ଗୌହାଟୀ,୨୫ା୮:ଜମ୍ମୁ-କଶ୍ମୀରକୁ ସ୍ବତନ୍ତ୍ର ମାନ୍ୟତା ପ୍ରଦାନ କରୁଥିବା ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ସହ ସେଠାକାର ପତାକା ରଦ୍ଦ ହୋଇଛି। ଅନ୍ୟପକ୍ଷରେ ଏବେ ନାଗାଲାଣ୍ଡ ପାଇଁ ସ୍ବତନ୍ତ୍ର ମାନ୍ୟତା ଓ ପତାକା ଦାବି ଜୋର ଧରିଛି। ସ୍ବତନ୍ତ୍ର ପତାକା ଓ ସ୍ବତନ୍ତ୍ର ସମ୍ବିଧାନ ପାଇଁ କେନ୍ଦ୍ର ରାଜି ନ ହେବା ପର୍ଯ୍ୟନ୍ତ ନାଗା ପ୍ରସଙ୍ଗର ସକାରାତ୍ମକ ସମାଧାନ ସମ୍ଭବ ନୁହେଁ। ନ୍ୟାଶନାଲିଷ୍ଟ ସୋସିଆଲିଷ୍ଟ କାଉନସିଲ ଅଫ୍ ନାଗାଲାଣ୍ଡ (ଏନ୍ଏସ୍ସିଏନ୍-ଆଇଏମ୍) ନେତା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଏହା କହିଥିବା ଜଣାପଡିଛି। ଏହି ସଂଗଠନ ୧୯୯୭ରୁ ସରକାରଙ୍କ ସହ ଶାନ୍ତିପୂର୍ଣ୍ଣ ବୁଝାମଣା ଉଦ୍ୟମ କରିଆସୁଛି। ନାଗା ସମସ୍ୟାର ସମାଧାନ ଲାଗି କେନ୍ଦ୍ର ଓ ଏନ୍ଏସ୍ସିଏନ୍-ଆଇଏମ୍ ମଧ୍ୟରେ ତିନି ବର୍ଷ ପୂର୍ବରୁ ରାଜିନାମା ସ୍ବାକ୍ଷରିତ ହୋଇଥିଲେ ହେଁ ତାହା ଏପର୍ଯ୍ୟନ୍ତ ଫଳପ୍ରଦ ହୋଇପାରି ନାହିଁ। ସରକାର କାଳକ୍ଷେପଣ ନୀତି ଗ୍ରହଣ କରୁଥିବାରୁ ନାଗା ଜନସାଧାରଣଙ୍କ ମଧ୍ୟରେ ସନ୍ଦେହ ଦେଖାଦେଇଥିବା ନେଇ ଏନ୍ଏସ୍ସିଏନ୍ ଅଧ୍ୟକ୍ଷ କ୍ୟୁ. ଟୁକୁ ଏବଂ ସାଧାରଣ ସମ୍ପାଦକ ଥୁଇଙ୍ଗାଲେଙ୍ଗ୍ ମୁଇଭା ପ୍ରଧାନମନ୍ତ୍ରୀଙ୍କୁ ପତ୍ର ଲେଖି ଜଣାଇଛନ୍ତି। ସେମାନଙ୍କର ଦୁଇଟି ମୁଖ୍ୟ ଦାବି ସ୍ବତନ୍ତ୍ର ପତାକା ଓ ସମ୍ବିଧାନ ପାଇଁ ସରକାର ରାଜି ନ ହେବା ପର୍ଯ୍ୟନ୍ତ ନାଗା ପ୍ରସଙ୍ଗର ସମାଧାନ ହୋଇପାରିବ ନାହିଁ। ଏହା ସହ ନାଗାମାନଙ୍କ ଗର୍ବ ଓ ପରିଚୟ ଗଭୀର ଭାବେ ଜଡ଼ିତ ବୋଲି ସେମାନେ ଜଣାଇଥିବା ଏକ ବିବୃତିରେ କହିଛନ୍ତି।
