ନୂଆଦିଲ୍ଲୀ,୮-୧: ଟାଟାସନ୍ସ ଏବଂ ସାଇରସ ମିସ୍ତ୍ରି ମାମଲାର ଶୁଣାଣି ସୁପ୍ରିମକୋର୍ଟରେ ଶୁକ୍ରବାର ହେବ। ନ୍ୟାଶନାଲ କମ୍ପାନୀ ଲ ଆପିଲେଟ୍ ଟ୍ରିବ୍ୟୁନାଲ(ଏନ୍ସିଏଲ୍ଏଟି) ଟାଟା ଗ୍ରୁପର ପୂର୍ବତନ ଅଧ୍ୟକ୍ଷ ସାଇରସ ମିସ୍ତ୍ରିଙ୍କ ସପକ୍ଷରେ ଦେଇଥିବା ରାୟକୁ ଚ୍ୟାଲେଞ୍ଜ କରି ଟାଟା-ଗ୍ରୁପ ସୁପ୍ରିମକୋର୍ଟର ଦ୍ୱାରସ୍ଥ ହୋଇଥିଲା। ଏହି ମାମଲାରେ ଏନ୍ସିଏଲ୍ଏଟି ମିସ୍ତ୍ରିଙ୍କୁ ଟାଟା ସନ୍ସ ଅଧ୍ୟକ୍ଷ ପଦବୀରୁ ବିଦା କରିବା ବେଆଇନ ବୋଲି ରାୟରେ କହିଥିଲେ। ଏହାବାଦ ଟାଟାସନ୍ସକୁ ଏକ ପ୍ରାଇଭେଟ ଲିମିଟେଡ କମ୍ପାନୀରେ ପରିବର୍ତ୍ତନ ଏବଂ ନୂଆ ଅଧ୍ୟକ୍ଷ ଭାବେ ଏନ୍.ଚନ୍ଦ୍ରଶେକରନଙ୍କୁ ଅବସ୍ଥାପିତ କରାଇବରକୁ ଟ୍ରିବ୍ୟୁନାଲ ବେଆଇନ ଦର୍ଶାଇଥିଲେ। ଗୋଟିଏ ମାସ ମଧ୍ୟରେ ରାୟର ଚ୍ୟାଲେଞ୍ଜ କରିବାକୁ ଟାଟାସନ୍ସକୁ ୧ ମାସ ସମୟ ମିଳିଥିଲା। ସେହିଭଳି ମିସ୍ତ୍ରିଙ୍କୁ ପୁନଃ ଅଧ୍ୟକ୍ଷ ଭାବେ ଅବସ୍ଥାପିତ କରିବାକୁ ଟ୍ରିବ୍ୟୁନାଲ ନିର୍ଦ୍ଦେଶ ଦେଇଥିଲେ। ଏହି ଆଧାରରେ ଟାଟା ଟ୍ରଷ୍ଟ, ରତନ ଟାଟା, ଟିସିଏସ୍ ପ୍ରମୁଖ ସୁପ୍ରିମକୋର୍ଟର ଦ୍ୱାରସ୍ଥ ହୋଇଛନ୍ତି। ଯାହାର ଶୁଣାଣି ଲାଗି ଚଳିତ ସପ୍ତାହ ଶୁକ୍ରବାର ସମୟ ଧାର୍ଯ୍ୟ ହୋଇଛି। ସୁଚନାଯୋଗ୍ୟ, ୨୦୧୬ ଅକ୍ଟୋବରରେ ସାଇରସ ମିସ୍ତ୍ରିଙ୍କୁ ଏକ ବିବାଦୀୟ ସ୍ଥିତିରେ ଟାଟାସନ୍ସର ଅଧ୍ୟକ୍ଷ ପଦବୀରୁ ବିଦା କରାଯାଇଥିଲା। ଏହା ବିରୋଧରେ ମିସ୍ତ୍ରି ପ୍ରଥରେ ନ୍ୟାଶନାଲ କମ୍ପାନୀ ଲ ଟ୍ରିବ୍ୟୁନାଲ(ଏନ୍ସିଏଲ୍ଟି)ଙ୍କ ଦ୍ୱାରସ୍ଥ ହୋଇଥିଲେ। ଏଠାରେ ମାମଲା ଟାଟାସନ୍ସ ସପକ୍ଷରେ ଶୁଣାଣି ହୋଇଥିଲା। ଏହା ପରେ ମିସ୍ତ୍ରି ଏନ୍ସିଏଲ୍ଏଟିର ଦ୍ୱାରସ୍ଥ ହୋଇଥିଲେ, ସେଠାରେ ତାଙ୍କ ସମକ୍ଷରେ ମାମଲା ଯାଇଥିଲା।
