ଭାରତରେ ଏବେ ଖେଳାଯାଉଥିବା ଟେଷ୍ଟ ମ୍ୟାଚ୍କୁ ୫ଟି ଷ୍ଟାଡିୟମରେ ଆୟୋଜନ କରିବା ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଚିନ୍ତାକରିବା ଆବଶ୍ୟକ ବୋଲି ଭାରତୀୟ ଅଧିନାୟକ ବିରାଟ କୋହଲି ଏବେ ମତ ଦେଇ ଏକ ନୂଆ ବିତର୍କ ଆରମ୍ଭ କରିଛନ୍ତି। କୋହଲିଙ୍କ ମତରେ ଛୋଟ ଛୋଟ ଷ୍ଟାଡିୟମ ଯଥା ରାଞ୍ଚି, ଧର୍ମଶାଳା ପରି ଷ୍ଟାଡିୟମରେ ଖେଳାଯାଉଥିବା ଟେଷ୍ଟ ମ୍ୟାଚ୍ରେ ଦର୍ଶକ ସଂଖ୍ୟା କମ୍ ରହୁଥିବାରୁ ଏଠାରେ ମ୍ୟାଚ୍ ଆୟୋଜନ କରିବାର କିଛି ଅର୍ଥ ନାହିଁ। ଏଣୁ ଭାରତରେ ବଡ ଷ୍ଟାଡିୟମ୍ରେ ଯେଉଁଠାରେ ଅଧିକରୁ ଅଧିକ ଦର୍ଶକ ଆସୁଛନ୍ତି ସେଠାରେ ହିଁ ଟେଷ୍ଟ ମ୍ୟାଚ୍ ଆୟୋଜନ କରାଯିବା ଆବଶ୍ୟକ। ମାତ୍ର କୋହଲିଙ୍କର ଏହି ମନ୍ତବ୍ୟକୁ ବିଭିନ୍ନ କାରଣରୁ ବିରୋଧ କରାଯାଉଛି।
ଖେଳୁଥିବା ଦେଶ ମଧ୍ୟରେ ଅଷ୍ଟ୍ରେଲିଆରେ ୫ ଏବଂ ଇଂଲଣ୍ଡର ୭ଟି ଷ୍ଟାଡିୟମ ଅଛି ଯେଉଁଠି କେବଳ ଟେଷ୍ଟ ମ୍ୟାଚ୍ ଖେଳାଯାଉଛି । ଅଷ୍ଟ୍ରେଲିଆ ଏବଂ ଇଂଲଣ୍ଡ ଗସ୍ତ କରୁଥିବା ସମସ୍ତ ଦଳ ଏହିଠାରେ ଟେଷ୍ଟମ୍ୟାଚ୍ ଖେଳିବାକୁ ବାଧ୍ୟ ହୋଇଥାନ୍ତି। କୋହଲିଙ୍କ ମତରେ ବିସିସିଆଇ ଏହି ମଡେଲକୁ ଅନୁସରଣ କରିବା ଦରକାର ଏବଂ ଏହି କ୍ରମରେ ଭାରତରେ ମଧ୍ୟ ୫ଟି ଷ୍ଟାଡିୟମରେ ହିଁ ଟେଷ୍ଟ ମ୍ୟାଚ୍ ହେବା ଦରକାର।
