ପୁରୀ ଅଫିସ,୪।୯: ଶ୍ରୀକ୍ଷେତ୍ର ପୁରୀରେ ଲାଗି ରହିଥିବା ଉଚ୍ଛେଦ ପ୍ରକ୍ରିୟାକୁ ନେଇ ବୁଧବାର ସୁପ୍ରିମକୋର୍ଟ ମୁଖ୍ୟ ବିଚାରପତିଙ୍କ ଉଦ୍ଦେଶ୍ୟରେ ମହନ୍ତମାନେ ଏକ ଖୋଲା ଚିଠି ଲେଖିଛନ୍ତି। ଏଥିରେ ସେ ପୁରୀରେ ଏବେକାର ସ୍ଥିତିକୁ ନେଇ ପ୍ରଧାନ ବିଚାରପତିଙ୍କ ହସ୍ତକ୍ଷେପ ଲୋଡିଛନ୍ତି। ତେବେ ଶ୍ରୀମନ୍ଦିର ପରିସରରୁ ୭୫ ମିଟର ପର୍ଯ୍ୟନ୍ତ ଉଚ୍ଛେଦ ପାଇଁ କ୍ୟାବିନେଟ ନିଷ୍ପତ୍ତି ନେଇଛି। ଆଉ ଏହି ୭୫ ମିଟର ପରିଧି ମଧ୍ୟରେ ପ୍ରାୟ ୧୮ଟି ପୁରାତନ ମଠ ରହୁଛି। କିନ୍ତୁ ରାଜ୍ୟ ସରକାର ଏହାର ସୁରକ୍ଷା ପରିବର୍ତ୍ତେ ଏହାକୁ ନଷ୍ଟ କରୁଛନ୍ତି ବୋଲି ଉକ୍ତ ଚିଠିରେ ମହନ୍ତମାନେ ଉଲ୍ଲେଖ କରିଛନ୍ତି। ସେମାନେ ଆହୁରି ମଧ୍ୟ କହିଛନ୍ତି ଗତ ସପ୍ତାହରେ ସୁପ୍ରିମକୋର୍ଟରେ ଏଜି ମିଛକଥା କହିଛନ୍ତି। ଉଚ୍ଛେଦ ନେଇ ମଠ ମହନ୍ତଙ୍କ ସହମତି ଥିବା କଥା ମିଛ ବୋଲି କୁହାଯାଇଛି। ବରଂ ମଠ ଉଚ୍ଛେଦ ପାଇଁ ମହନ୍ତମାନେ ଆଦୌ ସହମତି ଦେଇ ନାହାଁନ୍ତି ବୋଲି ଉଲ୍ଲେଖ କରାଯାଇଛି। ଏବେ ଜିଲା ପ୍ରଶାସନ ଉଚ୍ଛେଦ ପାଇଁ ଆମ ଉପରେ ଚାପ ପକାଉଥିବା ସେମାନେ ଦର୍ଶାଇଛନ୍ତି। ଏହି ଉଚ୍ଛେଦ ଘଟଣାକୁ ନେଇ ସୁପ୍ରିମକୋର୍ଟ ଆମିକସକ୍ୟୁରି ଓ ଏସ୍ଜିଙ୍କୁ ପୁରୀ ଆସିବାକୁ କହିଛନ୍ତି। ହେଲେ ସରକାର ତାଙ୍କୁ ଅପେକ୍ଷା ନ କରି ଉଚ୍ଛେଦ ପ୍ରକ୍ରିୟା ଜାରି ରଖିଥିବା ସେମାନେ କହିଛନ୍ତି। ଏଥିପ୍ରତି ତୁରନ୍ତ ଦୃଷ୍ଟି ଦେବାକୁ ମହନ୍ତମାନେ ନିବେଦନ କରିଛନ୍ତି। ଐତିହ୍ୟର ସୁରକ୍ଷା ପାଇଁ ଉଚ୍ଛେଦ ଉପରେ ରହିତାଦେଶ ପାଇଁ ଆବେଦନ କରାଯାଇଛି।
