ଟୋକିଓ,୧୭।୮(ଏଏଫ୍ପି): ଟୋକିଓ ଅଲିମ୍ପିକ୍ସର ପାରାଟ୍ରାଇଥଲନର ଟେଷ୍ଟ ଇଭେଣ୍ଟର ସନ୍ତରଣ ରାଉଣ୍ଡ ଶନିବାର ବାତିଲ କରାଯାଇଛି। ଯେଉଁଠାରେ ସନ୍ତରଣ ଇଭେଣ୍ଟ ହେବାକୁ ଥିଲା, ସେଠାକାର ପାଣିରେ ଅତ୍ୟଧିକ ବ୍ୟାକ୍ଟେରିଆ ରହିଛନ୍ତି। ଅଲିମ୍ପିକ ଆୟୋଜକମାନେ ନିଜ ପ୍ରସ୍ତୁତିକୁ ପ୍ରଶଂସା କରୁଛନ୍ତି। ହେଲେ ଅତ୍ୟଧିକ ଗରମ ପ୍ରବାହ ଓ ପାଣିର ମାନ ହ୍ରାସ ଆୟୋଜକଙ୍କ ପାଇଁ ମୁଣ୍ଡବିନ୍ଧାର କାରଣ ପାଲଟିଛି। ଅନ୍ତର୍ଜାତୀୟ ଟ୍ରାଇଥଲନ ୟୁନିୟନ (ଆଇଟିୟୁ) ପକ୍ଷରୁ କରାଯାଇଥିବା ପରୀକ୍ଷାରେ ଇ-କୋଲିର ପରିମାଣ ଆବଶ୍ୟକତାଠାରୁ ଡବଲ ରହିଥିବା ଜଣାପଡ଼ିବା ପରେ ସନ୍ତରଣ ରାଉଣ୍ଡକୁ ବାତିଲ କରିବାକୁ ନିଷ୍ପତ୍ତି ନିଆଯାଇଛି। ପାରାଟ୍ରାଇଥଲନରେ ଆଥ୍ଲେଟ ଦୁଇଟି ଦୌଡ଼ ଓ ଗୋଟିଏ ସନ୍ତରଣରେ ଭାଗ ନିଅନ୍ତି। ସନ୍ତରଣ ପାଇଁ ପାଣି ଅନୁପଯୁକ୍ତ ଥିବାରୁ ଆଥ୍ଲେଟମାନେ ଡୁଆଥଲନ ଫର୍ମାଟରେ ଦୁଇଟି ଦୌଡ଼ ଓ ଗୋଟିଏ ବାଇକ ରେସରେ ଅଂଶଗ୍ରହଣ କରିବେ। ଉଲ୍ଲେଖଥାଉ କି, ଟୋକିଓଠାରେ ଚାଲିଥିବା ଅଲିମ୍ପିକ୍ ଟେଷ୍ଟ ପ୍ରତିଯୋଗିତାର ରୋଇଂ ଇଭେଣ୍ଟରେ ଅତ୍ୟଧିକ ଖରା ଯୋଗୁ ୧୨ଜଣ ପ୍ରତିଯୋଗୀ ଓ ଦେଖଣାହାରି ଅସୁସ୍ଥ ହୋଇ ପଡ଼ିଥିଲେ। ଏହାବାଦ୍ ଓଡାଇବା ବେଠାରେ ରବିବାର ମାରାଥନ ସୁଇମିଂ ଟେଷ୍ଟ ଇଭେଣ୍ଟ ହେବାକୁ ଥିବାବେଳେ ପ୍ରତିଯୋଗୀମାନେ ପାଣି ଗନ୍ଧ ଓ ଅତ୍ୟଧିକ ଗ୍ରୀଷ୍ଣ ପ୍ରବାହ ହେଉଥିବା ଅଭିଯୋଗ କରିଛନ୍ତି।
