ବାରଙ୍ଗ,୧୩।୮(ଡି.ଏନ୍.ଏ.): ସୋମବାର ପ୍ରାଣୀ ଉଦ୍ୟାନ ନନ୍ଦନକାନନ ପାଇଁ ଉଭୟ ଖୁସି ଓ ଦୁଃଖର ବାତାବରଣ ସୃଷ୍ଟି ହୋଇଛି। ଗୋଟିଏପଟେ ବିଶ୍ୱ ହସ୍ତୀ ଦିବସ ପାଳନ ପାଇଁ ନନ୍ଦନକାନନ ଅଧିକାରୀମାନେ ବ୍ୟସ୍ତ ଥିବାବେଳେ ଅନ୍ୟପଟେ ଏନକ୍ଲୋଜର ନଂ୧୮ରେ ନାଲି ବାଘୁଣୀ ପ୍ରିୟଙ୍କାର ମୃତ୍ୟୁ ଘଟିଛି। ମୃତ୍ୟୁ କରିଥିବା ଏହି ବାଘୁଣୀ ଅଶୋକ ଓ ତନୁଜା ଔରସରୁ ୨୫ ମାର୍ଚ୍ଚ ୨୦୦୦ରେ ଜନ୍ମଗ୍ରହଣ କରି ୧୯ବର୍ଷ ୫ମାସ ବୟସର ହୋଇଥିଲା। ଗତ୨ବର୍ଷହେବ ବୟସ୍କାଧିକ କାରଣରୁ ତା’ର ଚିକିତ୍ସା ଜାରିରହିଥିଲା। ବିଶେଷଜ୍ଞମାନଙ୍କ ପରାମର୍ଶକ୍ରମେ ପ୍ରିୟଙ୍କାର ଚିକିତ୍ସା ସତ୍ତ୍ୱେ ସୋମବାର ସାଢେ୧୦ଟାରେ ମୃତ୍ୟୁ କରିଥିଲା। ଗତ ୧ମାସ ହେବ ପ୍ରିୟଙ୍କାର ସ୍ବାସ୍ଥ୍ୟରେ କ୍ରମାଗତଭାବେ ଅବନତି ଘଟିବାରୁ ଧୀରେ ଧୀରେ ଶରୀର କ୍ଷୀଣ ହେବାସହ ଓଜନ ହ୍ରାସ ହୋଇ ଆହର କମିବାରେ ଲାଗିଥିଲା। ରବିବାରଠାରୁ ଉଠିବାର ଶକ୍ତି ହରାଇବା ସହ କ୍ୱାରେଣ୍ଟଟାଇନରେ ସେ ତଳେ ପଡିଯାଇଥିଲା। ଖବରପାଇ ନନ୍ଦନକାନନ ଡାକ୍ତରମାନେ ଯାଇ ତା’ର ଚିକିତ୍ସା କରି ସାଲାଇନ ଲଗାଇଥିଲେ ମଧ୍ୟ ବଞ୍ଚାଇବାରେ ସକ୍ଷମ ହୋଇ ନ ଥିଲେ। ନନ୍ଦନକାନନର ଅନ୍ୟତମ ଆକର୍ଷଣୀୟ ମହାବଳ ବାଘୁଣୀ ଥିଲା ପ୍ରିୟଙ୍କା। ରାଗୀସ୍ବଭାବର ଏହି ମହାବଳ ବାଘୁଣୀ ଅନ୍ୟ ଏକ ବାଘୁଣୀ ସହ ଲଢ଼େଇରେ ନିଜ ଲାଞ୍ଜଟି ହରାଇଥିଲା। ସେହିଦିନଠାରୁ ଲାଞ୍ଜଖଣ୍ଡି ନାମରେ ପରିଚିତ ପ୍ରିୟଙ୍କା ତା’ର ଜୀବନ କାଳ ମଧ୍ୟରେ ୬ଟି ଛୁଆ ଜନ୍ମ କରିଥିଲେ ମଧ୍ୟ ୫ଟି ବଞ୍ଚାଇପାରି ନ ଥିବାବେଳେ ଗୋଟିଏ ଛୁଆ କଲିକତାକୁ ଯାଇଥିବାର ଜଣାପଡିଛି। ରୋଶନ ଓ ପ୍ରିୟଙ୍କାର ପ୍ରଥମ ମିଳନରେ ୧୫ ଓ ୧୬ତାରିଖ ନଭେମ୍ବର ୨୦୧୧ରେ ୫ଟି ସନ୍ତାନ ଜନ୍ମ ନେଇଥିଲା। ସେମାନଙ୍କ ମଧ୍ୟରେ ଗୋଟିଏ ଧଳା ଓ ୪ଟି ସାଧାରଣ ରଙ୍ଗର ଛୁଆ ରହିଥିଲେ। କିନ୍ତୁ ଭାଗ୍ୟର ବିଡମ୍ବନା ଥିଲା ଅଲଗା ଏହି ନବଜାତକ ଛୁଆଜନ୍ମ ହେବାର ୪ଦିନ ନପୂରୁଣୁ ୧୮ନଭେମ୍ବରରେ ସମସ୍ତଙ୍କ ମୃତ୍ୟୁ ଘଟିଥିଲା। ଯାହାକି ଥଣ୍ଡା ଯୋଗୁ ମୃତ୍ୟୁ କରିଥିବା ନନ୍ଦନକାନନ କର୍ତ୍ତୃପକ୍ଷ କହିଥିଲେ। ଏହାକୁ ନେଇ ସେ ସମୟରେ ଚର୍ଚ୍ଚାର ବିଷୟ ହୋଇଥିଲା। ଏହି ଘଟଣାକୁ ନେଇ ପିପୁଲ ଫର ଆନିମଲ୍ସ ପକ୍ଷରୁ ନନ୍ଦନକାନନ କର୍ତ୍ତୃପକ୍ଷଙ୍କ ନାମରେ ଅଭିଯୋଗ ହୋଇଥିଲା ଓ ଘଟଣାର ତଦନ୍ତ ପାଇଁ ସିଜେଡଏର ଏକ ଟିମ ଆସିଥିଲେ। ପ୍ରିୟଙ୍କାର ଦ୍ୱିତୀୟ ଗର୍ଭସ୍ଥ ସନ୍ତାନ ଶୀଲା ୨୦୧୪ ଜାନୁୟାରୀ ୨୭ରେ ଜିରାଫ ଆଣିବା ପ୍ରତିବଦଳରେ କଲିକତା ଚିଡିଆଖାନାକୁ ଯାଇଥିଲା। ପ୍ରିୟଙ୍କାର ମୃତ୍ୟୁପରେ ନନ୍ଦନକାନନରେ ବାଘ ସଂଖ୍ୟା ହ୍ରାସ ପାଇ ୨୬ରେ ପହଞ୍ଚତ୍ଛି। ସେଥିମଧ୍ୟରେ ସାଧାରଣ ବାଘ ୫ଅଣ୍ଡିରା ଓ ୮ମାଈ, ଧଳାବାଘ ୪ଅଣ୍ଡିରା ଓ ୫ମାଈ, କଳାଲୋମଯୁକ୍ତ ବାଘ ୪ଅଣ୍ଡିରା ଥିବାର ଜଣାପଡିଛି। ସେହିପରି ୨୦୧୮ସେପ୍ଟେମ୍ବର୨୯ରେ ଜନ୍ତୁ ଅଦଳବଦଳରେ ମହୀଶୂର ଶ୍ରୀରାମଚନ୍ଦ୍ର ଜୁଲୋଜିକାଲ ପାର୍କରୁ ଆସିଥିବା ଅଣ୍ଡିରା ଧୂସର ଗଧିଆ ଏବେ କ୍ୱାରେଣ୍ଟଟାଇନରେ ରହି ମୃତ୍ୟୁସହ ସଂଗ୍ରାମ କରୁଥିବାର ଜଣାପଡିଛି।
