ସୋନପୁର,୨୪।୪(ନି.ପ୍ର.)- ଦୁଃଖ ଓ ସୁଖ ସମୟରେ ପୁସ୍ତକ ସାଥି ହୋଇଥାଏ। ପୁସ୍ତକ ପଢିଲେ ଜ୍ଞାନ ବଢେ, ଆତ୍ମ ସନ୍ତୋଷ ମିଳେ। ଦୁଶ୍ଚିନ୍ତା ଦୂର ହୁଏ। ତେଣୁ ପୁସ୍ତକ ହିଁ ମଣିଷର ଅନ୍ତରଙ୍ଗ ବନ୍ଧୁ ବୋଲି ବିଶ୍ୱ ପୁସ୍ତକ ଦିବସ ଅବସରରେ ବହୁ ବିଶିଷ୍ଟ ବ୍ୟକ୍ତିମାନେ ମତ ପ୍ରକାଶ କରିଛନ୍ତି। ଇଙ୍କ୍ଫେଷ୍ଟ ପକ୍ଷରୁ ସୋନପୁର ବ୍ଲକ ଜନମୁରା ପଞ୍ଚାୟତର ବଲଦାପାଲି ଗ୍ରାମ ମଣ୍ଡପରେ ମଙ୍ଗଳବାର ସନ୍ଧ୍ୟାରେ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ଜିଲାପାଳ ମଧୁସୂଦନ ମିଶ୍ର ମୁଖ୍ୟ ଅତିଥିଭାବେ ଯୋଗଦେଇ ପୁସ୍ତକ ସମ୍ପର୍କରେ ନିଜସ୍ବ ମତ ଦେଇ କହିଥିଲେ ଯେ, ଏହା ମାନବ ଜୀବନରେ ପ୍ରେରଣାଦାୟକ। ଜୀବନ ସହିତ ମଣିଷର ଗଭୀର ସମ୍ପର୍କ ରହିଛି। ପୁସ୍ତକ କେବେ ସରି ଯାଏନି। ଜୀବନ ଏକ ଅଧା ଗଢା ବହି ଭଳି ବୋଲି ମତ ଦେଇଥିଲେ। ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା ମୁଖ୍ୟବକ୍ତାଭାବେ ଯୋଗଦେଇ ଲେଖକ ପାଠକ ଟିଏ ଓ ପାଠକ ଲେଖକଟିଏ ହୋଇଥାଏ। ଲେଖକ ପାଠକୀୟ ଅନୁରାଗ ଆଶା କରେ। ତେଣୁ ପୁସ୍ତକ ଜୀବନ ସଦୃଶ। ପୁସ୍ତକ ପଠନର ଆବଶ୍ୟକତା ଓ ବିଶ୍ୱ ପୁସ୍ତକ ଦିବସ ସମ୍ପର୍କରେ ଅତିରିକ୍ତ ଜିଲାପାଳ ପଣ୍ଡା ଉପାଦେୟ ଆଲୋଚନା କରିଥିଲେ। ଆଇନଜୀବୀ ଗୌରିଶ୍ୟାମ ପଣ୍ଡା ଅନ୍ୟତମ ଆଲୋଚକଭାବେ ଯୋଗଦେଇ ଆଜିର ଇଣ୍ଟରନେଟ୍ ଦୁନିଆରେ ବି ପୁସ୍ତକର ଆଦର କମି ନାହିଁ ବୋଲି କହିଥିଲେ। ଶଶାଙ୍କ ଶେଖର ସିଂଦେଓ ଅନ୍ୟତମ ସମ୍ମାନିତ ଅତିଥିଭାବେ ଯୋଗଦେଇ ପୁସ୍ତକକୁ ସମସ୍ତେ ଆଦର କରିବା ଉପରେ ଗୁରୁତ୍ୱାରୋପ କରିଥିଲେ। ପ୍ରାରମ୍ଭରେ ଛାତ୍ରୀଛାତ୍ରଙ୍କ ଭାଗବତ ପାଠରୁ କାଯର୍ୟକ୍ରମ ଆରମ୍ଭ ହୋଇଥିଲା। ଏହି ଅବସରରେ ଉପସ୍ଥିତ ବିଦ୍ୟାଳୟର କୁନି କୁନି ଛାତ୍ରୀଛାତ୍ରଙ୍କୁ ବର୍ଣ୍ଣବୋଧ ପୁସ୍ତକ ପ୍ରଦାନ କରାଯାଇଥିଲା। ସମ୍ପାଦକ ଅମ୍ବୁଜ ବିହାରୀ ଶତପଥୀ କାର୍ଯ୍ୟକ୍ରମକୁ ସଂଯୋଜନା କରିଥିବା ବେଳେ ଇଙ୍କ୍ଫେଷ୍ଟର ସଭାପତି ସ୍ବାଧୀନ ମେହେର ସ୍ବାଗତ ଭାଷଣ ପ୍ରଦାନ କରିଥିଲେ। ଅଧ୍ୟାପକ ଡ. ଦେବାଶିଷ ପାଣ୍ଡିଆ, ରାଜୀବ ନାୟକ, ବେଣୁଧର ପ୍ରଧାନ, କ୍ଷିରୋଦ ବିହାରୀ ବିଶ୍ୱାଳ, ଆଶିଷ ମିଶ୍ର, ପ୍ରଦୀପ ପୁରୋହିତ, ପ୍ରଭୁଦତ୍ତ ରଥ ଓ ଅଧ୍ୟାପକ ସୌରଭ ଖମାରୀ କାର୍ଯ୍ୟକ୍ରମ ଆୟୋଜନରେ ସହଯୋଗ କରିଥିଲେ ।