ଭୁବନେଶ୍ୱର,୧୬ା୧(ବ୍ୟୁରୋ): ଆକ୍ରମଣକାରୀଙ୍କୁ ଚିହ୍ନଟ ପାଇଁ ପୋଲିସ ଡାକିଲା। ଏକାଧିକ ପୋଲିସର ଉପସ୍ଥିତିରେ ହିଁ ଅଭିଯୁକ୍ତମାନେ ମୋତେ ସଂଘବଦ୍ଧ ଭାବେ ମରଣାନ୍ତକ ଆକ୍ରମଣ କଲେ। ମୋ ପଗଡ଼ିକୁ ତଳେ କଚାଡ଼ି ଅସମ୍ମାନିତ କଲେ। ମୋ ଜାତିକୁ ନେଇ ଖରାପ ଭାଷାରେ ଗାଳିଗୁଲଜ କରିବା ସହ ନାନା ଆକ୍ଷେପ ମଧ୍ୟ କଲେ। କେହି ମୋତେ ସହାୟତାର ହାତ ବଢ଼ାଇବାକୁ ଆସିଲେନି। ଖୋଦ୍ ପୋଲିସ ଦେଖଣାହାରି ସାଜିଥିଲା। ଲାଗୁଥିଲା ଏଠାରେ ପୋଲିସ-ଅପରାଧୀ ସବୁ ସମାନ। ମୋର ଜାନ୍ ଚାଲିଯାଇଥାନ୍ତା ପଛେ, ମୋ ଜାତିର ଇଜ୍ଜତ ପଗଡ଼ିକୁ ଫିଙ୍ଗି ଯେପରି ଆକ୍ରମଣ କଲେ ତାହା ମୋତେ ଭାରି କଷ୍ଟ ଦେଉଛି। ମୋତେ ବଞ୍ଚତ୍ବାକୁ ଇଚ୍ଛା ହେଉନି। ଘଟଣା ପରଠାରୁ ମୁଁ ଓ ମୋ ପରିବାର ଭୟ ଆଶଙ୍କାରେ ରହିଛୁ। ଓଡ଼ିଶା ପୋଲିସ ଉପରେ ମୋର ଭରସା ପାଉନି। ଆବଶ୍ୟକ ପଡ଼ିଲେ ଓଡ଼ିଶା ଛାଡ଼ି ନିଜ ରାଜ୍ୟକୁ ପଳାଇବୁ ବୋଲି ମଙ୍ଗଳବାର ଲକ୍ଷ୍ମୀସାଗର ଥାନାଞ୍ଚଳରେ ଆକ୍ରମଣର ଶିକାର ହୋଇଥିବା ପଞ୍ଜାବର ପରବିନ୍ଦର ପାଲ୍ ସିଂ ଗଣମାଧ୍ୟମକୁ କହିଛନ୍ତି।
ପରବିନ୍ଦରଙ୍କ ଏଭଳି କ୍ଷୋଭ ଓ ଭୟ ଓଡ଼ିଶା ପୋଲିସ ପାଇଁ ନାନା ପ୍ରଶ୍ନବାଚୀ ସୃଷ୍ଟି କରିଛି। ଘଟଣାକୁ କମିଶନରେଟ ପୋଲିସ ଗୁରୁତ୍ୱର ସହ ନେଇ ଆରମ୍ଭରୁ କଡ଼ା ପଦକ୍ଷେପ ନେଇଛି। ମଙ୍ଗଳବାର ରାତିରେ ପୋଲିସ ଲକ୍ଷ୍ମୀସାଗର ଅଞ୍ଚଳର ଦୀପକ ମହାନ୍ତି ଓ ଶଙ୍କର ରାଉତଙ୍କୁ ଗିରଫ କରିଥିବାବେଳେ ବୁଧବାର ଅନ୍ୟତମ ଅଭିଯୁକ୍ତ ଦୀପକ କୁମାର ଜେନାଙ୍କୁ ଗିରଫ କରିଛି। ପରବିନ୍ଦରଙ୍କ ଅଭିଯୋଗକ୍ରମେ ମାମଲା ନଂ.