ଭୁବନେଶ୍ୱର,୨୧।୬(ବ୍ୟୁରୋ): ଓଡ଼ିଶା ଲୋକସେବା ଆୟୋଗ ଦ୍ୱାରା ଅନୁଷ୍ଠିତ ଓଡ଼ିଶା ସିଭିଲ୍ ସର୍ଭିସ୍ ପରୀକ୍ଷା-୨୦୧୭ର କୃତି ପ୍ରତିଯୋଗୀମାନଙ୍କୁ ନିଯୁକ୍ତି ପତ୍ର ପ୍ରଦାନ କରାଯାଇଛି। ଶୁକ୍ରବାର ଜୟଦେବ ଭବନଠାରେ ଆୟୋଜିତ ଏକ କାର୍ଯ୍ୟକ୍ରମରେ ୧୦୨ଜଣଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଯୁକ୍ତି ପତ୍ର ଦେଇଛନ୍ତି। ଏହି ଅବସରରେ ନବ ନିଯୁକ୍ତ ଅଫିସରମାନଙ୍କୁ ଲୋକଙ୍କ ସହ ପ୍ରତ୍ୟକ୍ଷ ସମ୍ପର୍କରେ ରହିବାକୁ ପଡ଼ିବ। ଲୋକଙ୍କ କଲ୍ୟାଣ ପାଇଁ ନିଷ୍ପତ୍ତି ନେବାକୁ ହେବ। ତେଣୁ ଧୈର୍ଯ୍ୟ ଓ ସମ୍ବେଦନଶୀଳତା ସହ ଲୋକଙ୍କ ସମସ୍ୟା ସମାଧାନ କରିବା ପାଇଁ ମୁଖ୍ୟମନ୍ତ୍ରୀ ସେମାନଙ୍କୁ ପରାମର୍ଶ ଦେଇଛନ୍ତି।
ଏହାଛଡ଼ା ମୁଖ୍ୟମନ୍ତ୍ରୀ କହିଥିଲେ, ବିଜେଡି ସରକାର ଲୋକଙ୍କ ସରକାର। ଲୋକଙ୍କ କଲ୍ୟାଣ ତାଙ୍କର ମୁଖ୍ୟ ଉଦ୍ଦେଶ୍ୟ। ତେଣୁ ଲୋକଙ୍କ ଜୀବନରେ ପରିବର୍ତ୍ତନ ଆଣିବା ଲାଗି ୩-ଟି ମନ୍ତ୍ର(ଟେକ୍ନୋଲୋଜି, ଟ୍ରାନ୍ସପେରେନ୍ସି ଓ ଟିମ୍ଓ୍ବାର୍କ)ରେ କାମ କରିବା ଉପେରେ ଗୁରୁତ୍ୱାରୋପ କରାଯାଉଥିଲା। ଏବେ ଏଥିରେ ଟ୍ରାନ୍ସଫର୍ମେଶନ୍ ଏବଂ ଟାଇମ୍ ଯୋଡ଼ି ହୋଇଯାଇଛି। ଏହି ୫-T ମନ୍ତ୍ରକୁ ଆଧାର କରି କାମ କଲେ ପ୍ରଶାସନିକ ଅଧିକାରୀମାନେ ଲୋକଙ୍କ ଆଶା ତଥା ଆକାଂକ୍ଷାକୁ ପୂରଣ କରିବା ସହ ସଫଳ ଭାବେ ଦାୟିତ୍ୱ ତୁଲାଇପାରିବେ ବୋଲି ସେ ଆଶା ପ୍ରକାଶ କରୁଥିବା କହିଛନ୍ତି।
ପ୍ରକାଶଯୋଗ୍ୟ, ଉକ୍ତ ଆୟୋଗ ଦ୍ୱାରା ଅନୁଷ୍ଠିତ ପରୀକ୍ଷାରେ ଓଡ଼ିଶା ସିଭିଲ୍ ସର୍ଭିସ ପାଇଁ ୧୦୨ ଜଣ ମନୋନୀତ ହୋଇ ନିଯୁକ୍ତି ପାଇଛନ୍ତି। ସେମାନଙ୍କ ମଧ୍ୟରେ ୪୨ଜଣ ମହିଳା ଥିବାବେଳେ ୪ଜଣ ଭିନ୍ନକ୍ଷମ ଅଛନ୍ତି। ତନ୍ମଧ୍ୟରୁ ୩୬ଜଣ ଓଏଏସ୍ରେ ଯୋଗ ଦେଇଥିବା ବେଳେ ୯ଜଣ ଓପିଏସ୍ରେ, ୨୪ଜଣ ଓଏଫ୍ଏସ୍ରେ, ୩ଜଣ ସମବାୟ ସେବା, ୨୦ଜଣ ରାଜସ୍ବ ସେବା ଓ ୧୪ଜଣ ଟିକସ ଓ ଆକାଉଣ୍ଟସ୍ ସେବାରେ ଯୋଗ ଦେଇଛନ୍ତି। କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଖାଦ୍ୟ ଯୋଗାଣ, ସମବାୟ ମନ୍ତ୍ରୀ ପ୍ରତାପ ସ୍ବାଇଁ, ରାଜସ୍ବ ମନ୍ତ୍ରୀ ସୁଦାମ ମାର୍ଣ୍ଡି, ଶକ୍ତି, ଏମ୍ଏସ୍ଏମ୍ଇ ଓ ସ୍ବରାଷ୍ଟ୍ର ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ର, ମୁଖ୍ୟ ଶାସନ ସଚିବ ଆଦିତ୍ୟ ପାଢ଼ୀ, ଉନ୍ନୟନ କମିଶନର ଅସିତ ତ୍ରିପାଠୀ ପ୍ରମୁଖ ଯୋଗଦେଇଥିଲେ।
