ଭୁବନେଶ୍ୱର,୧୮ା୧୧(ବ୍ୟୁରୋ): ପାର୍ଲାମେଣ୍ଟର ଶୀତକାଳୀନ ଅଧିବେଶନ ସୋମବାରଠାରୁ ଆରମ୍ଭ ହେଉଛି। ଏହି ଅଧିବେଶନରେ ଦଳ କେଉଁ କେଉଁ ପ୍ରସଙ୍ଗ ଉପସ୍ଥାପନ କରିବ, ସେନେଇ ବିଜେଡି ପକ୍ଷରୁ ରବିବାର ସୂଚନା ଦିଆଯାଇଛି। ରାଜ୍ୟ ସଭା ସଦସ୍ୟ ତଥା ବିଜେଡି ଗଣମାଧ୍ୟମ ସଂଯୋଜକ ସସ୍ମିତ୍ ପାତ୍ର କହିଛନ୍ତି ଯେ, ପ୍ରଧାନମନ୍ତ୍ରୀ ଆବାସ ଯୋଜନା(ଗ୍ରାମୀଣ), ଜରୁରିକାଳୀନ ପାଣ୍ଠି ବାବଦକୁ ୨୦୨ କୋଟି ଟଙ୍କା ରାଜ୍ୟ ପାଇବାକୁ ବାକି ରହିଛି। ବିଭିନ୍ନ ଯୋଜନା ଏବଂ ଅନୁଦାନରେ ରାଜ୍ୟ ପାଇବାକୁ ଥିବା ୮୧୮ କୋଟି ଟଙ୍କାର ପ୍ୟାକେଜ୍ ମଧ୍ୟ ଏଯାବତ୍ ପ୍ରଦାନ କରାଯାଇନାହିଁ। ଯଥାଶୀଘ୍ର କେନ୍ଦ୍ର ଏହାକୁ ପ୍ରଦାନ କରୁ ବୋଲି ଦାବି କରାଯିବ। କେନ୍ଦ୍ରୀୟ ଯୋଜନାରେ ଫନୀ ପ୍ରଭାବିତ ଏବଂ ଅନ୍ୟ ହିତାଧିକାରୀଙ୍କୁ ସାମିଲ ସହ ଜିଓ ଟ୍ୟାଗିଂ ପାଇଁ କୁହାଯିବ। ସିବିଏସ୍ଇ ଦ୍ୱାରା କରାଯାଇଥିବା ଫି’ ବୃଦ୍ଧିକୁ ପ୍ରତ୍ୟାହାର ନେଇ ଦାବି କରାଯିବ ବୋଲି ସସ୍ମିତ୍ କହିଛନ୍ତି। ପିଡିଏସ୍ ବାବଦରେ ୨୦୧୭-୧୮ ଆର୍ଥିକ ବର୍ଷରେ କେନ୍ଦ୍ର ଓଡ଼ିଶାକୁ ୨୧୨୩ କୋଟି, ୨୦୧୮ରୁ ଗତ ସେପ୍ଟେମ୍ବର ସୁଦ୍ଧା ୧୩୪୫ କୋଟି ଟଙ୍କା ଦେବାକୁ ରହିଛି। ଏହି ଅର୍ଥ ଅବିଳମ୍ବେ ପ୍ରଦାନ ପାଇଁ ରାଜ୍ୟ ପକ୍ଷରୁ କୁହାଯିବ। ପାର୍ଲାମେଣ୍ଟ ଏବଂ ରାଜ୍ୟ ବିଧାନସଭାଗୁଡ଼ିକରେ ୩୩ ପ୍ରତିଶତ ଆସନ ମହିଳାଙ୍କ ପାଇଁ ସଂରକ୍ଷିତ କରାଯାଉ। ଏ ସମ୍ପର୍କିତ ବିଲ୍ ଗୃହରେ ଆଣିବା ସହ ଗୃହୀତ କରାଇବା ପାଇଁ ବିଜେଡି ଦାବି କରିବ। ସେହିଭଳି ସାରା ରାଜ୍ୟରେ ବ୍ୟାଙ୍କିଙ୍ଗ୍ ଏବଂ ଟେଲି ଯୋଗାଯୋଗ, ଜାତୀୟ ରାଜପଥର ଦୈର୍ଘ୍ୟ ବୃଦ୍ଧି ପାଇଁ ପଦକ୍ଷେପ ନେବା ଲାଗି କୁହାଯିବ ବୋଲି ସସ୍ମିତ୍ ସୂଚନା ଦେଇଛନ୍ତି।
ଓଡ଼ିଶାରେ ପର୍ଯ୍ୟଟନ ଭିତ୍ତିଭୂମିର ଅଭାବ ନାହିଁ। ଏହାକୁ ପର୍ଯ୍ୟଟକଙ୍କ ପ୍ରମୁଖ ପସନ୍ଦର ସ୍ଥାନ କରିବାକୁ କେନ୍ଦ୍ର ସରକାର ସମସ୍ତ ସହଯୋଗ କରିବା ଦରକାର ବୋଲି ବିଜେଡି ପକ୍ଷରୁ କୁହାଯାଇଛି। କେନ୍ଦ୍ର ଦ୍ୱାରା ଚିହ୍ନଟ କରାଯାଇଥିବା ୧୭ଟି ପର୍ଯ୍ୟଟନସ୍ଥଳୀ ମଧ୍ୟରେ ରାଜ୍ୟର ଅନୂ୍ୟନ ୨ଟି ସ୍ଥଳୀକୁ ସ୍ଥାନ ଦେବା ପାଇଁ ଦାବି କରାଯାଇଛି। ଅନୁରୂପଭାବେ ରାଜଧାନୀ ଭୁବନେଶ୍ୱରରୁ ଦୁବାଇକୁ ସିଧାସଳଖ ଅନ୍ତର୍ଜାତୀୟ ବିମାନ ଉଡ଼ାଣ ପାଇଁ ଦାବି କରାଯିବ। ଓଡ଼ିଶାର ନୌବାଣିଜ୍ୟ ପରମ୍ପରା ଅତୀତର ଗୌରବଗାଥା ବହନ କରିଥାଏ। ଏହାର ସ୍ମୃତି ବହନ କରୁଥିବା କଟକର ପ୍ରସିଦ୍ଧ ବାଲିଯାତ୍ରାକୁ ଜାତୀୟ ସାମୁଦ୍ରିକ ଐତିହ୍ୟର ମାନ୍ୟତା ଦେବା ପାଇଁ ବିଜେଡି ପକ୍ଷରୁ ଦୃଢ଼ ଦାବି କରାଯିବ ବୋଲି ସସ୍ମିତ୍ କହିଛନ୍ତି। ଅପରପକ୍ଷରେ ଓଡ଼ିଶାର ପୂର୍ବତନ ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକଙ୍କୁ ମରଣୋତ୍ତର ଭାବେ ଭାରତ ରତ୍ନ ସମ୍ମାନରେ ସମ୍ମାନିତ କରିବା ପାଇଁ ମଧ୍ୟ ବିଜେଡି ପକ୍ଷରୁ ଦାବି କରାଯିବ ବୋଲି ଜଣାପଡ଼ିଛି।
