ମୁମ୍ବାଇ,୩-୨: ବଜେଟକୁ ପୁଞ୍ଜି ବଜାରର ପ୍ରତିକ୍ରିୟା ନେଇ ସରକାରଙ୍କ ଥିଙ୍କ ଟ୍ୟାଙ୍କ ନୀତି ଆୟୋଗର ଉପାଧ୍ୟକ୍ଷ ରାଜୀବ କୁମାର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ବଜେଟ ଘୋଷଣା ପରେ ପୁଞ୍ଜି ବଜାରର ପ୍ରତିକ୍ରିୟା ଆଶ୍ଚର୍ଯ୍ୟ କରିଛି। ବଜେଟ ପ୍ରସ୍ତାବକୁ ନେଇ ପୁଞ୍ଜି ବଜାର ଉପରେ ନକରାତ୍ମକ ପ୍ରଭାବ ପଡିଛି। ହୁଏତ ନିବେଶକମାନେ କିଛି ବଡ ଘୋଷଣା ଆଶା କରୁଥିଲେ ବୋଲି ସେ ମତ ରଖିଛନ୍ତି। ମାତ୍ର ବଜେଟରେ କିଛି ଭୂଲ ଘୋଷଣା କରାଯାଇ ନାହିଁ। ଯାହା ଦ୍ୱାରା ନିବେଶକଙ୍କର କ୍ଷତି ସାଧିତ ହେବ। ସୂଚନା ଯୋଗ୍ୟ ସେନସେକ୍ସ ଗତ ଗୋଟିଏ ଦଶନ୍ଧିର ଗୋଟିଏ ଦିନରେ ସର୍ବାଧିକ କ୍ଷତି ସହିଛି। ଏହି ସମୟରେ ନିବେଶକଙ୍କର ୩.୪୬ ଲକ୍ଷ କୋଟି ଟଙ୍କା କ୍ଷତି ହୋଇଛି। ବଜାରର ସୂଚକାଙ୍କ ୧୦୦୦ ପଏଣ୍ଟ ଖସିଥିବା ବେଳେ ଏହା କାହିଁକି ହେଲା ବୋଲି ଆଶ୍ଚର୍ଯ୍ୟ ବୋଲି ସେ ମତ ରଖିଛନ୍ତି। ସେ କହିଛନ୍ତି ଯେ, ଏହି ପ୍ରସଙ୍ଗକୁ ବୁଝିବା ଲାଗି ଚେଷ୍ଟା କରୁଛି। ସରକାର ବଜେଟରେ ନିବେଶ ବିରୋଧି ନୀତି, ଘରୋଇ କ୍ଷେତ୍ରକୁ ପ୍ରଭାବିତ କଲା ଭଳି ନୀତି କିମ୍ବା ଭଳି କୌଣସି ନୀତି ଆଣି ନାହାନ୍ତି ମାତ୍ର ବଜାରର ପ୍ରତିକ୍ରିୟା ବଜେଟକୁ ନେଇ ନକରାତ୍ମକ। ଯାହା ଆଶ୍ଚର୍ଯ୍ୟଜନକ ରହିଥିବା କୁମାର କହିଛନ୍ତି।
