ବ୍ୟାଙ୍କକ୍, ୧।୮ (ପି.ଟି.)- ଅଲିମ୍ପିକ ବ୍ରୋଞ୍ଜ ପଦକ ବିଜୟିନୀ ସାଇନା ନେହ୍ବାଲ ପରାଜୟ ସହ ଏଠାରେ ଚାଲିଥିବା ଥାଇଲାଣ୍ଡ ଓପନ ବ୍ୟାଡ୍ମିଣ୍ଟନ ପ୍ରତିଯୋଗିତାରୁ ବିଦାୟ ନେଇଛନ୍ତି। ଗୁରୁବାର ମହିଳା ସିଙ୍ଗଲ୍ସ ୨ୟ ରାଉଣ୍ଡର ଏକ ମୁକାବିଲାରେ ୨୯ ବର୍ଷୀୟା ସାଇନା ୨୧-୧୬, ୧୧-୨୧, ୧୪-୨୧ ଗେମ୍ରେ ଜାପାନର ସାୟାକା ତାକାହାଶିଙ୍କ ନିକଟରୁ ହାରିଯାଇଛନ୍ତି। ବିଶ୍ୱ ମାନ୍ୟତାର ୮ମ ସ୍ଥାନରେ ରହିଥିବା ସାଇନା ୪୮ ମିନିଟ୍ ଧରି ଲଢ଼େଇ କରିଥିଲେ ମଧ୍ୟ ଶେଷରେ ନିରାଶ ହୋଇଛନ୍ତି। ସାଇନାଙ୍କ ପରାଜୟ ସହ ଏହି ସମ୍ମାନଜନକ ପ୍ରତିଯୋଗିତାର ମହିଳା ସିଙ୍ଗଲ୍ସରେ ଭାରତର ଅଭିଯାନ ଶେଷ ହୋଇଛି। ପୂର୍ବରୁ ଅନ୍ୟତମ ଭାରତୀୟ ଷ୍ଟାର୍ ଖେଳାଳି ପି.ଭି. ସିନ୍ଧୁ ଏହି ପ୍ରତିଯୋଗିତାରୁ ଓହରିଯାଇଥିଲେ। ଆଘାତଜନିତ ସମସ୍ୟା ଲାଗି ଇଣ୍ଡୋନେସିଆ ଓପନ ଓ ଜାପାନ ଓପନରେ ଅଂଶଗ୍ରହଣ କରିପାରି ନ ଥିବା ସାଇନା ଇଣ୍ଡୋନେସିଆ ମାଷ୍ଟର୍ସରେ ବିଜୟୀ ହୋଇଥିଲେ।
