ନୂଆଦିଲ୍ଲୀ,୧୨।୧୧:ବାଲାଂଦେଶ ବିପକ୍ଷରେ ଖେଳାଯାଇଥିବା ଶେଷ ଟି୨୦ ମ୍ୟାଚରେ ହ୍ୟାଟ୍ରିକ୍ ସହ ୬ ଉଇକେଟ ନେଇ ଭାରତ ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିବା ଦୀପକ ଚହରଙ୍କୁ ଚାରିଆଡୁ ପ୍ରଶଂସା ମିଳୁଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ମଧ୍ୟ ଚହରଙ୍କୁ ଶୁଭେଚ୍ଛା ଜଣାଇଛି। ଦୀପକ ଚହର ପ୍ରଥମ ଭାରତୀୟ କ୍ରିକେଟର ଭାବେ ଟି୨୦ରେ ହ୍ୟାଟ୍ରିକ ନେଇଥିବା ବିସିସିଆଇ ଟୁଇଟରରେ କହିଛି। ଯାହାକୁ ନେଇ ଅଲ୍ ଇଣ୍ଡିଆ ମହିଳା କଂଗ୍ରେସ ଆପତ୍ତି ଉଠାଇଛି। ଦୀପକ ଚହର ନୁହେଁ, ଭାରତୀୟ ମହିଳା କ୍ରିକେଟ ଖେଳାଳି ଏକତା ବିଷ୍ଟ୍ ପ୍ରଥମ ଭାରତୀୟ ଭାବେ ଟି-୨୦ରେ ହ୍ୟାଟ୍ରିକ୍ ନେଇଥିଲେ ବୋଲି ମହିଳା କଂଗ୍ରେସ ଟୁଇଟ୍ କରି ବିସିସିଆଇକୁ ଟ୍ରୋଲ କରିଛି। ୨୦୧୨ରେ ଏକତା ଶ୍ରୀଲଙ୍କା ବିପକ୍ଷରେ ଏହି କୃତିତ୍ୱ ହାସଲ କରିଥିଲେ ବୋଲି ଜଣାପଡିଛି। ୟୁଜର୍ସମାନେ ବିସିସିଆଇକୁ ଟ୍ରୋଲ କରିବା ଆରମ୍ଭ କରିଦେଇଛନ୍ତି।
