ଆଠଗଡ଼,୩୦।୪(ସ୍ବ.ପ୍ର.): କଟକ ଜିଲା ଆଠଗଡ଼ ବ୍ଲକ ଅନ୍ତର୍ଗତ ବେଣ୍ଟପଦା ଗ୍ରାମରେ ଶନିବାର ବିଳମ୍ବିତ ରାତିରେ ଏକ ଅଭାବନୀୟ ଘଟଣା ଘଟିଛି। ପୁଅ ଅପର୍ତ୍ତି ମହାନ୍ତିଙ୍କ ଲୁହାଛଡ଼ ଆକ୍ରମଣରେ ବୃଦ୍ଧ ପିତା ବାଲୁକେଶ୍ୱର ମହାନ୍ତି (୭୫)ଙ୍କର ମୃତ୍ୟୁ ଘଟିଛି। ଖବରପାଇ ଆଠଗଡ଼ ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ଅପର୍ତ୍ତିଙ୍କୁ ଅଟକରଖି ତଦନ୍ତ ଆରମ୍ଭ କରିଛି। ପୋଲିସର ପ୍ରାଥମିକ ତଦନ୍ତ ଓ ସ୍ଥାନୀୟ ଲୋକଙ୍କ ସୂଚନାନୁଯାୟୀ ଶନିବାର ସନ୍ଧ୍ୟାରେ ଅଭିଯୁକ୍ତ ଅପର୍ତ୍ତି ତାଙ୍କ ବାପା ବାଲୁକେଶ୍ୱରଙ୍କୁ ନିଶାଖାଇବା ପାଇଁ ଟଙ୍କା ମାଗିଥିଲେ। ସେ ନଦେବାରୁ, ଭୋରୁ ବାପା ବାଲୁକେଶ୍ୱର ଫୁଲ ତୋଳିବାକୁ ଉଠିବା ସମୟରେ ଅପର୍ତ୍ତି ଅତର୍କିତ ଭାବେ ଏକ ଲୁହାଛଡ଼ରେ ତାଙ୍କୁ ଆକ୍ରମଣ କରିଥିଲେ। ଘଟଣାସ୍ଥଳରେ ବାପା ବାଲୁକେଶ୍ୱରଙ୍କ ମୃତ୍ୟୁ ଘଟିଥିଲା।
