ପାରାଦୀପ,୧୦।୧ (ସ୍ବ.ପ୍ର.): ସମଗ୍ର ରାଜ୍ୟରେ ଥିବା ୩୫ ବୃହତ୍ ରାସାୟନିକ ଦୁର୍ଘଟଣା ପ୍ରବଣ କାରଖାନା ମଧ୍ୟରୁ ପାରାଦୀପରେ ୨୫ ପ୍ରତିଶତ ଅର୍ଥାତ୍ ୮ କାରଖାନା ଅଛି। ସେହି କାରଖାନାର ସମ୍ଭାବ୍ୟ ଦୁର୍ଘଟଣା ବେଳେ ଜରୁରିକାଳୀନ ପରିଚାଳନା ପାଇଁ ହେବ ଇଓସି (ଇମର୍ଜେନ୍ସି ଅପରେଶନ୍ ସେଣ୍ଟର)। ଏହା କେବଳ ରସାୟନ ପାଇଁ ଉଦ୍ଦିଷ୍ଟ ରହିବ। ଉକ୍ତ କେନ୍ଦ୍ର ରାଜ୍ୟରେ ପ୍ରଥମ ହେବ ବୋଲି କାରଖାନା ବାଷ୍ପିତ ବିଭାଗ ପକ୍ଷରୁ କୁହାଯାଇଛି। ସ୍ଥାନୀୟ ଅତିରିକ୍ତ ଜିଲାପାଳଙ୍କ କାର୍ଯ୍ୟାଳୟରେ ଇଓସି ଆସନ୍ତା ମାର୍ଚ୍ଚ ୪ ସୁଦ୍ଧା କାର୍ଯ୍ୟକ୍ଷମ ହେବ ବୋଲି ନିଷ୍ପତ୍ତି ନିଆଯାଇଛି। ଏଥିପାଇଁ ଗୁରୁବାର ପାରାଦୀପର ରସାୟନଯୁକ୍ତ ଶିଳ୍ପ କର୍ତ୍ତୃପକ୍ଷ, କାରଖାନା ଓ ବାଷ୍ପିତ ବିଭାଗ ଏବଂ ଅତିରିକ୍ତ ଜିଲାପାଳଙ୍କ ମଧ୍ୟରେ ଆଲୋଚନା କରାଯାଇ ନିଷ୍ପତ୍ତି ନିଆଯାଇଛି। ଏହି ଇଓସିରେ ସାଟେଲାଇଟ୍ ଫୋନ୍, ହଟ୍ଲାଇନ୍, ପ୍ରତିକାରାତ୍ମକ ଯନ୍ତ୍ରପାତି ଆଦି ରହିବ। ବିପର୍ଯ୍ୟୟ ବେଳେ ୧୦ଜଣ ସେଫ୍ଟି ଅଫିସର ଏହାକୁ ପରିଚାଳନା କରିବେ। ଉକ୍ତ ଇଓସି ପାଇଁ ପାରାଦୀପର ୩ଟି ବୃହତ୍ ଶିଳ୍ପ ସଂସ୍ଥା ଆନୁଷଙ୍ଗିକ ବ୍ୟବସ୍ଥା କରିବେ। ଯଥା ପାରାଦୀପ ତୈଳ ବିଶୋଧନାଗାର ସମସ୍ତ ପ୍ରକାର ଆନୁଷଙ୍ଗିକ ପ୍ରତିକାର ଉପକରଣ ଯୋଗାଇଦେବ। ଯେଉଁଥିରେ ଆମୋନିଆ ଗ୍ୟାସ ପରିଚାଳନା ଉପକରଣ, କ୍ଲୋରିନ୍, ଆଗ୍ନିକ ଉପକରଣ ଆଦି ରହିଛି। ପିପିଏଲ୍ ଯୋଗାଯୋଗ ସାଧନ (ସାଟେଲାଇଟ ଫୋନ୍, ହଟ୍ଲାଇନ୍ ବ୍ୟବସ୍ଥା ଆଦି) ଦେବ। ଇଫ୍କୋ ଇଓସି ପାଇଁ ଭିତ୍ତିଭୂମି (ଘର ଓ ଅନ୍ୟ ସରଞ୍ଜାମ) ଦେବ। ଏହାକୁ ଆସନ୍ତା ମାର୍ଚ୍ଚ ୪ (ସେଫ୍ଟି ଦିବସ) ପୂର୍ବରୁ କାର୍ଯ୍ୟକ୍ଷମ କରାଯିବ ବୋଲି କାରଖାନା ଓ ବାଷ୍ପିତ ବିଭାଗର ସହକାରୀ ନିର୍ଦ୍ଦେଶକ ଚନ୍ଦ୍ରକାନ୍ତ ଦଳାଇ କହିଛନ୍ତି। ପାରାଦୀପରେ ଥିବା ୮ ଦୁର୍ଘଟଣା ରସାୟନ ପ୍ରବଣ କାରଖାନା ମଧ୍ୟରେ ଅଛି ଇଫ୍କୋ, ପିପିଏଲ୍, ତୈଳ ବିଶୋଧନାଗାର, ୪ଟି ଟର୍ମିନାଲ (ବିପିସିଏଲ୍, ଏଚ୍ପିସିଏଲ୍, ଇଣ୍ଡିଆନ ଅଏଲ୍, ଏଲ୍ପିଜି ଗ୍ୟାସ) ଏବଂ ପାରାଦୀପ ହରିଦାସପୁର ବୈତରଣୀ ପାଇପ ଲାଇନ ପ୍ରକଳ୍ପ। ଏହା ବ୍ୟତିରେକେ ୧୭ଟି ଆଇସ୍ ଫ୍ୟାକ୍ଟରୀ, ୩ ଚିଙ୍ଗୁଡି ପ୍ରୋସେସିଂ ପ୍ଲାଣ୍ଟ ଓ ଏସାର ଷ୍ଟିଲ (ବର୍ତ୍ତମାନର ଆର୍ସେଲର ମିତ୍ତଲ ନିପ୍ପନ ଷ୍ଟିଲ) କାରଖାନାରେ ସ୍ବଳ୍ପ ମାତ୍ରାରେ ରସାୟନ ବ୍ୟବହାର ହେଉଛି। ସେହିସବୁ ଫ୍ୟାକ୍ଟ୍ରିରେ ଥିବା ଅଭିଜ୍ଞ ଅଧିକାରୀଙ୍କୁ ବିପର୍ଯ୍ୟୟ ବେଳେ ପରିଚାଳନା ପାଇଁ ଚୟନ କରାଯିବ, ଯାହାକୁ ଜିଲା ପ୍ରଶାସନ ଓ କାରଖାନା ବାଷ୍ପିତ ବିଭାଗ ମନିଟରିଂ କରିବେ।
ସୂଚନାଯୋଗ୍ୟ, ରାଜ୍ୟରେ ସମସ୍ତ ଜିଲାପାଳଙ୍କ କାର୍ଯ୍ୟାଳୟରେ ଆପାତକାଳୀନ ପରିଚାଳନା କେନ୍ଦ୍ର ରହିଛି। ସେସବୁ ପ୍ରାକୃତିକ ବିପର୍ଯ୍ୟୟ (ବାତ୍ୟା, ବନ୍ୟା, ବର୍ଷା, ଖରା, ଶୀତ) ବେଳେ କାମରେ ଲାଗିଥାଏ। କିନ୍ତୁ ରସାୟନିକ ବିପର୍ଯ୍ୟୟ ପାଇଁ ଏହା ରାଜ୍ୟର ପ୍ରଥମ ଇଓସି ହେବ ବୋଲି ସହକାରୀ ନିର୍ଦ୍ଦେଶକ ଦଳାଇ କହିଛନ୍ତି।
