ପୁରୀ ଅଫିସ, ୧ା୧୦: ଟାଉନ ଥାନା ଅଧୀନ ତେଲିସାହି ପଡ଼ିିଆରେ ଗତ ଅଗଷ୍ଟ ମାସରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ଫାଙ୍କା ଗୁଳି ଚାଳନା ଘଟଣାର ଗୋଟିଏ ପରେ ଗୋଟିଏ ଭିଡିଓ ଭାଇରାଲ ହେବାରେ ଲାଗିଛି। ପ୍ରଥମେ ପୋଲିସ ଏହାକୁ ଚତୁରତାର ସହିତ ଏଡ଼ାଇ ଯାଇଥିଲା। ମାତ୍ର ପରେ ଗତ ରବିବାର ଏହି ଘଟଣାରେ ମଦ ବ୍ୟବସାୟୀ, ହୋଟେଲ ମାଲିକ ତଥା ବିଜେଡି ନେତା ନାରାୟଣ ସାହୁ ଓରଫ ନାରୁଆଙ୍କ ସମେତ ତାଙ୍କର ୩ଜଣ ଅଙ୍ଗରକ୍ଷୀ ବବୁଲ କୁମାର, ବରୁଣ କୁମାର ଏବଂ ଦେବେନ୍ଦ୍ର କୁମାରଙ୍କୁ ଗିରଫ କରିଥିଲା। ଏବେ ପୁଣି ଦୁଇଟି ଭିଡିଓ ଭାଇରାଲ ହୋଇଛି। ଏଥିରେ ଗୁଳି ଫୁଟାଉଥିବା ଯୁବକ ଦ୍ୱୟ ନାରୁଆଙ୍କ ସମ୍ପର୍କୀୟ ବୋଲି ଜଣାପଡ଼ିଛି। ସୋମବାର ରାତିରେ ପୋଲିସ ନାରୁଆଙ୍କ ହୋଟେଲରେ ଚଢାଉ କରିଥିଲା। ଏହି ସମୟରେ ନାରୁଆଙ୍କ ପୁଅ ଖସିଯାଇଥିବା ଚର୍ଚ୍ଚା ଚାଲିଛି। ତେବେ ୨ଟି ବନ୍ଧୁକ ଜବତ କରିବା ସହ ୨ଜଣଙ୍କୁ ଧରି ଥାନାକୁ ଆଣି ଅଟକ ରଖି ଅଜ୍ଞାତ ସ୍ଥାନରେ ଜେରା କରୁଛି ପୋଲିସ। ସେହିପରି ନାରୁଆଙ୍କ ଅପରାଧ ପୃଷ୍ଠଭୂମି ସମ୍ପର୍କରେ ମଧ୍ୟ ଯାଞ୍ଚ ଚାଲିଥିବା ସୂଚନା ମିଳିଛି। ମଙ୍ଗଳବାର ଏ ନେଇ ଏସ୍ପି ଉମାଶଙ୍କର ଦାଶ କହିଛନ୍ତି, ପୁଣି ଦୁଇଟି ଭିଡ଼ିଓ ଭାଇରାଲ ହୋଇଥିବା ସୋସିଆଲ ମିଡିଆରୁ ଜଣାପଡ଼ିଛି। ଏ ସଂକ୍ରାନ୍ତରେ ତଦନ୍ତ କରାଯାଉଛି। ଅଭିଯୁକ୍ତ ଚିହ୍ନଟ ହୋଇଛନ୍ତି ଓ ଖୁବ୍ଶୀଘ୍ର ତାଙ୍କୁ ଗିରଫ କରାଯିବ।
