ତୁଡିଗଡିଆରେ ୭୭ତମ ଶହୀଦ ଦିବସ ‘ଶହୀଦଙ୍କ ତ୍ୟାଗକୁ ଯୁବପିଢି ଅନୁସରଣ କରନ୍ତୁ’

ଖଇରା, ୨୯।୯(ଡି.ଏନ.ଏ.)-ବାଲେଶ୍ୱର ଜିଲା ଖଇରା ବ୍ଲକର ରକ୍ତତୀର୍ଥ ଭାବେ ପରିଚିତ ତୁଡିଗଡିଆଠାରେ ୭୭ତମ ଶହୀଦ ଦିବସ ବିଭିନ୍ନ କାର୍ଯ୍ୟକ୍ରମ ମଧ୍ୟରେ ପାଳିତ ହୋଇଯାଇଛି। ଏହି ଅବସରରେ ଗାନ୍ଧିଜୀଙ୍କ ୧୫୦ତମ ଜୟନ୍ତୀ ସମାରୋହ ପାଳନ କରାଯାଇ ସ୍ମୃତିଚାରଣ କରାଯାଇଥିଲା। ସକାଳେ ଶହୀଦ ରଘୁ ବେହେରା, ମକର ଲେଙ୍କା ଓ କେଳୁ ସାହୁଙ୍କ ଆମତ୍କଳସ ସ୍ଥାପନ କରାଯାଇଥିଲା ା ଏହାପରେ ଶହୀଦଙ୍କ ଜନ୍ମିତ ଗ୍ରାମ ଡାଲଙ୍ଗ, ଦନ୍ତୋର, ବଧି ଓ ସ୍ବାଧୀନତା ସଂଗ୍ରାମୀ ବୈଦ୍ୟନାଥ ରାଉତଙ୍କ ଖଇରାଡିହି ଗ୍ରାମକୁ ପଦଯାତ୍ରା କରାଯାଇଥିଲା ା ପରେ ଖଇରା ଡିହି ଗ୍ରାମରେ ଶହୀଦଙ୍କ ଉଦ୍ଦେଶ୍ୟରେ ତିଳତର୍ପଣ, ଜାତୀୟ ପତାକା ଉତ୍ତୋଳନ ଏବଂ ଜିଲା ପ୍ରଶାସନ ତରଫରୁ ତୋପ ସଲାମି ଦିଆଯାଇଥିଲା। ପରେ ସାଂସ୍କୃତିକ ସମ୍ପାଦକ ଅଲେଖ ବାରିକ ଓ ସହ ସମ୍ପାଦକ କରୁଣାକର ଜେନାଙ୍କ ନେତୃତ୍ୱରେ ବ୍ଲକସ୍ତରୀୟ ବକ୍ତୃତା, ସଙ୍ଗୀତ, ନୃତ୍ୟ ପ୍ରତିଯୋଗିତା ଆୟୋଜନ କରାଯାଇଥିଲା। ଏଥିରେ ଅମର୍ତ୍ତ୍ୟ ସାହୁ, ପ୍ରତିଭା ମଲ୍ଲିକ, ପୀୟୁଷ କୁମାର ପଣ୍ଡା, ସ୍ନିଗ୍ଧାରାଣୀ ପଣ୍ଡା, କାଜଲରାଣୀ ଜେନା, ରାଧାରାଣୀ ବେହେରା, ସାଇପ୍ରଭା ଦାସ, ଶୁଭଶ୍ରୀ ଜେନା ଓ ସ୍ମୃତିରେଖା ମଲ୍ଲିକ ପ୍ରମୁଖ କୃତିତ୍ୱ ଅର୍ଜନ କରିଥିଲେ। ସନ୍ଧ୍ୟାରେ ଶହୀଦ ଜନକଲ୍ୟାଣ ପରିଷଦ ସଭାପତି ଉପେନ୍ଦ୍ର ପ୍ରସାଦ ପାଣିଗ୍ରାହୀଙ୍କ ତତ୍ତ୍ୱାବଧାନରେ ଏକ ସଭା ଅନୁଷ୍ଠିତ ହୋଇଥିଲା ା ପର୍ଯ୍ୟଟନ ସଂସ୍କୃତି ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ପୌରୋହିତ୍ୟ କରିଥିଲେ। ଭଦ୍ରକ ଏମ୍‌ପି ମଞ୍ଜୁଲତା ମଣ୍ଡଳ ମୁଖ୍ୟଅତିଥି, ସୋର ୟୁଏନ କଲେଜର ପ୍ରାଧ୍ୟାପକ ଡ ଶରତ ଚନ୍ଦ୍ର ମହାନ୍ତି ମୁଖ୍ୟବକ୍ତା, ଇଞ୍ଚୁଡି ସ୍ବାଧୀନତା ସଂଗ୍ରାମୀ ଯୁବ ସାମ୍ମୁଖ୍ୟର ସଭାପତି ସର୍ବେଶ୍ୱର ଦାସ, ଖଇରା ବ୍ଲକ ଅଧ୍ୟକ୍ଷା ଅଭିଲିପ୍ସା ସାହୁ, ଜିଲାପରିଷଦ ସଭ୍ୟା ଜୟନ୍ତୀ ମହଲା, ସରପଞ୍ଚ ତିଳୋତ୍ତମା ମଲ୍ଲିକ, ସମିତିସଭ୍ୟ ମନୋଜ ସାହୁ ପ୍ରମୁଖ ସମ୍ମାନନୀୟ ଅତିଥି ଭାବେ ଯୋଗ ଦେଇଥିଲେ। ସମ୍ପାଦକ ଉପେନ୍ଦ୍ର ପାଢୀ ବିବରଣୀ ପାଠ, ଉପସଭାପତି ବିଷ୍ଣୁମୋହନ ଶତପଥୀ ସ୍ବାଗତ ଭାଷଣ ଦେଇଥିଲେ। ଶହୀଦଙ୍କ ତ୍ୟାଗକୁ ପ୍ରତ୍ୟେକ ଯୁବପିଢି ଅନୁସରଣ କଲେ ଏହା ଜାତୀୟତାଭାବ ଜାଗ୍ରତ ପାଇଁ ପ୍ରେରଣା ଯୋଗାଇବ ବୋଲି ଅତିଥିମାନେ ପ୍ରକାଶ କରିଥିଲେ। ପ୍ରାରମ୍ଭରେ ମନ୍ତ୍ରୀ ୪୦ଲକ୍ଷ ଟଙ୍କା ବ୍ୟୟରେ ନିର୍ମିତ ଯାତ୍ରୀ ସୁବିଧା କେନ୍ଦ୍ର ଏବଂ ତୁଡିଗଡିଆ ବଜାର ଷ୍ଟ୍ରିଟଲାଇଟକୁ ଉଦ୍‌ଘାଟନ କରିଥିଲେ। ବସନ୍ତ ସାହୁ ଧନ୍ୟବାଦ ଅର୍ପଣ କରିଥିଲେ। ଶେଷରେ ଓଡିଶା ସଂସ୍କୃତି ବିଭାଗ ଆନୁକୂଲ୍ୟରେ ଓଡିଶୀ ଓ ସମ୍ବଲପୁରୀ ନୃତ୍ୟ ପ୍ରଦର୍ଶନ କରାଯାଇଥିଲା।