ମସିହାରେ ଜଗମୋହନ ଡାଲମିଆ ବିସିସିଆଇର ଦାୟିତ୍ୱରେ ଥିବା ବେଳଠାରୁ ହିଁ ୧୦ଟି ଟେଷ୍ଟମ୍ୟାଚ୍ ଖେଳାଯାଇ ପାରୁଥିବା ଷ୍ଟାଡିୟମର ସୂଚୀ ତିଆରି ହୋଇଥିଲା ଏବଂ ବିସିିସିଆଇ ଏହି ୧୦ଟି ଷ୍ଟାଡିୟମକୁ ରୋଟେଶନ ପଲିସି ଅନୁଯାୟୀ ଟେଷ୍ଟ ମ୍ୟାଚ୍ ପ୍ରଦାନ କରି ଆସୁଥିଲା। ପରେ ଅନୁରାଗ ଠାକୁର ବିସିିସିଆଇର କାଯର୍ୟଭାର ହାତକୁ ନେଲାପରେ ସେ ଟେଷ୍ଟ ମ୍ୟାଚ୍କୁ ବ୍ୟାପକ କରିବା ପାଇଁ ପଦକ୍ଷେପ ନେଲେ ଏବଂ ତାଙ୍କର ଚେଷ୍ଟା ଯୋଗଁୁ ହିଁ ରାଞ୍ଚି, ଧର୍ମଶାଳା ପରି ତଥାକଥିତ ଛୋଟ ଷ୍ଟାଡିୟମଗୁଡିକ ମ୍ୟାଚ୍ ଆୟୋଜନ କରିବାର ସୁଯୋଗ ପାଇଲେ। ଏବେ ଭାରତରେ ପ୍ରାୟ ୧୫ଟି ଷ୍ଟାଡିୟମରେ ଟେଷ୍ଟ ମ୍ୟାଚ୍ ଖେଳାଯାଉଛି। ଭାରତ ପରି ଏକ ବିଶାଳ ଦେଶରେ ପ୍ରାୟ ୫୦ରୁ ଊର୍ଦ୍ଧ୍ୱ ଷ୍ଟାଡିୟମ ଥିବାବେଳେ ଏହି ସଂଖ୍ୟା କିଛି ନୁହେଁ। ଦିନକୁ ଦିନ ଟେଷ୍ଟର ଲୋକପ୍ରିୟତା କମି କମି ଆସୁଛି। ଏହି କ୍ରମରେ ଏହାକୁ ଛୋଟ ସହରରେ ଆୟୋଜନ କଲେ ହିଁ ଏହା ଅଧିକ ଲୋକପ୍ରିୟ ହୋଇପାରିବ। ଏବେ ବି ଟେଷ୍ଟମ୍ୟାଚ୍ କ୍ରିକେଟର ସବୁଠାରୁ ଜଟିଳ ବୈଷୟିକ ଫର୍ମାଟ ହୋଇ ରହିଛି ଏବଂ ଏହି ଫର୍ମାଟ ହିଁ ଖେଳାଳିଙ୍କର ପ୍ରକୃତ ଶାରୀରିକ ଏବଂ ମାନସିକ ଦକ୍ଷତାର ପରୀକ୍ଷା ନେଇଥାଏ। ପୁଣି ଏକ ଦିବସୀୟ ଅପେକ୍ଷା ଟେଷ୍ଟ ମ୍ୟାଚ୍ର ଟିକେଟର ଦାମ କମ୍ ହୋଇଥିବାରୁ କଲେଜ ପିଲାମାନେ ମଧ୍ୟ ଏହି ଖେଳ ଦେଖିବାକୁ ଯାଇଥାନ୍ତି। ଏଣୁ ଏହାକୁ କେବଳ କିଛି ସହର ମଧ୍ୟରେ ସୀମିତ ରଖିଲେ କ୍ରିକେଟର ବିକାଶ ହୋଇପାରିବ ନାହିଁ।
