ଭୁବନେଶ୍ୱର,୧୯।୮(ବ୍ୟୁରୋ) : ପାଟକୁରା ବିଧାନସଭା ଆସନରେ ବିଜେଡି ପ୍ରାର୍ଥୀ ସାବିତ୍ରୀ ଅଗ୍ରଓ୍ବାଲଙ୍କ ବିଜୟ ପରେ ଦ୍ୱିତୀୟ ଥର ଲାଗି ଦଳୀୟ ବୈଠକ ଅନୁଷ୍ଠିତ ହୋଇଛି। ପ୍ରଥମେ ନିର୍ବାଚନ ପରେ ନବୀନ ନିବାସରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବୈଠକ ହୋଇଥିଲା। ବିଜେଡି ରାଜ୍ୟ କାର୍ଯ୍ୟାଳୟଠାରେ ରବିବାର ଅନୁଷ୍ଠିତ ବୈଠକରେ ପାଟକୁରା ସଙ୍ଗଠନକୁ ସୁଦୃଢ଼ କରିବା ଏବଂ ବିକାଶ ଉପରେ ମୁଖ୍ୟତଃ ଅଧିକ ଗୁରୁତ୍ୱ ଦିଆଯାଇଛି। ନିର୍ବାଚନ ପରେ ବର୍ତ୍ତମାନ ଏହି ଆସନକୁ ନେଇ କ’ଣ ସବୁ ସମସ୍ୟା ରହିଛି ଏବଂ ସଙ୍ଗଠନରେ ଥିବା ଦୁର୍ବଳତା ସମ୍ପର୍କରେ ନେତାମାନେ ନିଜ ନିଜର ମତାମତ ରଖିଥିବା ଜଣାପଡିଛି। ମିଳିଥିବା ସୂଚନା ମୁତାବକ, ପାଟକୁରା ନିର୍ବାଚନରେ ବିଜେଡି ଓ ଭାଜପା ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଥିଲା। ଏହି ଆସନକୁ ନିଜ ଅକ୍ତିଆରରେ ରଖିବା ପାଇଁ ବିଜେଡି ନିଜର ସମ୍ପୂର୍ଣ୍ଣ ବଳ ଲଗାଇଦେଇଥିଲା। ମାଳମାଳ ନେତା ପାଟକୁରାରେ ରହି ଦଳର ଭୋଟ ବଢ଼ାଇବାର ଦାୟିତ୍ୱ ନେଇଥିଲେ। ଏହି ନିର୍ବାଚନମଣ୍ଡଳୀର ଭୋଟ ଦୁଇରୁ ଚାରି ଭାଗରେ ପରିଣତ ହୋଇଥିଲା, ଯାହାକି ସେହି ସମୟରେ ଦାୟିତ୍ୱ ପାଇଥିବା ନେତାମାନଙ୍କ ଦ୍ୱାରା ସଜଡା ଯାଇ ବିଜେଡି ନିର୍ବାଚନ ଲଢ଼ିଥିଲା। ସେହିସବୁ ସମସ୍ୟାର ସମ୍ପୂର୍ଣ୍ଣ ସମାଧାନ କରିବା ପାଇଁ ସବୁ ନେତା ଏକାଠି ହୋଇଥିବା ବୈଠକରେ ଉପସ୍ଥିତ ଥିବା ଜଣେ ନେତା କହିଛନ୍ତି। ଅନ୍ୟପଟେ ପାଟକୁରା ନିର୍ବାଚନର ମୁଖ୍ୟ ଦାୟିତ୍ୱ ପାଇଥିବା ନେତାମାନେ ହିଁ ବୈଠକରେ ଉପସ୍ଥିତ ଥିଲେ।
