ନୂଆଦିଲ୍ଲୀ,୧୬ା୧(ପି.ଟି.): ଗଲ୍ଫ (ଉପସାରଗରୀୟ ଅଞ୍ଚଳ)ରେ ଲାଗିରହିଥିବା ଉତ୍ତେଜନାକୁ ହ୍ରାସ କରିବାରେ ଭାରତ ଗୁରୁତ୍ୱପୂର୍ଣ୍ଣ ଭୂମିକା ନେଇପାରେ। ଆମେରିକା ଓ ଇରାନ ମଧ୍ୟରେ ଉତ୍ତେଜନା ଚରମ ସୀମାରେ ପହଞ୍ଚତ୍ଥିବାବେଳେ ତେହେରାନ ପକ୍ଷରୁ ପ୍ରଥମଥର ପାଇଁ ନୂଆଦିଲ୍ଲୀର ଭୂମିକା ଉପରେ ଏପରି ଗୁରୁତ୍ୱ ଦିଆଯାଇଛି। ସେହିପରି ସମ୍ପୃକ୍ତ ଅଞ୍ଚଳରେ ଶାନ୍ତି ବଜାୟ ରଖି ସ୍ଥିରତା ଆଣିବା ପାଇଁ ଭାରତ ଆଗ୍ରହୀ ବୋଲି ଭାରତ କହିଛି। ଇରାନ ବହିର୍ବ୍ୟାପାର ମନ୍ତ୍ରୀ ମହମ୍ମଦ ଜାଭେଦ ଜରିଫ୍ ତିନିଦିନିଆ ଭାରତ ଗସ୍ତରେ ଆସି ବୁଧବାର ରାଇସିନା ଡାଇଲଗ୍ ୨୦୨୦ରେ ଯୋଗଦେଇଛନ୍ତି। ଏହି ଅବସରରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଜାତୀୟ ସୁରକ୍ଷା ପରାମର୍ଶଦାତା (ଏନ୍ଏସ୍ଏ) ଅଜିତ୍ ଡୋଭାଲଙ୍କୁ ସାକ୍ଷାତ କରି ବିଭିନ୍ନ ପ୍ରସଙ୍ଗରେ ଆଲୋଚନା କରିଛନ୍ତି।
ଡାଇଲଗ୍ ୨୦୨୦ରେ ଉଦ୍ବୋଧନ ଦେଇ ଜରିଫ୍ ଆମେରିକା ଉପରେ ବର୍ଷିଛନ୍ତି। ସେ କହିଛନ୍ତି, ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍, ପରରାଷ୍ଟ୍ର ସଚିବ ମାଇକ୍ ପମ୍ପିଓ ଏବଂ ଆତଙ୍କବାଦୀ ସଙ୍ଗଠନ ଇସ୍ଲାମିକ୍ ଷ୍ଟେଟ୍ (ଆଇଏସ୍) ଇରାନ ସେନାର ଜେନେରାଲ କାସିମ୍ ସୋଲେମାନୀଙ୍କ ମୃତ୍ୟୁକୁ ନେଇ ଉତ୍ସବ ମନାଉଛନ୍ତି। ଆମେରିକା ସବୁକିଛିକୁ ନିଜ ଲାଭ ଦୃଷ୍ଟିରୁ ଦେଖୁଛି, ସମ୍ପୃକ୍ତ ଅଞ୍ଚଳର ହିତ ଦୃଷ୍ଟିରୁ ନୁହେଁ। ସୋଲେମାନୀଙ୍କ ହତ୍ୟା ଆମେରିକାର ଅହଂକାର ଓ ଅଜ୍ଞତାର ପରିଚୟ। ଏହି ବର୍ବରକାର୍ଯ୍ୟକୁ ଭାରତର ୪୩୦ ସହରରେ ବିରୋଧ କରାଯାଇଛି। ଉପସାଗରୀୟ ଅଞ୍ଚଳରେ ଉତ୍ତେଜନା ହ୍ରାସ ପାଇଁ ଭାରତ ବଡ଼ ଭୂମିକା ନେଉ ବୋଲି ସେ କହିଛନ୍ତି। ଏହି ଅବସରରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ସମ୍ପୃକ୍ତ କ୍ଷେତ୍ରରେ ଶାନ୍ତି, ସୁରକ୍ଷା ଓ ସ୍ଥିରତା ବଜାୟ ରଖିବା ପାଇଁ ଭାରତ ଚାହୁଁଛି। ଚବାହାର ପ୍ରକଳ୍ପରେ ଉନ୍ନତି ଓ ଏହାକୁ ଏକ ସ୍ବତନ୍ତ୍ର ଅର୍ଥନୈତିକ ଜୋନ୍ରେ ପରିଣତ କରିଥିବାରୁ ଇରାନ ନେତୃବୃନ୍ଦଙ୍କୁ ଧନ୍ୟବାଦ। ଇରାନ ସହିତ ଭାରତର ସମ୍ପର୍କ ଆଗକୁ ଆହୁରି ସୁଦୃଢ଼ ହେବ ବୋଲି ପ୍ରଧାନମନ୍ତ୍ରୀ ପ୍ରତିଶ୍ରୁତି ଦେଇଥିବା ତାଙ୍କ କାର୍ଯ୍ୟାଳୟ ପିଏମ୍ଓ ସୂତ୍ରରୁ ପ୍ରକାଶ।
