ମେଲବୋର୍ନ,୧୭।୫(ପି.ଟି.): କୋଭିଡ-୧୯ ମହାମାରୀ କାରଣରୁ ଚଳିତ ବର୍ଷ ଅଷ୍ଟ୍ରେଲିଆରେ ଆୟୋଜନ ହେବାକୁଥିବା ଟି୨୦ ବିଶ୍ୱକପ୍ ବାତିଲ ହେବା ସମ୍ଭାବନା ସୃଷ୍ଟି ହୋଇଛି। ଯଦି ଏହି ମେଗା ଇଭେଣ୍ଟ ବାତିଲ ହୁଏ ତେବେ, ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଆୟୋଜନ ପାଇଁ ବାଟ ଫିଟିବ ବୋଲି ପୂର୍ବତନ ଅଷ୍ଟ୍ରେଲିଆ ଅଧିନାୟକ ମାର୍କ ଟେଲର କହିଛନ୍ତି। ଟି୨୦ ବିଶ୍ୱକପ୍ ଅଷ୍ଟ୍ରେଲିଆରେ ଅକ୍ଟୋବର ୧୮ରୁ ଆରମ୍ଭ ହୋଇ ନଭେମ୍ବର ୧୫ରେ ଶେଷ ହେବାର କାର୍ଯ୍ୟକ୍ରମ ରହିଛି। କରୋନା ଭାଇରସ ମହାମାରୀ କାରଣରୁ ଏହି ଟୁର୍ନାମେଣ୍ଟ ଆୟୋଜନ ନେଇ ଅନିଶ୍ଚିତତା ସୃଷ୍ଟି ହୋଇଛି। ଯଦିଓ ଅଷ୍ଟ୍ରେଲିଆ କଡ଼ା ନିୟମରେ କେତୋଟି କ୍ରୀଡ଼ା ଇଭେଣ୍ଟ ଆୟୋଜନ ହେବାକୁ ଯାଉଛି। ଆଇପିଏଲ ମଧ୍ୟ ଏହି ଭାଇରସ୍ କାରଣରୁ ଅନିର୍ଦ୍ଦିଷ୍ଟ କାଳ ପାଇଁ ଘୁଞ୍ଚିଯାଇଛି। ଯଦି ଆଇପିଏଲ ଆୟୋଜନ ହୁଏ ତେବେ ଖେଳାଳିମାନେ ନିଜ ଦାୟିତ୍ୱରେ ଯାତ୍ରା କରିବେ ଓ ଏଥିପାଇଁ ସମ୍ପୃକ୍ତ ଖେଳାଳିଙ୍କ ଜାତୀୟ କ୍ରିକେଟ ବୋର୍ଡର କୌଣସି ଭୂମିକା ରହିବ ନାହିଁ।
ଟି୨୦ ବିଶ୍ୱକପ୍ରେ ୧୫ଟି ଦଳ ଭାଗ ନେବାର କାର୍ଯ୍ୟକ୍ରମ ରହିଛି ଓ ୭ଟି ଭେନ୍ୟୁରେ ୪୫ଟି ମ୍ୟାଚ୍ ଖେଳାଯିବାର କାର୍ଯ୍ୟକ୍ରମ ରହିଛି। ଏବେକାର ପରିସ୍ଥିତିରେ ଜାତୀୟ ତଥା ଅନ୍ତର୍ଜାତୀୟ ଯାତ୍ରା ବହୁତ କଷ୍ଟକର ହେବ ବୋଲି ଟେଲର ଚ୍ୟାନେଲ ନାଇନ୍ ସ୍ପୋଟର୍ସକୁ ସାକ୍ଷାତକାର ଦେଇ କହିଛନ୍ତି। ପୁଣି ଟୁର୍ନାମେଣ୍ଟ ପୂର୍ବରୁ ୧୪ ଦିନର ଆସୋସିଏଶନ ପରିସ୍ଥିତିକୁ ଆହୁରି ଅଡୁଆ କରିବ। ତେଣୁ ଏଭଳି ପରିସ୍ଥିତିରେ ଅନ୍ତର୍ଜାତୀୟ କ୍ରିକେଟ କାଉନସିଲ (ଆଇସିସି) ଏହି ବିଶ୍ୱକପ୍କୁ ଘୁଞ୍ଚାଇବାର ଯଥେଷ୍ଟ ସମ୍ଭାବନା ରହିଛି। ଏହା ହେଲେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ପାଇଁ ଆଇପିଏଲ୍ ଆୟୋଜନ କରିବାକୁ ବାଟ ଖୋଲିବ ବୋଲି ସେ କହିଛନ୍ତି। ଆଗକୁ ଭାରତ ଓ ଘରୋଇ ଅଷ୍ଟ୍ରେଲିଆ ମଧ୍ୟରେ ଟେଷ୍ଟ ସିରିଜ ଆୟୋଜନ ହେବାର କାର୍ଯ୍ୟକ୍ରମ ରହିଛି। ତେଣୁ କ୍ରିକେଟ ଅଷ୍ଟ୍ରେଲିଆ ଓ ବିସିସିଆଇ ମଧ୍ୟରେ ବୁଝାମଣା ହେବାର ସୁଯୋଗ ସୃଷ୍ଟି ହୋଇଛି। ଭାରତ ଅଷ୍ଟ୍ରେଲିଆ ଗସ୍ତ କରୁ ବୋଲି ଅଷ୍ଟ୍ରେଲିଆ ଚାହୁଁଛି। ତେଣୁ ବିଶ୍ୱକପ୍ ଅପେକ୍ଷା ଆଇପିଏଲ୍କୁ ଅଧିକ ସମର୍ଥନ କରାଯାଉଛି ବୋଲି ସେ କହିଛନ୍ତି। ଉଲ୍ଲେଖଥାଉ କି, ଭାରତୀୟ କ୍ରିକେଟ ଦଳ ଏକ ପୂର୍ଣ୍ଣ ସିରିଜ ଖେଳିବାକୁ ୨୦୨୦ ଅକ୍ଟୋବରରୁ ୨୦୨୧ ଜାନୁୟାରୀ ମଧ୍ୟରେ ଅଷ୍ଟ୍ରେଲିଆ ଗସ୍ତ କରିବାର କାର୍ଯ୍ୟକ୍ରମ ରହିଛି। ଭାରତ ୪ଟି ଟେଷ୍ଟ ଖେଳିବ ଓ ଏହା ବିଶ୍ୱ ଟେଷ୍ଟ ଚାମ୍ପିୟନଶିପ୍ର ଅଂଶବିଶେଷ ରହିବ। ଏହାପରେ ଭାରତ ୩ଟି ଲେଖାଏ ଦିନିକିଆ ଓ ଟି୨୦ ସିରିଜ ମଧ୍ୟ ଖେଳିବାର କାର୍ଯ୍ୟକ୍ରମ ରହିଛି।