ବରିଷ୍ଠ ନେତା ତଥା ମନ୍ତ୍ରୀ ପ୍ରଫୁଲ୍ଲ ମଲିକ କହିଛନ୍ତି, ପାଟକୁରା ନିର୍ବାଚନମଣ୍ଡଳୀର କର୍ମୀମାନଙ୍କୁ ନେଇ ବୈଠକ ହୋଇଛି। ନିର୍ବାଚନ ସମୟରେ କର୍ମୀମାନେ ଅଲଗା ଅଲଗା ହୋଇ ରହିଥିଲେ, ସେତେବେଳେ ସେମାନଙ୍କୁ ଏକାଠି କରାଯାଇଥିଲା। ଆଗକୁ ସମସ୍ତେ କିପରି ଏକାଠି ହୋଇ କାର୍ଯ୍ୟ କରିବେ ସେନେଇ ଆଲୋଚନା ହୋଇଛି ବୋଲି ପ୍ରଫୁଲ୍ଲ କହିଛନ୍ତି। ପ୍ରତାପ ଦେବ କହିଛନ୍ତି, ପାଟକୁରାରେ ବିକାଶମୂଳକ କାର୍ଯ୍ୟ କରିବା ନେଇ ଆଲୋଚନା ହୋଇଛି। ମୁଖ୍ୟମନ୍ତ୍ରୀ ନିର୍ବାଚନ ପୂର୍ବରୁ ଦେଇଥିବା ପ୍ରତିଶ୍ରୁତି ଠିକ୍ ଢଙ୍ଗରେ ପାଳନ କରିବା ଦିଗରେ ସମସ୍ତେ ମତ ରଖିଛନ୍ତି। ପାଟକୁରା ବିଧାୟିକାଙ୍କୁ କର୍ମୀମାନେ ବିରୋଧ କରିବା ଘଟଣାକୁ ସେ ଖଣ୍ଡନ କରିିବା ସହିତ ଏହା ଅମୂଳକ ବୋଲି କହିଛନ୍ତି।
ସୂଚନାଯୋଗ୍ୟ ଯେ, ୨୦୧୯ ସାଧାରଣ ନିର୍ବାଚନ ସମୟରେ ପାଟକୁରା ପ୍ରାର୍ଥୀ ବେଦପ୍ରକାଶ ଅଗ୍ରଓ୍ବାଲଙ୍କ ଦେହାନ୍ତ ଯୋଗୁ ସେଠାରେ ନିର୍ବାଚନ ଘୁଞ୍ଚିଥିଲା। ଏହି ଆସନରେ ବିଜେଡି ତାଙ୍କ ସ୍ତ୍ରୀ ସାବିତ୍ରୀ ଅଗ୍ରଓ୍ବାଲଙ୍କୁ ପ୍ରାର୍ଥୀ କରିଥିଲା। ସାବିତ୍ରୀ ଅଗ୍ରଓ୍ବାଲ ଭାଜପା ପ୍ରାର୍ଥୀ ବିଜୟ ମହାପାତ୍ରଙ୍କଠାରୁ ଜିତିଥିଲେ। ନିର୍ବାଚନର କିଛିଦିନ ପରେ ସିବିତ୍ରୀଙ୍କ ବିରୋଧରେ କେତେଜଣ ଦଳୀୟ କର୍ମୀ ନବୀନ ନିବାସରେ ଅଭିଯୋଗ କରିଥିବା ଚର୍ଚ୍ଚା ହୋଇଥିଲା। ରବିବାର ବୈଠକରେ ପ୍ରତାପ ଦେବ, ମନ୍ତ୍ରୀ ଅରୁଣ ସାହୁ, ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ, ମନ୍ତ୍ରୀ ପ୍ରଫୁଲ୍ଲ ମଲିକ, ପୂର୍ବତନ ମନ୍ତ୍ରୀ ସଞ୍ଜୟ ଦାସବର୍ମା, ଅତନୁ ସବ୍ୟସଚୀ ନାୟକ ପ୍ରମୁଖ ଉପସ୍ଥିତ ଥିଲେ।
