ନୂଆଦିଲ୍ଲୀ,୭-୭: ବଜେଟରେ ଆଞ୍ଜେଲ ଟିକସ ସହ ଜଡ଼ିତ ଚିନ୍ତାକୁ ଦୂର କରାଯାଇଛି। ଏଣୁ ଷ୍ଟାର୍ଟଅପ୍ଗୁଡ଼ିକ ଏବେ ସମସ୍ତ ନିଜ କାମରେ ଲାଗିପଡନ୍ତୁ ବୋଲି କନ୍ଦ୍ରୀୟ ପ୍ରତ୍ୟକ୍ଷ ଟିକସ ବୋର୍ଡ(ସିବିଡିଟି) ଶନିବାର କହିଛି। ସିବିଡିଟି ଅଧ୍ୟକ୍ଷ ପି.ସି.ମୋଦି ଗଣମାଧ୍ୟମ ସହ ଆଲୋଚନାକାଳରେ କହିଛନ୍ତି ଯେ, ଷ୍ଟାର୍ଟଅପ୍ ସହ ଜଡ଼ିତ ସମସ୍ତ ପୁରୁଣା ବିବାଦ ଓ ପ୍ରସଙ୍ଗକୁ ବିଚାର ଆଲୋଚନା ପ୍ରକ୍ରିୟା ଜରିଆରେ ତଥା ବିଭାଗର ବରିଷ୍ଠ ଅଧିକାରୀଙ୍କ ତତ୍ତ୍ୱାବଧାନରେ ସମାଧାନ କରାଯିବ। ଶୁକ୍ରବାର ନିଜର ପ୍ରଥମ ବଜେଟ ଉପସ୍ଥାପନ କରି ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଷ୍ଟାର୍ଟଅପ୍ଗୁଡ଼ିକ ପାଇଁ ଆଞ୍ଜେଲ ଟିକସ ଓ ପ୍ରମାଣ ପ୍ରଦାନ ସଂକ୍ରାନ୍ତ ବିଷୟର ସମାଧାନ କରିଥିଲେ। ମୋଦି କହିଛନ୍ତି ଯେ, ଡିପିଆଇଆଇଟି(ଉଦ୍ୟୋଗ ଏବଂ ଆଭ୍ୟନ୍ତରୀଣ ସମ୍ପର୍କ ବିଭାଗ) ନିକଟରେ ଷ୍ଟାର୍ଟଅପ୍ ସମ୍ପର୍କିତ ଯାହା କିଛି ବିବାଦ ଅଟକି ରହିଥିଲା ଆୟକର ବିଭାଗ ସହ ଆଲୋଚନା ପରେ ସେଗୁଡ଼ିକର ସମାଧାନ କରାଯାଇସାରିଛି। ଷ୍ଟାର୍ଟଅପ୍ଗୁଡ଼ିକଙ୍କ ବିରୋଧରେ ଅଭିଯୋଗ ଅଥବା ଅବିଶ୍ୱାସ ଭଳି ପରିବେଶ ଆଉ ଦେଖିବାକୁ ମିଳିବ ନାହିଁ ବୋଲି ତାଙ୍କର ବିଶ୍ୱାସ ଥିବା ମୋଦି କହିଛନ୍ତି। ପୂର୍ବରୁ ଯେଉଁ ମାମଲାଗୁଡ଼ିକର ତଦନ୍ତ ଆରମ୍ଭ ହୋଇଛି ଅଥବା ନୋଟିସ ପଠାଯାଇଛି,ସେଗୁଡିକ ଲାଗି ସ୍ବତନ୍ତ୍ର ନିରୀକ୍ଷଣ ଅଧିକାରୀଙ୍କର ପୂର୍ବରୁ ମଞ୍ଜୁରୀ ନିଆଯାଇଛି ବୋଲି ସେ କହିଛନ୍ତି। ସୂଚନାଥାଉ କି, ଗତ ଏକ ବର୍ଷ ହେବ ଆୟକର ନୋଟିସ ମିଳିବାକୁ ନେଇ ଷ୍ଟାର୍ଟଅପ୍ଗୁଡ଼ିକ ଅଭିଯୋଗ କରିଆସୁଛନ୍ତି। ସୂଚନାଥାଉ କି, ଡିପିଆଇଆଇଟି ଅଦ୍ୟାବଧି ୧୯,୬୬୫ ଷ୍ଟାର୍ଟଅପ୍କୁ ମାନ୍ୟତା ପ୍ରଦାନ କରିଛି।
