ନୟାଗଡ଼ ଅଫିସ,୧୮।୧୨-ନୟାଗଡ଼ ଖୁଣ୍ଟୁବନ୍ଧସ୍ଥିତ ଉପକାରାଗାରରୁ ମଙ୍ଗଳବାର ମୁକୁଳିଛନ୍ତି ବନିତା ସେଠୀ। ବନିତା ନାବାଳିକା ଥିବା ସମୟରେ ଶୁଣାଣି କରାଯାଇ ଆଜୀବନ କାରାଦଣ୍ଡ ଭୋଗ କରିଥିଲେ। ସେହିଭଳି ତାଙ୍କ ସହିତ ତାଙ୍କର ପୁଅ ମଧ୍ୟ ଜେଲରେ ରହି ଆସୁଥିଲେ।
ଘଟଣାରୁ ପ୍ରକାଶ ଯେ, ନୟାଗଡ଼ ଜିଲା ନୂଆଗାଁ ବ୍ଳକ ଉଦୟପୁର ପଞ୍ଚାୟତ ଶିଖରଗୋଛା ଗ୍ରାମର ଦୁଃଶାସନ ସେଠୀ ସୁରଟକୁ କାମ କରିବାକୁ ଯାଇଥିବାବେଳେ ସେଠାରେ ବନିତାଙ୍କ ସହିତ ତାଙ୍କର ଦେଖା ହୋଇ ପ୍ରେମ ସମ୍ପର୍କ ଗଢ଼ି ଉଠିଥିଲା। ୨୦୧୩ ମସିହାରେ ଉଭୟେ ବିବାହ କରିଥିଲେ। ବିବାହ ପରେ ବନିତାଙ୍କୁ ଦୁଃଶାସନ ଶିଖରଗୋଛା ଗ୍ରାମକୁ ନେଇ ଆସିଥିଲେ। ୨୦୧୫ ମସିହାରେ କୌଣସି କାରଣରୁ ବନିତାଙ୍କ ବଡ଼ଯାଆଙ୍କୁ ହତ୍ୟା କରାଯାଇଥିଲା। ନୂଆଗାଁ ପୋଲିସ ଏହି ଘଟଣାରେ ବନିତା ଓ ତାଙ୍କ ଶାଶୁଙ୍କୁ ୧୩ ନଭେମ୍ବର ୨୦୧୫ରେ ଗିରଫକରି କୋର୍ଟ ଚାଲାଣ କରିଥିଲା। ବନିତାଙ୍କ ଶାଶୁ ଜେଲରୁ ଜାମିନରେ ଆସିଥିଲେ। ହେଲେ ୨୯ ମାର୍ଚ୍ଚ ୨୦୧୭ରେ ନୟାଗଡ଼ ଅତିରିକ୍ତ ଜିଲା ଓ ଦୌରାଜଜ୍ ବଡ଼ ଯାଆଙ୍କୁ ମାରିଦେବା ଘଟଣାରେ ବନିତାଙ୍କୁ ଆଜୀବନ କାରାଦଣ୍ଡ ପ୍ରଦାନ କରିଥିଲେ। ପରେ ବନିତା ନୟାଗଡ଼ ଉପକାରାଗାରରେ ନିଜର ୩ ବର୍ଷର ପୁଅ ସହିତ ରହି ଆସୁଥିଲେ। ୨୦୧୭ ମସିହା ମେ’ ମାସରେ ନୟାଗଡ଼ ଜୁଭେନାଇଲ ଜଷ୍ଟିସ ବୋର୍ଡର ସଦସ୍ୟମାନେ କାରାଗାର ପରିଦର୍ଶନ କରୁଥିବା ସମୟରେ ବନିତା ନାବାଳିକା ଥିବା ଜାଣିବାକୁ ପାଇଥିଲେ। ଏହା ପରେ ଜଷ୍ଟିସ ବୋର୍ଡର ସଦସ୍ୟମାନେ ବନିତା ପାଠ ପଢ଼ିଥିବା ସୁରଟ ଅଧୀନ ଅମ୍ବାନଗର ପ୍ରାଥମିକ ବିଦ୍ୟାଳୟରୁ ତାଙ୍କର ସାର୍ଟିଫିକେଟ ସଂଗ୍ରହ କରିଥିଲେ। ସାର୍ଟିଫିକେଟରେ ତାଙ୍କର ଜନ୍ମ ତାରିଖ ୬ ଅଗଷ୍ଟ ୧୯୯୮ ରହିଥିଲା। ଶୁଣାଣି ସମୟରେ ସେ ନାବାଳିକା ଥିଲେ। ଏହା ପରେ ଜଷ୍ଟିସ ବୋର୍ଡ ପକ୍ଷରୁ ୩୦ ଜୁନ୍ରେ ଏକ ଖବରଦାତା ସମ୍ମିଳନୀ କରାଯାଇ ବନିତାଙ୍କୁ ମୁକୁଳାଇବା ପାଇଁ ହାଇକୋର୍ଟକୁ ଅନୁରୋଧ କରିଥିଲେ। ଏହା ପରେ ଉକ୍ତ ମାମଲାଟି ପଡ଼ି ରହିଥିଲା। ପରେ ବନିତାଙ୍କ ପକ୍ଷରୁ ଆଇନଜୀବୀ ସନ୍ତୋଷ କୁମାର ସାହୁ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ମଙ୍ଗଳବାର ବନିତା ଜେଲରୁ ମୁକୁଳିଥିଲେ।
