ନୂଆଦିଲ୍ଲୀ,୨୯।୯: ଦେଶରେ ପିଆଜ ଦାମ୍ ହୁ ହୁ ହୋଇ ବଢ଼ିଚାଲିଛି। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାରଙ୍କ ପକ୍ଷରୁ ପିଆଜ ରପ୍ତାନୀ ଉପରେ ରୋକ ଲଗାଯାଇଛି। ଏପରି କରି ପିଆଜ ଦାମ୍ ନିୟନ୍ତ୍ରଣ କରିବା ଲାଗି ସରକାର ମାଷ୍ଟର ଷ୍ଟ୍ରୋକ୍ ମାରିଥିବା କୁହାଯାଉଛି। ପିଆଜର ସମସ୍ତ କିସମର ରପ୍ତାନୀ ଉପରେ ରବିବାର ପ୍ରତିବନ୍ଧକ ଲଗାଯାଇଛି। ଏନେଇ ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି ଯେ,ପିଆଜ ରପ୍ତାନୀ ନୀତିରେ ସଂଶୋଧନ କରାଯାଇଛି। ପରବର୍ତ୍ତୀ ଆଦେଶ ନ ମିଳିବା ପର୍ଯ୍ୟନ୍ତ ରପ୍ତାନୀ ଉପରେ ରୋକ ଲଗାଯାଇଥିବା ମନ୍ତ୍ରଣାଳୟ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, ଏବେ ଦେଶର ବିଭିନ୍ନ ବଜାରରେ ପିଆଜ ୫୦ରୁ ୮୦ ଟଙ୍କା ମଧ୍ୟରେ ବିକ୍ରି ହେଉଛି। ପିଆଜ ଦାମ୍ ବୃଦ୍ଧି ଯୋଗୁ ବିରୋଧୀ ସରକାରଙ୍କୁ କଡ଼ା ସମାଲୋଚନା କରିବା ଆରମ୍ଭ କରିଛନ୍ତି।
