ଲାଠୋର, ୩୦ା୮ (ଡି.ଏନ୍.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ପଁଚେତ୍ ସଦର ମେହେର ପଡ଼ାର ବିଭିଷଣ ମେହେରକଁର ଝି’ ପୁଷ୍ପାଞ୍ଜଳି(୨୦)। ସେ ଜନମ୍ ହେବାର ୬ ଦିନ୍ ଉତାରୁ ନାନା ରୋଗ୍ ସଂଗେ ଯୁଝୁଛନ୍। ଇଆଡ଼େ ପରିବାରଟା ଗରିବ୍ ହେଇଥିଲାବେଲେ ଉଚ ଚିକିଛା ଲାଗି ଟଁକା ପଏସାର ବଡ଼ଭାରି ଅଭାବ ରହିଛେ।
ସୂଚନା ଅନ୍ସାରେ ଲାଠୋର ମେହେରପଡ଼ାର ବିଭିଷଣ ମେହେରକଁର ପରିବାର କହେଲେ ମାଏକିନା ଖୁଦ, ଦୁଇ ଝି’ ମଞ୍ଜୁ, ପୁଷ୍ପାଞ୍ଜଳି ଆର ପୁଓ ରଘୁକେ ନେଇ ତାକର ସଁସାର। ବିଭିଷଣ ବଡ଼ ଝି’କେ ବିହା କରି ସାରିଥିଲାବେଲେ ସାନ ଝି’ ଆର ପୁଓ ମା’ବାପ୍ ସଂଗେ ରହୁଛନ୍। ପୁଷ୍ପାଞ୍ଜଳି ଜନମ୍ ହେବାର ୬ ଦିନ୍ ଉତାରୁ ତାକର ପରିସ୍ରା ଦୁଆର ବାଟେ ରକତ୍ ବାହାରିଥିଲା। ଏନ୍ତାଥି ପରିବାର ଲୋକ୍ ତାହାକୁ ନୂଆପଡ଼ା ଜିଲା ମୁଖିଆ ଡାକ୍ତରଖାନାରେ ଭରତି କରିଥିଲେ। ସେଠାନେ ଚିକିଛା ଉତାରୁ ରକତ୍ ବାହାରବାର ବଁଦ୍ ହେଇଥିଲା ସତ୍, ହେଲେ ତାକର ଦିହିମୁଡ଼ ଫୁଲି ସେ ହଲଦିଆ ପଡ଼ିଯାଇଥିଲେ। ଇ ଅବସ୍ତାରେ ମା’ବାପ୍ ପୁଷ୍ପାଞ୍ଜଳିକୁଁ ଉନିଆ ଡାକ୍ତାରଖାନାକେ ନେଇ ଦେଖେଇଥିଲେ। ଡାକ୍ତର ତାହାକୁ କାମଳ ରୋଗ୍ ହେଇଥିବାର କହି ଚିକିଛା ଆରମ୍ କରିଥିଲେ। ସେ ସମିଆରେ ଡାକ୍ତର ପୁଷ୍ପାଞ୍ଜଳିର ମଧୁମେୟ ରୋଗ୍ ଅଛେ ବଲି ବି କହିଥିଲେ। ଏନ୍ତାଥି ମା’ବାପ୍ ପେଟ୍କାଟି ଯାହା ସଁଚି କରି ରଖିଥିଲେ ଝି’ର ଚିକିଛାରେ ଖରଚ୍ କରି ନିରାଶ ହେଲେ। ପୁଷ୍ପାଞ୍ଜଳିକଁର ମଧୁମେୟ ଏନ୍ତା ହିସାବେ ବଢ଼ିକରି ରହୁଛେ ଯେ, ସେ ଦିନ୍କ ଦୁଇଥର ଇନ୍ସୁଲିନ ନେଉଛନ୍। ଏହେଦେ ପୁଷ୍ପାଞ୍ଜଳିକୁଁ ୨୦ ବଛର ହେଉଛେ। ହେଲେ ରୋଗ୍ ପରଭାବରେ ବଏସ୍ ହିସାବେ ତାକର ଶାରୀରିକ ବିକାଶ ନାଇଁ ହେବାର। ଇ ଗରିବ୍ ପରିବାର ସରକାରୀ ସାହାଯ୍ କହେଲେ ମାସିକ୍ ପାଉଥିବାର ୨୦ କେ.ଜି. ଚାଉଲ। ବିଭିଷଣ ଦୁଖ୍ସୁଖ କରି ଘରଖଁଡ଼େ କରିଛନ୍ ସତ୍, ହେଲେ ପରିବାରର ଖରଚ୍ ହିସାବେ ତାକର ରୁଜ୍ଗାର ନାଇଁହେବାର। ବିଭିଷଣ ଫିଦିନ ଗଁା ଗଁା ବୁଲି ଭିନେ ଭିନେ ଜିନିଷ ଘିନି ସେଟାକେ ବଜାରରେ ବିକ୍ରି କରୁଛନ୍। ସେଥ୍ରୁ ଯାହା ରୁଜ୍ଗାର ହେଉଛେ ତାକର ପରିବାର ଚଲବାର ସଂଗେ ଝି’ର ଉଷୋକଷା ଖରଚ୍ ତୁଲଉଛନ୍। ଘଟନା ବାବ୍ଦେ ଲାଠୋର ସରପଁଚ୍ ପ୍ରବିଣ ଅଗ୍ରଓ୍ବାଲ ଖବର ପାଇ ରୁଗୀକୁଁ ସରକାରୀ ସାହାଯ୍ ଯୁଗେଇ ଦେବାର ଲାଗି କାଗଜପତର ବ୍ଲକ ଅଫିସକେ ପଠେଇଛନ୍। ହେଲେ ଏଭ୍ତକ ସେ କେହେନ୍ସି ପରକାର ସରକାରୀ ସାହାଯ୍ ନାଇଁ ପାଏବାରଟା ନିହାତି ଦୁଖର କଥା ବଲି ସରପଁଚ୍ ନିଜେ କହିଛନ୍। ଜିଲା ପରଶାସନ ଇ ଦିଗେ ଦୁରୁଷ୍ଟି ଦେଇ ପୁଷ୍ପାଞ୍ଜଳିକୁଁ ଉଚ ଚିକିଛା ସୁବିଧା ଯୁଗେଇ ଦେବାକେ ପରିବାର ଲୋକ ନିବେଦନ କରିଛନ୍।
