ନୂଆଦିଲ୍ଲୀ,୧୯|୭(ପିଟି)- ଦେଶର ଟ୍ରାକ୍ ଓ ଫିଲ୍ଡ କିମ୍ବଦନ୍ତୀ ପି.ଟି. ଉଷାଙ୍କୁ ଅନ୍ତର୍ଜାତୀୟ ଆସୋସିଏଶନ ଅଫ୍ ଆଥ୍ଲେଟିକ୍ସ ଫେଡେରେଶନ (ଆଇଏଏଏଫ୍)ର ଭେଟେରାନ ପିନ ଭାବେ ମନୋନୀତ କରାଯାଇଛି। ଉଷା ଭାରତର ଅନ୍ୟତମ ଶ୍ରେଷ୍ଠ ଧାବିକା। ଟ୍ରାକ୍ରେ ଚମକପ୍ରଦ କ୍ୟାରିୟର ଯୋଗୁ ତାଙ୍କୁ କୁଇନ୍ ଅଫ ଟ୍ରାକ୍ ଓ ଫିଲ୍ଡ କୁହାଯାଉଥିଲା। ୧୦୦ ମିଟର, ୨୦୦ମି., ୪୦୦ ମି. ଦୌଡ଼, ୪୦୦ ମି. ବାଧା ଦୌଡ଼ ଓ ୪ ଗୁଣା ୪୦୦ ରିଲେ ଇଭେଣ୍ଟରେ ସେ ସ୍ବର୍ଣ୍ଣ ପଦକ ଜିତିଥିଲେ। ୧୯୮୫ରେ ଜାକର୍ତ୍ତାଠାରେ ଅନୁଷ୍ଠିତ ଏସିଆନ ଗେମ୍ସରେ ବ୍ରୋଞ୍ଜ ପଦକ ଅର୍ଜନ କରିଥିଲେ। ୫୫ ବର୍ଷୀୟା ପୂର୍ବତନ ଧାବିକାଙ୍କୁ ଜାକର୍ତ୍ତାଠାରେ ଆସନ୍ତା ସେପ୍ଟେମ୍ବରରେ ହେବାକୁ ଥିବା ପୁରସ୍କାର ବିତରଣ ଉତ୍ସବକୁ ଆମନ୍ତ୍ରଣ କରାଯାଇଛି। ୫୨ତମ ଆଇଏଏଏଫ୍ କଂଗ୍ରେସ ବୈଠକ ବେଳେ ହେବାକୁ ଥିବା ପୁରସ୍କାର ବିତରଣ ଉତ୍ସବରେ ଯୋଗଦେବା ଆମନ୍ତ୍ରଣ ପାଇବା ମୋ ପାଇଁ ଖୁସିର ବିଷୟ। ଉଲ୍ଲେଖଥାଉ କି, ୧୯୮୪ ଲସ ଏଞ୍ଜେଲ୍ସ ଅଲିମ୍ପିକ୍ସରେ ପ୍ରଥମ ଭାରତୀୟ ଭାବେ ୪୦୦ ମି. ବାଧା ଦୌଡ଼ ଇଭେଣ୍ଟର ଫାଇନାଲରେ ପ୍ରବେଶ କରିବା ଉଷାଙ୍କ କ୍ୟାରିୟରର ସବୁଠୁ ସ୍ମରଣୀୟ ସଫଳତା। ସେଠାରେ ଏକ ସେକେଣ୍ଡରୁ ଆହୁରି କମ୍ ସମୟରେ ସେ ବ୍ରୋଞ୍ଜ ପଦକ ହାତଛଡ଼ା କରିଥିଲେ।
