ଢେଙ୍କାନାଳ ଅଫିସ, ୨ା୭ ଢେଙ୍କାନାଳ ଡାକମଣ୍ଡଳ ପକ୍ଷରୁ ମୁଖ୍ୟ ଡାକଘର ପରିସରରେ ସୋମବାର ଡିଜିଟାଲ ଇଣ୍ଡିଆ ଆନିଭର୍ସାରୀ ପାଳିତ ହୋଇଯାଇଛି। ଡାକମଣ୍ଡଳ ଅଧୀକ୍ଷକ ବିପିନ ବିହାରୀ ମହାନ୍ତି, ପ୍ରଧାନ ଡାକପାଳ ପୂର୍ଣ୍ଣଚନ୍ଦ୍ର ଶୁକ୍ଳା, ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ ବରିଷ୍ଠ ପରିଚାଳକ ମହେଶ ନାୟକଙ୍କ ସମେତ ବହୁ ଡାକ କର୍ମଚାରୀ, ଜନସାଧାରଣ ଉପସ୍ଥିତ ଥିଲେ।
୨୦୧୫ ଜୁଲାଇ ୧ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱାରା ନୂଆଦିଲ୍ଲୀରେ ଡିଜିଟାଲ ଇଣ୍ଡିଆର ଶୁଭାରମ୍ଭ ହୋଇଥିଲା। ଏହାପରେ ଡାକ ବିଭାଗରେ ବ୍ୟାପକ ଆଧୁନିକୀକରଣ ହୋଇଛି। ଡାକଘରେ କୋର ବ୍ୟାଙ୍କିଙ୍ଗ୍ ସୁବିଧା, ଡାକ ଜୀବନବୀମା କମ୍ପ୍ୟୁଟରୀକରଣ, ସ୍ମାର୍ଟଫୋନ ଜରିଆରେ ଚିଠିପତ୍ର ବଣ୍ଟନ, ଅନ୍ଲାଇନ ଟ୍ରାଞ୍ଜାକ୍ସନ ସୁବିଧା ମିଳୁଛି। ଡିଜିଟାଲ ଆଡଭାନ୍ସମେଣ୍ଟ ଅଫ୍ ରୁରାଲ ପୋଷ୍ଟ ଅଫିସ୍ ଫର୍ ନିଉ ଇଣ୍ଡିଆ (ଦର୍ପଣ) ପ୍ରୋଜେକ୍ଟ ଡିଜିଟାଲ ଇଣ୍ଡିଆର ଆଉ ଗୋଟିଏ ପଦକ୍ଷେପ। ଢେଙ୍କାନାଳ ଡାକମଣ୍ଡଳ ଅଧୀନ ୫୦ ଉପ ଡାକଘର, ୪୧୯ ଶାଖା ଡାକଘର ଏଥିରେ ଅନ୍ତର୍ଭୁକ୍ତ ହୋଇଛି। ଏହାଦ୍ୱାରା ଡାକସେବା ଅଧିକ ସୁଗମ ହୋଇଛି। ଡାକମଣ୍ଡଳ ଅଧୀନ ଢେଙ୍କାନାଳ, ଅନୁଗୋଳ ଜିଲା ଗ୍ରାମାଞ୍ଚଳର ଲୋକମାନେ ‘ଦର୍ପଣ’ ଦ୍ୱାରା ଟଙ୍କା ପଇସା ନେଣଦେଣ, ବୀମାରାଶି ପଇଠ ଏବଂ ଚିଠିପତ୍ର ଆଦାନ ପ୍ରଦାନ ପାରଦର୍ଶିତାର ସହ କରିପାରୁଛନ୍ତି।
ଡାକଘରେ ଖାତାଗୁଡ଼ିକ ମଧ୍ୟ ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ ସହିତ ସଂଯୋଗ କରାଯାଇପାରୁଛି। ଗ୍ରାହକମାନେ ଏନ୍ଇଏଫ୍ଟି, ଆର୍ଟିଜିଏସ୍, ମୋବାଇଲ ରିଚାର୍ଜ, ଜଳକର ଦେୟ, ବିଦ୍ୟୁତ ଦେୟ ସହିତ ଅନ୍ୟ ବ୍ୟାଙ୍କ ଖାତାକୁ ମଧ୍ୟ ଟଙ୍କା ପ୍ରେରଣ କରିପାରୁଛନ୍ତି ବୋଲି ସୂଚନା ଦିଆଯାଇଥିଲା। ବ୍ୟବସାୟ କାର୍ଯ୍ୟନିର୍ବାହୀ ଦୀପ୍ତିରଞ୍ଜନ ସାମନ୍ତ କାର୍ଯ୍ୟକ୍ରମ ପରିଚାଳନା କରିଥିବାବେଳେ ଡାକମଣ୍ଡଳ କାର୍ଯ୍ୟାଳୟ ପର୍ଯ୍ୟବେକ୍ଷକ ସୁବୋଧ ଶତପଥୀ ସହଯୋଗ କରିଥିଲେ।
