ବେଙ୍ଗାଲୁରୁ,୯।୯: ପୋଲିସ ଓ ‘ମେକ୍ ଏ ଓ୍ବିସ୍’ ଫାଉଣ୍ଡେଶନର ମିଳିତ ସହଯୋଗରେ ୫ଣି ରୋଗଗ୍ରସ୍ତ ଶିଶୁଙ୍କୁ ପୋଲିସ ବିଭାଗର ଶ୍ରେଷ୍ଠ ପଦରେ ଗୋଟିଏ ଦିନ ପାଇଁ ବସାଯାଇଛି। ପୋଲିସ ପୋଷାକ ସହ ଏମାନଙ୍କ ହାତରେ ବନ୍ଧୁକ ଓ ହାତକଡି ମଧ୍ୟ ଧରାଇ ଦିଆଯାଇଥିଲା। ତେବେ ସେମାନଙ୍କ ଇଚ୍ଛା ପୂରଣ କରିବାକୁ ଏଭଳି କରାଯାଇଥିବା କୁହାଯାଏ। ଏହି ପିଲାମାନେ ହେଲେ ରୁଥାନ କୁମାର, ମହମ୍ମଦ ସାହିବ, ସୟଦ ଇମାଦ, ଶ୍ରାବଣି ଓ ଅରଫାନ ଫାଶା। ଏମାନଙ୍କୁ ପୋଲିସ ପକ୍ଷରୁ କଷ୍ଟମାରୀ ଗାର୍ଡ ଅଫ୍ ଅନର ଓ ଡଗ୍ ସ୍ବାର୍ଡ ପକ୍ଷରୁ ସମ୍ମାନ ଦିଆଯାଇଥିଲା। ଏମାନେ ବଡ ହେଲେ ପୋଲିସ ହେବାକୁ ଲକ୍ଷ୍ୟ ରଖିଛନ୍ତି ସତ କିନ୍ତୁ ଏହା କେତେଦୂର ସମ୍ଭବ ହେବ ତାହା କହିବା କଷ୍ଟକର। ଏହି ପୋଷାକ ପିନ୍ଧିବା ପରେ ପିଲାମାନଙ୍କୁ କୌତୁହଳର ସହ ପ୍ରଶ୍ନ ପରଚା ଯାଇଥିବା ବେଳେ ଅରଫାନ ନାମକ ଶିଶୁ ଜଣକ କହିଥିଲେ। ମୁଁ ବଡ ହେଲେ ପୋଲିସ ହେବି ଆଉ ସବୁ ଖରାପ ଲୋକଙ୍କୁ ଜେଲରେ ରଖିଦେବି। ପିଲାମାନଙ୍କର ଏହି କୋମଳ ହୃଦୟର କଥା ସମସ୍ତଙ୍କୁ ବେଶ୍ ଛୁଇଁଯିବା ସହ ଆଖିରେ ଭରି ଦେଇଥିଲା ଲୁହ।
