ନୂଆଦିଲ୍ଲୀ,୨୬ା୧୦(ପି.ଟି.): ପଶ୍ଚିମବଙ୍ଗର ୩ ବିଧାନସଭା ଆସନ ଏବଂ ଉତ୍ତରାଖଣ୍ଡର ଗୋଟିଏ ଆସନ ଲାଗି ନଭେମ୍ବର ୨୫ରେ ଉପନିର୍ବାଚନ ଅନୁଷ୍ଠିତ ହେବ। ଏନେଇ ନିର୍ବାଚନ କମିଶନ ଶୁକ୍ରବାର ଘୋଷଣା କରିଛନ୍ତି। ଗତ ୨୧ ତାରିଖରେ ୧୭ ରାଜ୍ୟ ଓ ଗୋଟିଏ କେନ୍ଦ୍ରଶାସିତ ଅଞ୍ଚଳରେ ଉପନିର୍ବାଚନ ଅନୁଷ୍ଠିତ ହୋଇଥିଲାବେଳେ ଉପରୋକ୍ତ ଦୁଇ ରାଜ୍ୟ ସରକାରଙ୍କ ଅନୁରୋଧ କ୍ରମେ ସେଠାରେ ଭୋଟ ହୋଇ ନ ଥିଲା। ଉତ୍ତରାଖଣ୍ଡରେ ପଞ୍ଚାୟତ ନିର୍ବାଚନ ଥିବାରୁ ଉପନିର୍ବାଚନ ଘୁଞ୍ଚାଇବାକୁ ରାଜ୍ୟ ସରକାର ଅନୁରୋଧ କରିଥିଲେ। ସେହିପରି ପଶ୍ଚିମବଙ୍ଗ ସରକାର ଦୁର୍ଗାପୂଜା ଉତ୍ସବ ଲାଗି ଉପନିର୍ବାଚନ ସ୍ଥଗିତ ରଖିବାକୁ କହିଥିଲେ। ଉତ୍ତରାଖଣ୍ଡର ପିଥୋରାଗଡ ଏବଂ ପଶ୍ଚିମବଙ୍ଗର କାଳିଆଗଞ୍ଜ, କରିମପୁର, ଖଡ଼ଗପୁର ସଦର ଆସନ ଲାଗି ଅକ୍ଟୋବର ୩୦ରେ ବିଜ୍ଞପ୍ତି ପ୍ରକାଶ ପାଇବ। ନଭେମ୍ବର ୨୫ରେ ଭୋଟଗ୍ରହଣ ହେବାକୁ ଥିଲାବେଳେ ୨୮ରେ ଗଣତି କରାଯିବ।
