ଅନୁଗୋଳ ଅଫିସ, ୧୯।୧୨- ଅନୁଗୋଳ ପୌରପାଳିକାକୁ ଡମ୍ପିଂୟାର୍ଡ୍ ପାଇଁ ମିଳିଥିବା ୫ ଏକର ଜାଗାରୁ ରାତିରେ ହେଉଛି ମାଟି ଚୋରା ଚାଲାଣ। ଜେସିବି ଓ ଟିପ୍ପର ଲଗାଇ ମାଫିଆମାନେ ଶହ ଶହ ଟ୍ରିପ୍ ମାଟି ତାଡ଼ି ନେଇ ଆଣ୍ଠୁଏ ଖାଲ କରିଦେଇଥିଲେ ବି ଏ ନେଇ ପୌରପାଳିକା କି ତହସିଲ ପ୍ରଶାସନ ନିକଟରେ କିଛି ଖବର ନାହିଁ। ରାତିରେ ପାଟ୍ରୋଲିଂ କରୁଥିବା ଅନୁଗୋଳ ପୋଲିସ ମଧ୍ୟ ଏପରି ମାଟି ଚୋରା ଚାଲାଣକାରୀଙ୍କୁ ଧରିପାରି ନ ଥିବା ବେଳେ ଘଟଣାସ୍ଥଳକୁ ଯାଇ ତଦନ୍ତ କରିବେ ବୋଲି ବଅଁରପାଳ ତହସିଲଦାର ଜିତେନ୍ଦ୍ର କୁମାର ସାହୁ କହିଛନ୍ତି।
ପ୍ରକାଶ ଯେ, ୪ ବର୍ଷ ପୂର୍ବରୁ ବଅଁରପାଳ ତହସିଲ ପକ୍ଷରୁ କୁଶାସିଂହାରେ ୫ ଏକର ଜାଗା ଅନୁଗୋଳ ପୌରପାଳିକାକୁ ପ୍ରଦାନ କରାଯାଇଥିଲା। ଏଠାରେ ଡମ୍ପିଂୟାର୍ଡ୍ ନିର୍ମାଣ ଯୋଜନା ଥିବାରୁ ପୌରପାଳିକା ନାମରେ ଉକ୍ତ ଜମିର ପଟ୍ଟା କରାଯାଇଥିଲା। ଡମ୍ପିଂୟାର୍ଡ ନିର୍ମାଣ ପାଇଁ ସେଠାରେ ବାଲି, ଗୋଡ଼ି ଆଦି ପକାଇ ପୌର ପରିଷଦ ପକ୍ଷରୁ କାର୍ଯ୍ୟ ଆରମ୍ଭ କରାଯାଇଥିଲା। କିନ୍ତୁ ପାଚେରି ବୁଲାଇବା ବେଳେ ସ୍ଥାନୀୟ ଲୋକେ ବିରୋଧ କରିଥିଲେ। ଫଳରେ ଡମ୍ପିଂୟାର୍ଡ୍ ନିର୍ମାଣ କାର୍ଯ୍ୟକୁ ସ୍ଥଗିତ ରଖାଯାଇଥିଲା। ଏବେ ଉକ୍ତ ସ୍ଥାନରୁ ମାଟି ଖୋଳି ନିଆଯିବା ସହ ପଡ଼ି ରହିଥିବା ବାଲି ଓ ଗୋଡ଼ିକୁ ଚୋରା ଚାଲାଣ କରାଯାଉଥିବା ଅଭିଯୋଗ ହେଉଛି। ଜେସିବି ଓ ଟିପ୍ପର ଲଗାଇ ରାତିରେ ଶହ ଶହ ଟ୍ରିପ୍ ମାଟି ଉଠାଇ ନିଆଯାଇଥିବାରୁ ଉକ୍ତ ସ୍ଥାନ ଆଣ୍ଠୁଏ ଲେଖାଏ ଖାଲ ହୋଇଯାଇଛି। ଗତ ୧୫ ଦିନ ହେବ ଏପରି ଖୋଲାଖୋଲି ଚୋରି କାର୍ଯ୍ୟ ଚାଲୁଥିଲେ ମଧ୍ୟ ପୌରପାଳିକା, ତହସିଲ କିମ୍ବା ପୋଲିସ ନିକଟରେ କିଛି ବି ସୂଚନା ନାହିଁ। ପୌରପାଳିକାର ଡମ୍ପିଂୟାର୍ଡ୍ ସ୍ଥାନ ସହ ନିକଟରେ ଥିବା ପଡ଼ିଆ ଅଞ୍ଚଳରୁ ମାଟି ଚୋରାରେ ଆଣି ମାଫିଆମାନେ ଅନୁଗୋଳ ସହରର ଏକ ସ୍ଥାନରେ ପକାଇଛନ୍ତି। ଏ ସମ୍ପର୍କରେ ପୌର ପରିଷଦ ନିର୍ବାହୀ ଅଧିକାରୀ ବିନୋଦ ଚନ୍ଦ୍ର ପଣ୍ଡା କହିଛନ୍ତି, ଡମ୍ପିଂୟାର୍ଡ୍ ପାଇଁ ପ୍ରଶାସନ ପକ୍ଷରୁ ଜାଗା ମିଳିଥିଲା। ସ୍ଥାନୀୟ ଲୋକେ ବିରୋଧ କରିବାରୁ ପାଚେରି ନିର୍ମାଣ ହୋଇପାରିନାହିଁ। ତେବେ ମାଟି ଚୋରା ଚାଲାଣ ହେଉଥିବା ନେଇ ଆମ ନିକଟରେ କୌଣସି ସୂଚନା ନାହିଁ। ଘଟଣାସ୍ଥଳ ପରିଦର୍ଶନ ପରେ ପ୍ରଶାସନକୁ ଅବଗତ କରିବା ସହ ଆବଶ୍ୟକ ପଡ଼ିଲେ ଥାନାରେ ଅଭିଯୋଗ କରାଯିବ ବୋଲି ନିର୍ବାହୀ ଅଧିକାରୀ ପ୍ରକାଶ କରିଛନ୍ତି। ସେହିପରି ବଅଁରପାଳ ତହସିଲଦାର ସାହୁ କହିଛନ୍ତି, ମାଟି ଚୋରା ଚାଲାଣ ନେଇ ସୂଚନା ମିଳିଥିଲା। ଘଟଣାର ଅନୁଧ୍ୟାନ କରିବାକୁ ଆଡିସିନାଲ ତହସିଲଦାରଙ୍କୁ ନିର୍ଦ୍ଦେଶ ଦେଇଥିଲି। ସେ ଅଦ୍ୟାବଧି ରିପୋର୍ଟ ପ୍ରଦାନ କରିନାହାନ୍ତି। ନିଜେ ଘଟଣାସ୍ଥଳକୁ ଯାଇ ଅନୁଧ୍ୟାନ କରିବା ପରେ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଘଟଣା ସମ୍ପର୍କରେ ଅନୁଗୋଳ ଥାନା ଅଧିକାରୀ ରମେଶ ଚନ୍ଦ୍ର ବିଶୋଇଙ୍କ ମତାମତ ମିଳିପାରି ନାହିଁ।
