ଟିକସ ହ୍ରାସ ନେଇ ପରାମର୍ଶ ଲୋଡିଲା ଅର୍ଥମନ୍ତ୍ରଣାଳୟ
8:54 amNovember 14, 2019 / 21

ନୂଆଦିଲ୍ଲୀ,୧୪-୧୧: ଉଭୟ ପ୍ରତ୍ୟକ୍ଷ ଓ ପରୋକ୍ଷ ଟିକସ କ୍ଷେତ୍ରରେ ବିଭିନ୍ନ ପରିବର୍ତ୍ତନ ଆଣିବା ଲାଗି ସରକାର ଯୋଜନା ରଖିଛନ୍ତି। ଆଗାମୀ ବଜେଟରେ ଏଥି ସଂକ୍ରାନ୍ତ ଘୋଷଣା ହେବ ବୋଲି ଶୁଣାଯାଉଛି। ଏପଟେ ଟିକସ ହ୍ରାସ ପଦକ୍ଷେପ ଲାଗି ଅର୍ଥ ମନ୍ତ୍ରଣାଳୟ ପକ୍ଷରୁ ପ୍ରଥମଥର ଲାଗି ଦେଶର ଶିଳ୍ପ ଜଗତ ଏବଂ ବାଣିଜି୍ୟକ ପ୍ରତିଷ୍ଠାନଗୁଡିକର ମତାମତ ଲୋଡାଯାଇଛି। ଦେଶରେ ଅର୍ଥନୈତିକ କାର୍ଯ୍ୟକଳାପ ହ୍ରାସ ହେବା ଯୋଗୁ ମାନ୍ଦାବସ୍ଥା ସ୍ଥିତି ଲାଗି ରହିଛି। ଅର୍ଥ ବ୍ୟବସ୍ଥାକୁ ନୂଆ ଗତି ପ୍ରଦାନ କରିବା ଲାଗି ଅର୍ଥମନ୍ତ୍ରୀ ନିର୍ମଳା ସୀତାରାମନ ଅତିରିକ୍ତ ଘୋଷଣା କରିବା ନେଇ ଯୋଜନା ରଖାଯାଇଛି। ଆସନ୍ତା ଫେବୃୟାରୀ ପହିଲାରେ ଆସିବାକୁ ଥିବା ବଜେଟରେ ଏ ନେଇ ଘୋଷଣାମାନ ହେବ। ଅର୍ଥମନ୍ତ୍ରଣାଳୟର ରାଜସ୍ବ ବିଭାଗ ପକ୍ଷରୁ ଅଂଶୀଦାରଙ୍କ ଲାଗି ଏକ ସର୍କୁଲାର ଜାରି କରାଯିବା ସହ ଏନେଇ ବିଭିନ୍ନ ପ୍ରସ୍ତାବ ଉପରେ କର୍ପୋରେଟ ଏବଂ ବ୍ୟକ୍ତିବିଶେଷଙ୍କ ମତାମତ ଲୋଡାଯାଇଛି। ଉଭୟ ପ୍ରତ୍ୟକ୍ଷ ତଥା ପରୋକ୍ଷ ଟିକସ କ୍ଷେତ୍ରରେ ଟିକସ ପରିସରକୁ ବଢାଇବା ଲାଗି ପଦକ୍ଷେପ ନିଆଯାଉଛି। ଏଥି ଲାଗି ଟିକସ ବ୍ୟବସ୍ଥାର ସଂରଚନା ସରକାର କରିବେ ବୋଲି ଜଣାପଡିଛି।