ମୁମ୍ବାଇ,୨୫-୩: କରୋନା ଯୋଗୁ ଭାରତୀୟ ଅର୍ଥ ବ୍ୟବସ୍ଥାକୁ କେତେ ପରିମାଣର କ୍ଷତି ହୋଇଛି ତାହାର ସମ୍ପୂର୍ଣ୍ଣ ଆକଳନ କରିବା ବର୍ତ୍ତମାନ କଷ୍ଟକର ବ୍ୟାପାର। ମାତ୍ର ଭାରତୀୟ ପୁଞ୍ଜି ବଜାରକୁ କରୋନାର ପ୍ରଭାବ ସମ୍ପୂର୍ଣ୍ଣ ଦୋହଲାଇ ଦେଇଛି। ଚଳିତ ଆର୍ଥତ୍କ ବର୍ଷରେ କରୋନା ଝଟକାରେ ପୁଞ୍ଜି ବଜାରକୁ ଯେତେ ପରିମାଣର କ୍ଷତି ହୋଇଛି ତାହା ଦେଶର ମୋଟ ଘରୋଇ ଉତ୍ପାଦ(ଜିଡିପି)ର ପ୍ରାୟ ୪୦% ହେବ। ବମ୍ବେ ଷ୍ଟକ ଏକ୍ସଚେଞ୍ଜର ସୂଚୀଭୁକ୍ତ କମ୍ପାନୀଗୁଡିକର ମୋଟ ବଜାର ପୁଞ୍ଜୀକରଣରୁ ପ୍ରାୟ ୫୨ ଲକ୍ଷ କୋଟି ଟଙ୍କା ଏହି ସମୟ ମଧ୍ୟରେ କ୍ଷତି ହୋଇଛି। ୨୦୧୯ ଡିସେମ୍ବର ୩୧ରେ ବଜାର ପୁଞ୍ଜୀକରଣ ୧୫୫.୫୩ ଲକ୍ଷ କୋଟି ଟଙ୍କା ରହିଥିବାବେଳେ ୨୦୨୦ ମାର୍ଚ୍ଚ ୨୪ରେ ୧୦୩.୬୯ ଲକ୍ଷ କୋଟି ଟଙ୍କାକୁ ଖସିଛି।
ଜାନୁୟାରୀ ୧୭ରୁ ମାର୍ଚ୍ଚ ୨୩ ମଧ୍ୟରେ ବିଏସ୍ଇର ବଜାର ପୁଞ୍ଜୀକରଣ ପ୍ରକୃତ ପକ୍ଷେ ୫୮ ଲକ୍ଷ କୋଟି ଟଙ୍କା ଖସିଛି। ୨୦୧୯-୨୦ ଆର୍ଥତ୍କ ବର୍ଷ ଭାରତର ଧାର୍ଯ୍ୟ ବିତ୍ତୀୟ ନିଅଣ୍ଟ ୭.୬୭ ଲକ୍ଷ କୋଟିର ଏହା ୭ ଗୁଣା। ଚଳିତ ଆର୍ଥତ୍କ ବର୍ଷରେ ସରକାର ଯେତେ ପରିମାଣର ଆୟ ଆଶା କରିଛନ୍ତି ବଜାରର କ୍ଷତି ତାଠାରୁ ୩ ଗୁଣ ଅଧିକ ହୋଇଥିବାବେଳେ ବଜେଟରେ ଖର୍ଚ୍ଚ ଲାଗି ଧାର୍ଯ୍ୟ ଲକ୍ଷ୍ୟର ଏହା ଦୁଇଗୁଣ।
ସୋମବାର ବଜାର ସହିଥିବା ୧୪.୨୨ ଲକ୍ଷ କୋଟି ଟଙ୍କାର କ୍ଷତି ଆଲଜେରିଆ ଦେଶର ମୋଟ ଜିଡିପିଠାରୁ ଅଧିକ। ସେନ୍ସେକ୍ସ ଇତିହାସରେ ଏହା ସବୁଠାରୁ ବଡ ଧରଣର ଦୈନିକ କ୍ଷତି ହୋଇଥିବାବେଳେ ସାରା ବିଶ୍ୱର ୧୩୦ ଦେଶର ଜିଡିପି ସହ ସମାନ ବୋଲି ଜଣାପଡିଛି। ବଜାରର ଏହି ଅବସ୍ଥା କ୍ଷୁଦ୍ର ନିବେଶକଙ୍କଠାରୁ ବଡ ନିବେଶକ ସମସ୍ତଙ୍କ ଲାଗି କ୍ଷତିକାରକ ହୋଇଛି। ଦେଶର ୧୪ ଅତିଧନୀ ଏହି ଏଭଳି ସମସ୍ୟା ଲାଗି ୫୩ ବିଲିୟନ ଡଲାର ବା ୪ ଲକ୍ଷ କୋଟି କ୍ଷତି ସହିଛନ୍ତି। ଶୀର୍ଷ ୨ ଅତିଧନୀ ମୋଟ ୨୫ ବିଲିୟନ ବା ୧.୫୮ ଲକ୍ଷ କୋଟି କ୍ଷତି ସହିଛନ୍ତି ବୋଲି ବ୍ଲୁମବର୍ଗ ବିଲିୟନେୟାର ସୂଚକାଙ୍କରେ କୁହାଯାଇଛି। ୨୦୨୦ ବର୍ତ୍ତମାନ ସୁଦ୍ଧା ମୁକେଶ ଅମ୍ବାନୀଙ୍କ ଶେୟାର ପ୍ରାୟ ୪୧% ଖସିଛି।
