ଭୁବନେଶ୍ୱର,୧୬।୭: ମୁମ୍ବାଇରେ ଚାଲୁଥିବା ଟ୍ରେନ୍ଗୁଡ଼ିକରେ ଯାତ୍ରୀଙ୍କୁ କରୋନା ଭାଇରସ୍ ସହ ଲଢିବାର ଏକ ସାଧନ ଉପଲବ୍ଧ ହେବ। ଏହି ଜୋନରେ ଟ୍ରେନ୍ଗୁଡିକରେ ଯାତ୍ରୀଙ୍କ ଲାଗି ଫ୍ରି ହ୍ୟାଣ୍ଡ ସାନିଟାଇଜର ରହିବ। ରେଳଯାତ୍ରୀ ଓ ରେଳ କର୍ମଚାରୀମାନଙ୍କ ମଧ୍ୟରେ ଯାତ୍ରା ସମୟର ସ୍ବଚ୍ଛତାର ପ୍ରସାର ପାଇଁ ଭାରତୀୟ ରେଳର କେନ୍ଦ୍ରୀୟ ରେଳଜୋନ୍ ସହିତ ଗୋଦ୍ରେଜ କଞ୍ଜ୍ୟୁମର ପ୍ରଡକ୍ଟ ସହଯୋଗିତା ସ୍ଥାପନ ଦ୍ୱାରା ଲୋକଙ୍କୁ ଏଭଳି ସୁବିଧା ଉପଲବ୍ଧ ହେବ। ଏହି ସମ୍ପର୍କରେ ମୁମ୍ବାଇ ଡିଭିଜନ, ସେଣ୍ଟ୍ରାଲ ରେଲ୍ୱେର ଡିସିଏମ୍ ଗୌରବ ଝା କହିଛନ୍ତି ଯେ, ଗୋଦ୍ରେଜ ପ୍ରୋଟେକ୍ଟ ସହ ମିଳିତ ଭାବରେ ଏହି ସଚେତନତା ଅଭିଯାନ ସହ ସେଣ୍ଟ୍ରାଲ ରେଲ୍ୱେର ଯାତ୍ରୀ ଓ କର୍ମଚାରୀଙ୍କ ସୁରକ୍ଷା ଓ ସ୍ବାସ୍ଥ୍ୟ ପ୍ରତି ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରାଯାଇଛି। ଏହା ଏକ ସ୍ବତନ୍ତ୍ର ଅଭିଯାନ ଯାହା ଜରିଆରେ ସ୍ବଚ୍ଛତା ଓ ସଚେତନତା ବୃଦ୍ଧି ଏବଂ କେତେକ ନିର୍ଦ୍ଦିଷ୍ଟ ଟଚ୍ ପଏଣ୍ଟରେ ଉପଯୋଗୀ ସମାଧାନ ପ୍ରଦାନ କରିବାକୁ ଲକ୍ଷ୍ୟ ରଖାଯାଇଛି। ଏହି ଅବସରରେ ଭାରତ ଓ ସାର୍କ, ଗୋଦ୍ରେଜ୍ କଞ୍ଜୁମର ପ୍ରଡକ୍ଟ ଲିମିଟେଡ୍ (ଜିସିପିଏଲ୍)ର ସିଇଓ, ସୁନୀଲ କଟାରିଆ କହିଛନ୍ତି ଯେ,ବ୍ୟକ୍ତିଗତ ଓ ଗୃହ ସ୍ବଚ୍ଛତା ବର୍ଗ ଜରିଆରେ ସ୍ବଚ୍ଛତାକୁ ନେଇ ଗ୍ରାହକଙ୍କ ମନରେ ରହିଥିବା ଚିନ୍ତାକୁ ଗୋଦ୍ରେଜ ୍ପ୍ରୋଟେକ୍ଟ ଦୂରକରିବାକୁ ଚାହୁଁଛି। ଏହି କାର୍ଯ୍ୟକ୍ରମରେ ଲୋକଙ୍କୁ ମାଗଣା ହ୍ୟାଣ୍ଡ ସାନିଟାଇଜର ବଣ୍ଟନ, ସାନିଟାଇଜ କରିବା ଭଳି ଅନ୍ୟ ପଦକ୍ଷେପ ହାତକୁ ନିଆଯିବ ବୋଲି କମ୍ପାନୀ ପକ୍ଷରୁ ସୂଚନା ରହିଛି।
