଉପରେ ଅଙ୍କୁଶ ଲଗାଇବା ଲାଗି କେନ୍ଦ୍ର ସରକାର ବିଦେଶୀ ପ୍ରତ୍ୟକ୍ଷ ପୁଞ୍ଜି ନିବେଶ(ଏଫ୍ଡିଆଇ) ନିୟମ କ୍ଷେତ୍ରରେ ପରିବର୍ତ୍ତନ କରିଛନ୍ତି। ନୂଆ ନିୟମ ମୁତାବକ ଯେଉଁ ଦେଶଗୁଡିକର ସୀମା ଭାରତକୁ ଲାଗିଛି, ସେହି ଦେଶର ନିବେଶକ ଏଠାକାର ସରକାରଙ୍କ ବିନା ଅନୁମତିରେ ନିବେଶ କରିପାରିବେ ନାହିଁ। ଅର୍ଥାତ୍ ଚାଇନା, ବାଂଲାଦେଶ ଏବଂ ପାକିସ୍ତାନର ନିବେଶକ କିମ୍ବା କୌଣସି କମ୍ପାନୀ ଭାରତରେ ନିବେଶ କରିବା ପାଇଁ ହେଲେ କେନ୍ଦ୍ର ସରକାରଙ୍କଠାରୁ ଜରୁରୀ ଭାବେ ଅନୁମତି ନେବେ। ଶିଳ୍ପ ଏବଂ ଆନ୍ତଃ ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ଏହି ସୂଚନା ଦିଆଯାଇଛି। ସରକାରଙ୍କ ବର୍ତ୍ତମାନର ନିଷ୍ପତ୍ତି ଯୋଗୁ ଚାଇନା ନିବେଶକମାନେ ବେଶି ପ୍ରଭାବିତ ହେବେ। ବର୍ତ୍ତମାନ କେବଳ ବାଂଲାଦେଶ ଏବଂ ପାକିସ୍ତାନରୁ ଆସୁଥିବା ଏଫ୍ଡିଆଇ ଲାଗି ଅନୁମତି ନେବାକୁ ପଡୁଛି।
ସୂଚନାଯୋଗ୍ୟ ଗତ କିଛିଦିନ ତଳେ ଚାଇନାର କେନ୍ଦ୍ରୀୟ ବ୍ୟାଙ୍କ ଏଚ୍ଡିଏଫ୍ସି ଲିମିଟେଡ୍ରେ ବୃହତ୍ ପରିମାଣର ଅଂଶଧନ କିଣି ଥିବାରୁ ବ୍ୟାଙ୍କରେ ଏହାର ଶେୟାର ୧% ଟପିଛି। ଏବେ ଚାଇନା, ସାରା ବିଶ୍ୱରେ ନିଜର ନିବେଶ ବଢ଼ାଉଛି। କୋଭିଡ୍-୧୯ ଲାଗି ସାରା ବିଶ୍ୱର ଶେୟାର ବଜାର କ୍ଷତିଗ୍ରସ୍ତ ହେଉଥିବା ବେଳେ ଏହାର ଫାଇଦା ନେଇ ନିବେଶ ବଢାଉଛି। ଭାରତରେ ନୂଆ ନିୟମ ମୁତାବକ କେବଳ ସରକାରୀ ରୁଟ୍ରେ ହିଁ ନିବେଶ ହୋଇପାରିବ ବୋଲି ବିଜ୍ଞପ୍ତିରେ ପ୍ରକାଶ ପାଇଛି। ସରକାରଙ୍କ ନୂଆ ନିଷ୍ପତ୍ତି ଉପରେ ପାକିସ୍ତାନର ନିବେଶକଙ୍କ ଉପରେ ମଧ୍ୟ ସିଧାସଳଖ ପ୍ରଭାବ ପଡିବ। ଚାଇନାର ନିବେଶକମାନେ ଭାରତୀୟ ଷ୍ଟାର୍ଟଅପ୍ଗୁଡିକରେ ୪ ବିଲିୟନ ଡଲାରର ନିବେଶ କରିଛନ୍ତି। ଏଭଳି ସ୍ଥିତିରେ ଭାରତୀୟ ଟେକ୍ନୋଲୋଜି ଇକୋସିଷ୍ଟମକୁ ସୁରକ୍ଷିତ କରିବା ଆବଶ୍ୟକତା ରହିଛି ବୋଲି ବିଶେଷଜ୍ଞ କହିଛନ୍ତି। ସୂଚନାଯୋଗ୍ୟ ଗତ ୪ ମାସରେ କେବଳ ଚାଇନା ନିବେଶକମାନେ ୨.୩୪ ବିଲିୟନ ଡଲାର ନିବେଶ କରିଛନ୍ତି।
