ନୂଆଦିଲ୍ଲୀ,୮-୯: ଟ୍ରାଫିକ ନିୟମ ଭାଙ୍ଗିବା ଯୋଗୁ ଭାରି ଜରିମାନା ଦେଇ ଲୋକେ ତ୍ରାହି ତ୍ରାହି ଡାକ ଛାଡ଼ୁଥିବା ବେଳେ ସରକାର ଆଉ ଏକ ଝଟକା ଦେବାକୁ ଯାଉଛନ୍ତି। ଆଗାମୀ ଦିନରେ ଗାଡ଼ି ବୀମା ପଲିସିକୁ ଟ୍ରାଫିକ ନିୟମ ଉଲ୍ଲଂଘନ ସହ ଯୋଡିବାକୁ ସରକାରୀ ସ୍ତରରେ ଉଦ୍ୟମ ଆରମ୍ଭ ହୋଇଛି। ଅର୍ଥାତ୍ ବର୍ତ୍ତମାନ ଟ୍ରାଫିକ ନିୟମ ଉଲ୍ଲଂଘନ କଲେ ପରବର୍ତ୍ତୀ ପର୍ଯ୍ୟାୟରେ ଗାଡ଼ିର ଇନ୍ସ୍ୟୁରାନ୍ସ କରିବା ବେଳେ ତାଙ୍କ ଠାରୁ ଅଧିକ ମାତ୍ରାରେ ବୀମା ପ୍ରିମିୟମ ଆଦାୟ କରାଯିବ। କେନ୍ଦ୍ର ସରକାରଙ୍କ ନିର୍ଦ୍ଦେଶକ୍ରମେ ବୀମା ନିୟାମକ ଏବଂ ବିକାଶ ପ୍ରାଧିକରଣ(ଆଇଆର୍ଡିଏଆଇ) ଏକ ୯ ଜଣିଆ କାର୍ଯ୍ୟକାରୀ କମିଟି ଗଠନ କରିଛି। ଏଥିରେ ଦିଲ୍ଲୀ ପୋଲିସ, ଆଇଆର୍ଡିଏଆଇ, ଇନ୍ସ୍ୟୁରାନ୍ସ ଇନ୍ଫର୍ମେଶନ ବ୍ୟୁରୋ ଅଫ୍ ଇଣ୍ଡିଆ ଏବଂ ପ୍ରମୁଖ ଜେନେରାଲ ଇନ୍ସ୍ୟୁରାନ୍ସ କମ୍ପାନୀର ମୁଖ୍ୟମାନଙ୍କୁ ସାମିଲ କରାଯାଇଛି। ଗାଡ଼ି ଇନ୍ସ୍ୟୁରାନ୍ସ ପଲିସିକୁ ଟ୍ରାଫିକ୍ ନିୟମ ଉଲ୍ଲଂଘନ ସହ ଯୋଡିବା ନେଇ ଏହି କମିଟି ସରକାରଙ୍କୁ ସୁପାରିସ୍ କରିବ। ଏଥିପାଇଁ ଏହାକୁ ୨ ମାସ ସମୟ ଦିଆଯାଇଛି।
ଦିଲ୍ଲୀରୁ ଆରମ୍ଭ ହେବ ପାଇଲଟ ପ୍ରକଳ୍ପ
ଆଇଆର୍ଡିଏଆଇ ପକ୍ଷରୁ ଶୁକ୍ରବାର ଜାରି ଏକ ନିର୍ଦ୍ଦେଶ ମୁତାବକ ବୀମା କମ୍ପାନୀଗୁଡ଼ିକ ପ୍ରିମିୟମ ବୃଦ୍ଧି କରିବାର ଫର୍ମୁଲାର କ୍ରିୟାନ୍ବୟନ ଲାଗି ରାଜଧାନୀ ଦିଲ୍ଲୀରେ ଏକ ପାଇଲଟ ପ୍ରକଳ୍ପ ହାତକୁ ନେବେ। କମିଟି ପକ୍ଷରୁ ପ୍ରଦତ୍ତ ସୁପାରିସ୍ ଭିତ୍ତିରେ ଗାଡି ବାବଦ ଜରିମାନା ପ୍ରଦାନ କରା ନ ଗଲେ ନୂଆ ବୀମା ପଲିସି ନେବା ବେଳେ ଗାଡ଼ି ମାଲିକଙ୍କ ଠାରୁ ଏହି ଅର୍ଥକୁ ବୀମା ପ୍ରିମିୟମ ଆକାରରେ ଆଦାୟ କରାଯିବ। ଟ୍ରାଫିକ ନିୟମ ଉଲ୍ଲଂଘନକୁ ବୀମା ପଲିସି ସହ ଯୋଡାଯିବା ଯୋଗୁ ସଡ଼କ ଦୁର୍ଘଟଣା ଅନେକାଂଶରେ କମିବ। ଦିଲ୍ଲୀରେ ଏହି ପ୍ରକଳ୍ପ ସଫଳ ହେଲେ ଏହାକୁ ପରବର୍ତ୍ତୀ ପର୍ଯ୍ୟାୟରେ ସାରା ଦେଶରେ ଲାଗି କରାଯିବ।
ବଦଳିବ ଡ୍ରାଇଭରଙ୍କ ବ୍ୟବହାର
ଆଇଆର୍ଡିଏଆଇ ନିର୍ଦ୍ଦେଶ ଅନୁଯାୟୀ, କେନ୍ଦ୍ର ସରକାର ମେଟ୍ରୋ ତଥା ସ୍ମାର୍ଟ ସହରରେ ଇଣ୍ଟେଲିଜେଣ୍ଟ ଟ୍ରାଫିକ୍ ମ୍ୟାନେଜମେଣ୍ଟ ସିଷ୍ଟମ ଉପରେ ଜୋର୍ ଦେଉଛନ୍ତି। ଏହାକୁ ଦୃଷ୍ଟିରେ ରଖି ଟ୍ରାଫିକ୍ ନିୟମ ଉଲ୍ଲଂଘନରେ ସାମିଲ ଗାଡ଼ିର ପଞ୍ଜୀକୃତ ମାଲିକ/ଡ୍ରାଇଭରଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ସେଥିଲାଗି ଅଟୋମେଟେଡ ଟ୍ରାଫିକ୍ ଏନ୍ଫୋର୍ସମେଣ୍ଟ ତଥା ଇ-ଚାଲାଣ ବ୍ୟବସ୍ଥା ଆରମ୍ଭ ହୋଇଛି। ସଡ଼କ ଦୁର୍ଘଟଣା କମାଇବା ଉଦ୍ଦେଶ୍ୟରେ ବୀମା ପ୍ରିମିୟମକୁ ଟ୍ରାଫିକ ନିୟମ ଉଲ୍ଲଂଘନ ସହ ଯୋଡାଯିବ।
