ମୋନାକୋ,୧୮।୧- ବିଶ୍ୱର ଅନ୍ୟତମ କ୍ରୀଡ଼ା ଉପକରଣ ପ୍ରସ୍ତୁତକାରୀ କମ୍ପାନୀ ନାଇକ୍ର ଅତି ଉନ୍ନତର ଭାପୋରଫ୍ଲାଇ ବୁଟ୍ ଉପରେ ଲାଗିପାରେ ବ୍ୟାନ୍। ଅତି ଉନ୍ନତ ଟେକ୍ନୋଲୋଜି ବ୍ୟବହାର ହୋଇଥିବାରୁ ବୁଟ୍ର ବିକ୍ରି ବଢ଼ିଯାଇଛି। ଭାପୋରଫ୍ଲାଇ ବୁଟ୍ରେ ଅଧିକ ସ୍ପ୍ରିଙ୍ଗ୍, କାର୍ବନ ପ୍ଲେଟ୍ ଓ ଫୋମର ବ୍ୟବହାର କରାଯାଇଛି, ଯାହାକି ରନରଙ୍କ ପ୍ରତ୍ୟେକ ଷ୍ଟେପର ବ୍ୟବଧାନ ବୃଦ୍ଧି କରିବାରେ ସାହାଯ୍ୟକରେ। ଏହାକୁ ବ୍ୟବହାରକରି ଚାମ୍ପିୟନ କେନୀୟ ରନର ଇଲିଡ କିପଚୋଗ ଓ ବ୍ରିଗିଡ କୋସଗେଇ ଗତବର୍ଷ ଚମତ୍କାର ପ୍ରଦର୍ଶନ କରିଥିଲେ। କିନ୍ତୁ ଏନ୍ପିଡି ଗ୍ରୁପ୍ର ପରାମର୍ଶଦାତା ମାଟ୍ଟ ପାଓ୍ବେଲ କହିଛନ୍ତି, ବିବାଦ ଯୋଗୁ ବୁଟ୍ର ବିକ୍ରି ବଢ଼ିବ। ଭାପୋରଫ୍ଲାଇ ବୁଟ୍ ଅଧିକ ପ୍ରସ୍ତୁତ କରାଯାଇନାହିଁ। ଏଣୁ ବ୍ୟାନ୍ ହେଲେ ଆର୍ଥିକ କ୍ଷତି ହେବ ନାହିଁ। ଆମେଚର ରନରମାନେ ଏହାକୁ ଏବେ ମଧ୍ୟ ବ୍ୟବହାର କରିପାରିବେ ବୋଲି ସେ କହିଛନ୍ତି। ବିଶ୍ୱ ଆଥ୍ଲେଟିକ୍ସ ଏହି ହାଇଟେକ ବୁଟ୍କୁ ମାସ ହେଲା ପରୀକ୍ଷା କରୁଛି। ଏଣୁ ବୁଟ୍ର ହୋଲ୍ସେଲ ବିକ୍ରି ଉପରେ ବ୍ୟାନ୍ ଲଗାଯାଇପାରେ କିମ୍ବା ବୁଟ୍ରେ ବ୍ୟବହୃତ କାର୍ବନ ପ୍ଲେଟ୍ ଓ ଫୋମ ସୋଲ ଟେକ୍ନୋଲୋଜି ବ୍ୟବହାରର ସୀମା ଧାର୍ଯ୍ୟ କରାଯାଇପାରେ। ଉଲ୍ଲେଖଥାଉ, ଭାପୋରଫ୍ଲାଇ ବୁଟ୍ ବ୍ୟବହାରକରି କିପଚୋଗ ଇତିହାସରେ ପ୍ରଥମ ଥର ପାଇଁ ମାରାଥନକୁ ୨ ଘଣ୍ଟା ମଧ୍ୟରେ ଶେଷ କରିଥିଲେ। ଉକ୍ତ ବୁଟ୍ର ମୂଲ୍ୟ ୨୫୦ ଡଲାର। ଅର୍ଥାତ୍ ଭାରତୀୟ ମୁଦ୍ରାରେ ୧୭.୭ ହଜାର ଟଙ୍କାରୁ ଊର୍ଦ୍ଧ୍ୱ।