ଭାରତରେ ଟିଭିରେ ମ୍ୟାଚ୍କୁ ଦେଖବା ଏକ ପରମ୍ପରାରେ ପରିବର୍ତ୍ତନ ହେଲାଣି। ଏହା କେବଳ ସହଜ ସାଧ୍ୟନୁହେଁ ଆରାମ ଦାୟକମଧ୍ୟ। ଭାରତରେ ଟିଭି ଦର୍ଶକଙ୍କ ସଂଖ୍ୟା ମଧ୍ୟ ଦିନକୁ ଦିନ ଆଶାତୀତ ଭାବେ ବୃଦ୍ଧି ପାଉଛି। ପୁଣି ଷ୍ଟାଡିୟମକୁ ଯାଇ ଟା୍ରଫିକ୍ରେ ଫସିବା, ଅଧିକ ଦାମ ଦେଇ ଷ୍ଟାଡିୟମରେ ଖାଇବା, ପିଇବା ପାଣି ପରି ମୌଳିକ ସୁବିଧା ଷ୍ଟାଡିୟମରେ ନ ପାଇବା ଓ ଶୌଚାଳୟର ଅବସ୍ଥା ମ୍ୟାଚ୍ ଆରମ୍ଭର କେଇ ଘଣ୍ଟା ପରେ ଖରାପ ହୋଇଯିବା ଆଦି କାରଣରୁ ଲୋକ ଟେଷ୍ଟ ମ୍ୟାଚ୍ ଦେଖିବାକୁ ଷ୍ଟାଡିୟମକୁ ଯାଉ ନାହାନ୍ତି। ଏ ଦିଗକୁ ଧ୍ୟାନ ନ ଦେଇ କୋହଲି କିଛି ଷ୍ଟାଡିୟମ ମଧ୍ୟରେ ଟେଷ୍ଟକୁ ସୀମିତ ରଖିବାକୁ ପ୍ରସ୍ତାବ ଦେବା ତାଙ୍କର ଅଦୂରଦର୍ଶିତାକୁ ଦର୍ଶାଉଛି।
ଭାରତରେ ଅଷ୍ଟ୍ରେଲିଆ ଏବଂ ଇଂଲଣ୍ଡ ଢାଞ୍ଚାରେ ୫ଟି ଷ୍ଟାଡିୟମରେ ଟେଷ୍ଟ ଖେଳ ହୋଇ ପାରିବ ନାହିଁ । ବରଂ ଅଧିକରୁ ଅଧିକ ଷ୍ଟାଡିୟମରେ ଟେଷ୍ଟ ମ୍ୟାଚ୍ ଆୟୋଜନ କରିବା ଦରକାର। ଅଧିକ ଦିବାରାତ୍ର ଟେଷ୍ଟ, ଟିକେଟର ଦାମ ହ୍ରାସ କରିବା,କ୍ଲବ୍ର ଖେଳାଳିମାନଙ୍କୁ ଏବଂ ସ୍କୁଲ ପିଲାମାନଙ୍କୁ ମାଗଣାରେ ଖେଳ ଦେଖିବାକୁ ସୁଯୋଗ ଦେବା ଦ୍ୱାରା ଟେଷ୍ଟ ମ୍ୟାଚର ଲୋକପ୍ରିୟତା ପୁଣି ବୃଦ୍ଧି ପାଇବ। ସେହିପରି ଷ୍ଟାଡିୟମରେ ପାର୍କିଂ, ଉନ୍ନତ ମାନର ସିଟ୍, ସ୍ବଳ୍ପ ମୂଲ୍ୟରେ ଖାଇବାକୁ ପ୍ରଦାନ କରିବା ସହ ଟିକେଟ କିଣା ବ୍ୟବସ୍ଥାକୁ ଅଧିକ ସ୍ବଚ୍ଛ,ପାରଦର୍ଶୀ ଏବଂ ସରଳ କରାଯାଇ ପାରିଲେ ଲୋକ ଟେଷ୍ଟ ଦେଖିବାକୁ ଆସିବେ। ମୋଟ ଉପରେ କେବଳ ୫ଟି ଷ୍ଟାଡିୟମରେ ଟେଷ୍ଟ ମ୍ୟାଚ୍ ଆୟୋଜନ କରିବାରେ କୋହଲିଙ୍କ ଯୁକ୍ତିରେ ତତ୍ତ୍ୱ ଏବଂ ତର୍କ ଉଭୟର ଅଭାବ ରହିଛି କହିଲେ ଅତ୍ୟୁକ୍ତି ହେବ ନାହିଁ।
ରୁଦ୍ର ପ୍ରସନ୍ନ ରଥ
