ଦାରିଙ୍ଗବାଡି,୨୬।୨(ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ଅଞ୍ଚଳରେ ଏବେ ପନିପରିବା ସଙ୍କଟ ବଢିବାରେ ଲାଗିଛି। ପୁର୍ବରୁ ଛତିଶଗଡ଼, ଝାଡ଼ଖଣ୍ଡ, ମଧ୍ୟପ୍ରଦେଶରୁ ପନିପରିବା ଆସୁଥିବା ବେଳେ ଏବେ ଗଞ୍ଜାମ ଭରସା। ପ୍ରକାଶ ଯେ, ଭୌଗୋଳିକ ସ୍ଥିତିକୁ ଦେଖିଲେ ଦାରିଙ୍ଗବାଡି ଅଞ୍ଚଳରେ ଜଳସେଚିତ ଜମି ମାତ୍ର ୧୦ ପ୍ରତିଶତ ରହିଛି। ଚାରିଆଡେ ଜଙ୍ଗଲ, ବଡ଼ ବଡ଼ ପାହାଡ଼ ରହିଥିବା ବେଳେ ଯେତିକି ବି ଚାଷ ଜମି ରହିଛି। ସେଥିରେ ଜୈବିକ ହଳଦୀ ସମେତ ଡାଲିଜାତୀୟ ଫସଲ କାନ୍ଦୁଲ, ତୈଳ ଜାତୀୟ ଫସଲ ସୋରିଷ, ତିଳା, ସୂର୍ଯ୍ୟମୁଖୀ ଫୁଲ ଓ କ୍ଷୁଦ୍ରଦାନା ଶସ୍ୟ କାଙ୍ଗୁ, କୁଏରୀ, ଜନ୍ନା, ମାଣ୍ଡିଆ ଆଦି ଚାଷ ହେଉଛି ବଳକା କିଛି ଜମିରେ ଜଳ ସୁବିଧା ରହିଛି ସେଠି ପନିପରିବା ଚାଷ କରାଯାଉଛି। କିନ୍ତୁ ଏବେ କିଛି ବର୍ଷ ହେଲା ଅଞ୍ଚଳରେ ମକା ଚାଷ ଜୋରସୋରରେ ଚାଲିଥିବା ଯୋଗୁଁ ଆଉ ପନିପରିବା ଚାଷକୁ ଗୁରୁତ୍ୱ ଦିଆଯାଉନାହିଁ। ଫଳରେ ପନିପରିବା ଚାଷ ଏବେ ଅଞ୍ଚଳରେ ହଜିବାକୁ ବସୁଛି।
ବିଶେଷ କରି ଦାରିଙ୍ଗବାଡି ଅଞ୍ଚଳରେ ଫୁଲ କୋବି, ବନ୍ଧା କୋବି, ବାଇଗଣ ଏବଂ ବିନ ଚାଷ ଅଧିକ ହେଉଥିବାବେଳେ ତାହା ଏବେ ପ୍ରାୟ ହେଉ ନ ଥିବା ଯୋଗୁ ଗଞ୍ଜାମ ଉପରେ ନିର୍ଭର କରିବାକୁ ପଡୁଛି ବୋଲି ପରିବା ବ୍ୟବସାୟୀ ଅମରେନ୍ଦ୍ର ପ୍ରଧାନ, ମିହିର ମଲିକ ପ୍ରମୁଖ କହିଛନ୍ତି। ଏବେ ଗଞ୍ଜାମରୁ ଆସୁଥିବା ପନିପରିବା ମଧ୍ୟରେ ସର୍ବାଧିକ ଦର ମଧ୍ୟରେ ଛୁଇଁ କିଲୋ ୨ ଶହ,କଲରା ୧ ଶହ, ବିନ ୭୦, କଞ୍ଚଲଙ୍କା ୧୧୦, ବାଇଗଣ ୫୦ ଭଳି ଉଚ୍ଚ ଦର ରହିଛି। ଗ୍ରାହକ ଏଥିପାଇଁ ପନିପରିବା କିଣି ଖାଇବା ମୁସ୍କିଲ ହୋଇପଡିଛି ବୋଲି ଗ୍ରାହକ ଦିଲୀପ ସାହୁ କହିଛନ୍ତି। ଏନେଇ ଜଣେ ଚାଷୀ ରମାକାନ୍ତ ପ୍ରଧାନ କୁହନ୍ତି, ଜଳ ସେଚନ ନାହିଁ ଓ ବର୍ଷା ନ ଥିବା କାରଣରୁ ପନିପରିବା ଚାଷ କରିବା ସମ୍ଭବ ହେଉ ନାହିଁ।
Dharitri – Odisha’s No.1 Odia Daily
