ଢେଙ୍କାନାଳ ଅଫିସ, ୨୮।୬- ଶିକ୍ଷାକ୍ଷେତ୍ରରେ ପଛରେ ପଡ଼ିଛି ଶିଳ୍ପସମୃଦ୍ଧ ଢେଙ୍କାନାଳ ଜିଲା। ମାଟ୍ରିକ୍ ପରୀକ୍ଷାରେ ଜିଲାର ପ୍ରଦର୍ଶନ ରାଜ୍ୟସ୍ତରରେ ଆଖିଦୃଶିଆ ହୋଇପାରିନାହିଁ। ଶିକ୍ଷା କ୍ଷେତ୍ରରେ ଲାଗି ରହିଥିବା ସମସ୍ୟାଗୁଡ଼ିକର ତ୍ୱରିତ ସମାଧାନ ହେଉନାହିଁ। ଏହାକୁ ନେଇ ଚିନ୍ତାରେ ପଡ଼ିଥିବା ଶିକ୍ଷା ବିଭାଗ ଏବେ ଏଥିରୁ ମୁକୁଳିବାର ବାଟ ଖୋଜୁଛି। ବିହାର ରାଜ୍ୟର ବାଙ୍କା ଜିଲାରେ ଶିକ୍ଷା ଭିତ୍ତିଭୂମିର ବିକାଶ ପାଇଁ କାର୍ଯ୍ୟକାରୀ ହୋଇଥିବା ‘ଉନ୍ନୟନ ବାଙ୍କା’ର ଅବିକଳ ପାଇଲଟ୍ ପ୍ରୋଜେକ୍ଟ ସମଗ୍ର ଢେଙ୍କାନାଳରେ ଲାଗୁ କରିବାକୁ ଯୋଜନା କରୁଛି ପ୍ରଶାସନ। ଏହି ପରିପ୍ରେକ୍ଷୀରେ ଶିକ୍ଷା ବିଭାଗ ପ୍ରତିନିଧି ଦଳ ବାଙ୍କା ଜିଲା ପରିଦର୍ଶନ କରି ଶିକ୍ଷା ଭିତ୍ତିଭୂମି ପରଖିଛନ୍ତି। ଜିଲାପାଳ ନିଖିଲ ପଓ୍ବନ କଲ୍ୟାଣଙ୍କ ନିର୍ଦ୍ଦେଶରେ ଜିଲା ଶିକ୍ଷାଧିକାରୀ ସୁଧାନନ୍ଦ ପରିଡ଼ାଙ୍କ ନେତୃତ୍ୱରେ ସଦର ବିଇଓ ନିତ୍ୟାନନ୍ଦ ବାରିକ, କାମାକ୍ଷାନଗର ବିଇଓ ଅଜୟ ପାତ୍ର ପ୍ରମୁଖ ଚଳିତ ମାସ ୨୨ରୁ୨୬ ତାରିଖ ଯାଏ ବାଙ୍କା ଜିଲାର ବିଭିନ୍ନ ସ୍କୁଲ ପରିଦର୍ଶନ କରିଛନ୍ତି।
ବାଙ୍କା ଜିଲାପାଳ କୁନ୍ଦନ କୁମାରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଗୁଣାତ୍ମକ ଶିକ୍ଷାର ପ୍ରଗତି ପାଇଁ ଜିଲାରେ ଆରମ୍ଭ ହୋଇଛି ପାଇଲଟ ପ୍ରୋଜେକ୍ଟ ‘ଉନ୍ନୟନ ବାଙ୍କା’। ଏହି କାର୍ଯ୍ୟକ୍ରମ ଅଧୀନରେ ପାଠପଢ଼ା ସହ ଛାତ୍ରୀଛାତ୍ରଙ୍କ ଲାଗି ସହଶିକ୍ଷା ବ୍ୟବସ୍ଥା ଗ୍ରହଣ କରାଯାଇଛି। ଆପ୍ ମାଧ୍ୟମରେ ପ୍ରତି ସ୍କୁଲକୁ ଶିକ୍ଷା ବିଭାଗ ସହିତ ଯୋଡ଼ାଯାଇଛି। ବିଭିନ୍ନ ସମସ୍ୟାର ତୁରନ୍ତ ସମାଧାନ କରାଯାଉଛି। ଏହାକୁ ପ୍ରଧାନମନ୍ତ୍ରୀ ଏବଂ ରାଜ୍ୟର ମୁଖ୍ୟମନ୍ତ୍ରୀ ପ୍ରଶଂସା କରିଛନ୍ତି। ବାଙ୍କାରେ ପରୀକ୍ଷାମୂଳକ ଭାବେ ଆରମ୍ଭ ହୋଇଥିବା ଏହି କାର୍ଯ୍ୟକ୍ରମ ବିହାର ରାଜ୍ୟର ଅନ୍ୟ ୩୮ ଜିଲାରେ କାର୍ଯ୍ୟକାରୀ ହେବ ବୋଲି ନିଷ୍ପତ୍ତି ନିଆଯାଇଛି। ଜିଲା ଶିକ୍ଷା ବିଭାଗ ଅଧିକାରୀମାନେ ଉକ୍ତ ପାଇଲଟ ପ୍ରୋଜେକ୍ଟ ସମ୍ପର୍କରେ ଜ୍ଞାନ ଆହରଣ କରିଛନ୍ତି। ଖୁବ୍ଶୀଘ୍ର ଢେଙ୍କାନାଳରେ ଏହି ବ୍ୟବସ୍ଥା ଆରମ୍ଭ କରାଯିବାକୁ ଯୋଜନା କରାଯାଉଛି ବୋଲି ଜିଲା ଶିକ୍ଷା ଅଧିକାରୀ ସୂଚନା ଦେଇଛନ୍ତି ା
