ରସାଳପୁର,୨୩।୩(ଡି.ଏନ.ଏ.)-ବାଲେଶ୍ୱର ଜିଲା ସଦର ଥାନା ଅନ୍ତର୍ଗତ ଭୀମପୁର ଗ୍ରାମରେ ଅମ୍ବିକା ନାମ୍ନୀ ଜଣେ ନବବଧୂଙ୍କ ସନ୍ଦେହଜନକ ମୃତ୍ୟୁ ଘଟିଛି। ଶାଶୁଘର ଲୋକେ ତାଙ୍କୁ ହତ୍ୟା କରି ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ମୃତଦେହକୁ ଗଡ଼ିଆରେ ପକାଇ ଏହାକୁ ଆତ୍ମହତ୍ୟା ରୂପ ଦେବା ଲାଗି ଉଦ୍ୟମ କରିଥିବା ବାପଘର ଲୋକେ ଅଭିଯୋଗ କରିଛନ୍ତି। ପୋଲିସ ଏନେଇ ଏକ ମାମଲା (ନଂ. ୯୪/୨୦) ରୁଜୁ କରି ମୃତା ମହିଳାଙ୍କ ସ୍ବାମୀଙ୍କୁ ଅଟକ ରଖି ତଦନ୍ତ କରୁଛି। ମୃତଦେହକୁ ବ୍ୟବଚ୍ଛେଦ ନିମନ୍ତେ ପଠାଇ ରିପୋର୍ଟକୁ ଅପେକ୍ଷା ରଖିଛି ପୋଲିସ । ଅନ୍ୟପକ୍ଷେ ଝିଅର ମୃତ୍ୟୁ ଖବର ପାଇ ପରିବାର ଲୋକେ ଓ ଗ୍ରାମର କେତେକ ବ୍ୟକ୍ତି ସେଠାରେ ପହଞ୍ଚି ତାଙ୍କ ସ୍ବାମୀକୁ ମାରଧର କରିବା ସହିତ ଘରର ଝରକା, ଗ୍ରୀଲ୍ ଏବଂ ଆସବାବପତ୍ର ଭଙ୍ଗାରୁଜା କରିଥିବା ଅଭିଯୋଗ ହୋଇଛି। ଏନେଇ ବାପ ଘରର ୩ ଯୁବକଙ୍କୁ ଥାନାରେ ଅଟକ ରଖାଯାଇଥିବା ପୋଲିସ କହିଛି।
ସୋମବାର ଭୋର୍ ସାଢ଼େ ୪ଟା ସମୟରେ ଅମ୍ବିକା ଘରେ ନ ଥିବା ଦେଖି ସ୍ବାମୀ ଗୌରାଙ୍ଗ ସ କସବା ଫାଣ୍ଡିକୁ ଜଣାଇଥିଲେ। ପରେ ଘର ପଛପଟ ଗଡ଼ିଆରୁ ତାଙ୍କ ମୃତଦେହ ମିଳିଥିଲା ବୋଲି ପରିବାର ଲୋକେ ଦର୍ଶାଇଛନ୍ତି। ଗତବର୍ଷ ଏପ୍ରିଲରେ ବିବାହ କରିଥିବା ଅମ୍ବିକାଙ୍କ ବାପଘର ସୋର ଥାନା ଅଞ୍ଚଳରେ ବୋଲି ପୋଲିସ ସୂଚନା ଦେଇଛି।
