ଔପଦା,୧୧।୩(ଡି.ଏନ.ଏ.)- ବାଲେଶ୍ୱର ଜିଲା ଔପଦା ବ୍ଲକ ବଡ଼ଗୋପଖରୀ ପଞ୍ଚାୟତର ଦେବଗିରି ପର୍ବତମାଳା ପାଦଦେଶରେ ଅବସ୍ଥିତ ଚମ୍ପାଗଡ଼ ଠାରେ ଗତ ୧୦ ତାରିଖ ମଧ୍ୟାହ୍ନରେ ଦେବଗିରି ବିକାଶ ପରିଷଦ ଗଠନ ଲାଗି ଏକ ସାଧାରଣ ବୈଠକ ବସିଥିଲା। ବିଶିଷ୍ଟ ସାମାଜିକ କର୍ମୀ ବ୍ରଜକିଶୋର ମଲ୍ଲିକଙ୍କ ଆବାହକତ୍ୱରେ ଆୟୋଜିତ ଏହି ବୈଠକରେ ପ୍ରାୟ ଶତାଧିକ ଲୋକ ଯୋଗଦେଇ ଥିଲେ। ଦେବଗିରି ବୁଦ୍ଧ ସଂସ୍କୃତିର ବିଶିଷ୍ଟ ଗବେଷକ ସାହିତି୍ୟକ କୃଷ୍ଣଚନ୍ଦ୍ର ନାୟକ ମୁଖ୍ୟଅତିଥି ଭାବେ ଯୋଗଦେଇ ଇତିହାସର ଅନାଲୋଚିତ ଅଧ୍ୟାୟ ଉପରେ ଆଲୋକପାତ କରି ବୌଦ୍ଧ କୀର୍ତ୍ତିରାଜିର ପୁନଃଉଦ୍ଧାର ଓ ସଂରକ୍ଷଣ ଉପରେ ଗୁରୁତ୍ୱାରୋପ କରିଥିଲେ। ଏ ସମ୍ପର୍କରେ ବାଲେଶ୍ୱର ଜିଲାପାଳ ଓ ଆରକ୍ଷୀ ଅଧୀକ୍ଷକଙ୍କୁ ଯୋଗାଯୋଗ କରିବା ପାଇଁ ଆଲୋଚନା ହୋଇଥିଲା। ଶେଷରେ ଦେବଗିରି ବୁଦ୍ଧ ବିହାର ବିକାଶ ପରିଷଦ ନାମରେ ଏକ କମିଟି ଗଠନ କରାଯାଇଥିଲା। ଗବେଷକ ନାୟକ ଏହି କମିଟିର ମୁଖ୍ୟ ଉପଦେଷ୍ଟା ଥିବାବେଳେ ସମାଜିକ କର୍ମୀ ମଲ୍ଲିକ ସଂଯୋଜକ ଅଛନ୍ତି। ଅନ୍ୟମାନଙ୍କ ମଧ୍ୟରେ ନିରଞ୍ଜନ ଦାଶମହାପାତ୍ର, ଆଇନଜୀବୀ ଅନ୍ତର୍ଯ୍ୟାମୀ ସାହୁ, ସାମାଜିକ କର୍ମୀ ବନମାଳୀ ପାମୀ, ଦିବାକର ବେହେରା, ଗୟାଧର ରାଉତ, ମହେଶ୍ୱର ରାଉତ, ଅନ୍ତର୍ଯ୍ୟାମୀ ପାଢ଼ୀ, ମହେନ୍ଦ୍ର ମଲ୍ଲିକ, ରାମଚନ୍ଦ୍ର ବୁଗୁଡ଼େଇ, ଅନିରୁଦ୍ଧ ବେହେରା ପ୍ରମୁଖ କମିଟିର ସଭ୍ୟ ଭାବେ ସ୍ଥାନ ପାଇଛନ୍ତି। କମିଟି ତରଫରୁ ଚମ୍ପାଗଡ଼ସ୍ଥିତ ଉଜୁଡ଼ା ଐତିହ୍ୟର ଉଦ୍ଧାର ସହ ଏହାର ସାମଗ୍ରିକ ବିକାଶ ତଥା ଏହାକୁ ପର୍ଯ୍ୟଟନ କେନ୍ଦ୍ରର ମାନ୍ୟତା ପ୍ରଦାନ ପାଇଁ ରାଜ୍ୟ ଓ କେନ୍ଦ୍ରସରକାରଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ମୁଖ୍ୟ ଉପଦେଷ୍ଟା ଓ ସଂଯୋଜକ ପ୍ରକାଶ କରିଛନ୍ତି।