୧୫/୧୦ରେ ୩ ଅଭିଯୁକ୍ତଙ୍କୁ ପଚରାଉଚରା ପରେ କୋର୍ଟ ଚାଲାଣ କରାଯାଇଥିଲା। ଅନ୍ୟପକ୍ଷରେ ଘଟଣା ପରେ ପିସିଆର୍ ଭ୍ୟାନ୍ ଇନ୍ଚାର୍ଜ ତଥା ପୂର୍ବତନ ସେନା କର୍ମଚାରୀ ସୁବାସ ଚନ୍ଦ୍ର ରାଉତଙ୍କୁ ନିଲମ୍ବିତ କରାଯାଇଥିବାବେଳେ ଆଗାମୀ ୩ ଦିନରେ କୋର୍ଟରେ ଚାର୍ଜଶିଟ୍ ଦାଖଲ କରିବାକୁ କମିଶନର ସୁଧାଂଶୁ ଷଡ଼ଙ୍ଗୀ ନିର୍ଦ୍ଦେଶ ଦେଇଛନ୍ତି। ସେହିଭଳି ବୁଧବାର ସନ୍ଧ୍ୟାରେ ଅତିରିକ୍ତ ପୋଲିସ କମିଶନର ତଥା ଡିସିପି ଅନୁପ କୁମାର ସାହୁ ପରବିନ୍ଦରଙ୍କ ଘରେ ପହଞ୍ଚତ୍ ତାଙ୍କଠାରୁ ପଚାରିବୁଝିଥିଲେ। ଅଭିଯୁକ୍ତଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା କହି ପରିବାର ଲୋକଙ୍କୁ ଆଶ୍ୱାସନା ଦେଇଥିଲେ। ତେବେ ମିଳିଥିବା ଶେଷ ରିପୋର୍ଟ ଅନୁସାରେ, କୋର୍ଟରେ ସମସ୍ତଙ୍କୁ ଜାମିନ ମିଳିଯାଇଛି। ଏହା ଶୁଣିବା ପରେ ଆକ୍ରମଣର ଶିକାର ପରବିନ୍ଦର ଓ ପରିବାର ଲୋକେ ଆହୁରି ଭୟଭୀତ ଅବସ୍ଥାରେ ରହିଛନ୍ତି।
ସୂଚନାଯୋଗ୍ୟ, ଲକ୍ଷ୍ମୀସାଗର ଥାନା ଅନ୍ତର୍ଗତ ଭଗବାନ ଟାଓ୍ବାର ଆପାର୍ଟମେଣ୍ଟରେ ପରବିନ୍ଦର ପରିବାର ସହ ରୁହନ୍ତି। ଏଥିସହ ସେ ଉକ୍ତ ଆପାର୍ଟମେଣ୍ଟ ଆସୋସିଏଶନର ଟ୍ରେଜରର ଅଛନ୍ତି। ମଙ୍ଗଳବାର ଅପରାହ୍ନରେ ଅଭିଯୁକ୍ତ ଦୀପକ, ଶଙ୍କର ଓ ଅନ୍ୟ ୬ଜଣ ଆପାର୍ଟମେଣ୍ଟ ଆଗରେ କାର୍ ରଖି ଖଟି କରୁଥିଲେ। ପରବିନ୍ଦର ତାଙ୍କ ଝିଅକୁ ସ୍କୁଲରୁ ଆଣି ଫେରୁଥିବାବେଳେ ଅଭିଯୁକ୍ତମାନ ବାଟରୁ କାର୍ ନ ହଟାଇ ତାଙ୍କୁ ଆକ୍ରମଣ କରିଥିଲେ। ପରବିନ୍ଦର ଜୀବନ ବଞ୍ଚାଇବାକୁ ଆପାର୍ଟମେଣ୍ଟ ଭିତରକୁ ଦୌଡ଼ି ପଳାଇ ନଂ.୧୦୦ରେ ପୋଲିସକୁ ଖବର ଦେଇଥିଲେ। ପିସିଆର୍ ପୋଲିସ ପହଞ୍ଚତ୍ ଅଭିଯୁକ୍ତଙ୍କୁ ଚିହ୍ନଟ ପାଇଁ ପରବିନ୍ଦରଙ୍କୁ ଡାକିଥିବାବେଳେ ସେଠାରେ ଉପସ୍ଥିତ ଅଭିଯୁକ୍ତମାନେ ଆକ୍ରମଣ କରି ଲହୁଲୁହାଣ କରିଦେଇଥିଲେ।
