ଭୁବନେଶ୍ୱର,୧୫-୧(ବ୍ୟୁରୋ)/ କଟକରୋଡ(ଡି.ଏନ୍.ଏ.):ଗାଡ଼ି ପାର୍କିଂକୁ ନେଇ ଭଗବାନ ଟାଓ୍ବାର ଟ୍ରେଜରର ପରବିନ୍ଦର ପାଲ୍ ସିଂଙ୍କୁ ଆକ୍ରମଣ ହୋଇଛି। ଖବର ପାଇ ସେଠାରେ ପିସିଆର୍ ଭ୍ୟାନ୍ ପହଞ୍ଚତ୍ଥିଲା। ହେଲେ ପୋଲିସ ଉପସ୍ଥିତିରେ ବି ଆକ୍ରମଣକାରୀମାନେ ତାଙ୍କୁ ଛାଡ଼ି ନ ଥିଲେ। ପରବିନ୍ଦରଙ୍କ ପଗଡ଼ି ଖୋଲି ନିସ୍ତୁକ ମାଡ଼ ମାରି ଲହୁଲୁହାଣ କରିଥିଲେ। ଲକ୍ଷ୍ମୀସାଗର ଥାନାଞ୍ଚଳରେ ମଙ୍ଗଳବାର ଅପରାହ୍ନରେ ଏହି ଘଟଣା ଘଟିଛି। ପୋଲିସ ଦୁଇ ପକ୍ଷର ଅଭିଯୋଗ ଆଧାରରେ ଦୁଇ ପୃଥକ ମାମଲା ରୁଜୁ କରିଛି। ତଦନ୍ତ ପରେ ଦୁଇଜଣ ଆକ୍ରମଣକାରୀ ଶଙ୍କର ରାଉତ ଓ ଦୀପକ ମହାନ୍ତିଙ୍କୁ ଗିରଫ କରିଥିବାବେଳେ ୬ଜଣ ଫେରାର ଥିବା ପୋଲିସ କହିଛି। ଅନ୍ୟପକ୍ଷରେ ପୋଲିସ ସମ୍ମୁଖରେ ଆକ୍ରମଣ ଘଟଣାକୁ ନେଇ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି। ଏହି ଘଟଣାରେ ଉକ୍ତ ପିସିଆର୍ ଭ୍ୟାନ୍ର ଇନ୍ଚାର୍ଜଙ୍କୁ ନିଲମ୍ବିତ କରିଛନ୍ତି।
ପୋଲିସ ସୂଚନାନୁଯାୟୀ, ପରବିନ୍ଦର ଭଗବାନ ଟାଓ୍ବାର ଆପାର୍ଟମେଣ୍ଟରେ ରହିବା ସହ ଉକ୍ତ ଆପାର୍ଟମେଣ୍ଟ ଆସୋସିଏଶନର ଟ୍ରେଜରର ଅଛନ୍ତି। ଆପାର୍ଟମେଣ୍ଟ ଆଗରେ ଅଭିଯୁକ୍ତ ଦୀପକ, ଶଙ୍କର ଓ ଅନ୍ୟ ୬ଜଣ ଯୁବକ କାର୍ ପାର୍କିଂ କରି ଖଟି କରୁଥିଲେ। ପରବିନ୍ଦର ତାଙ୍କ ଝିଅକୁ ସ୍କୁଲରୁ ଆଣି କାରରେ ଘରକୁ ଫେରିଥିଲେ। ହେଲେ ଦୀପକଙ୍କ କାର୍ ବାଟରେ ଥିବାରୁ ପରବିନ୍ଦର ଆପାର୍ଟମେଣ୍ଟ ଭିତରକୁ ପଶିପାରି ନ ଥିଲେ। ଦୀପକଙ୍କୁ କାର୍ ହଟାଇବାକୁ କହିବାରୁ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ଏଥିରେ ଦୀପକ ଓ ସହଯୋଗୀମାନେ ଉତ୍ତ୍ୟକ୍ତ ହୋଇ ପରବିନ୍ଦରଙ୍କୁ ସଂଘବଦ୍ଧ ଆକ୍ରମଣ କରିଥିଲେ। ଆକ୍ରମଣକାରୀମାନେ ତାଙ୍କୁ ଗୋଡ଼ାଇ ଗୋଡ଼ାଇ ପିଟିଥିଲେ। ପରବିନ୍ଦର ଲହୁଲୁହାଣ ହୋଇ ଆପାର୍ଟମେଣ୍ଟ ଭିତରେ ଲୁଚି ରହି ଥାନାକୁ ଫୋନ୍ କରିଥିଲେ। ଏହାପରେ ପିସିଆର୍ ଭ୍ୟାନ୍ ଘଟଣାସ୍ଥଳରେ ପହଞ୍ଚତ୍ଥିଲା। ଅଭିଯୁକ୍ତଙ୍କୁ ଚିହ୍ନଟ କରିବା ପାଇଁ ପୋଲିସ ପରବିନ୍ଦରଙ୍କୁ ଆପାର୍ଟମେଣ୍ଟରୁ ବାହାରକୁ ଡାକି ଆଣିଥିଲେ। ଏହି ସମୟରେ ଘଟଣାସ୍ଥଳରେ ଉପସ୍ଥିତ ଥିବା ଅଭିଯୁକ୍ତ ଦୀପକ, ଶଙ୍କର ଓ ଅନ୍ୟମାନେ ପୋଲିସ ଉପସ୍ଥିତିରେ ପରବିନ୍ଦରଙ୍କୁ ନିସ୍ତୁକ ମାଡ଼ ମାରିଥିଲେ।
ଏନେଇ ଜୋନ୍ ଏସିପି ରବି ଶତପଥୀ କହିଛନ୍ତି, ସିସିଟିଭି ଯାଞ୍ଚ କରାଯାଇ ଦୁଇ ଜଣଙ୍କୁ ଗିରଫ କରାଯାଇଛି। ଘଟଣାର ଅଧିକ ତଦନ୍ତ କରାଯାଉଥିବା ସେ କହିଛନ୍ତି।
