ସଜନାଗଡ଼, ୧୫ା୬(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ଅଞ୍ଚଳର ତିନିକୋଶିଆ ସଂରକ୍ଷିତ ଜଙ୍ଗଲରେ ୪ଦିନ ହେଲା ଝାଡ଼ଖଣ୍ଡ ହାତୀପଲ ଉତ୍ପାତ ଚଳାଇଛନ୍ତି। ଏହି ପଲରେ ୨୮ଟି ହାତୀ ରହିଛନ୍ତି। ଖାଦ୍ୟ ଅଭାବରୁ ହାତୀପଲ ଜନବସତିମୁହଁା ହେଉଥିବା କୁହାଯାଉଛି। ଗୁରୁବାର ସନ୍ଧ୍ୟାରେ ଜଙ୍ଗଲକୁ ଲାଗି ରହିଥିବା ପାଖଗ୍ରାମ ଜାମୁଡ଼ିହା ପଞ୍ଚାୟତର ଗୋଡ଼ିଶୁଳ, ଜଡ଼ିଦା ପଞ୍ଚାୟତର ବାଉଁଶନାଳ ଓ ଜାମୁଡ଼ିହି ସାହିରେ ୬ଗୋଟି ଘରଭାଙ୍ଗିବା ସହ ଗୋଟିଏ ଗୋରକୁ ମଧ୍ୟ କଚାଡ଼ି ମାରିଥିବା ଜଣାପଡ଼ିଛି। ଯୁଗଳ ସିଂ, ଦୟାନିଧି ପ୍ରଧାନ, ଗୁରା ମୁର୍ମୁ, ସାବିତ୍ରୀ ସିଂ, ଗଦାଧର ମହାଳିକ, ନରହରି ଜେନାଙ୍କ ଘର ଭାଙ୍ଗିବା ସହ ଘରେ ଥିବା ଧାନ, ଚାଉଳ ଓ ବାଡ଼ିରେ ପଣସ, କଦଳୀ ଗଛକୁ ନଷ୍ଟ କରିଥିବା ସୂଚନା ମିଳିଛି। ଅନ୍ୟ ପକ୍ଷରେ ହାତୀ ଉପଦ୍ରବ ନେଇ ଅଞ୍ଚଳବାସୀଙ୍କ ମଧ୍ୟରେ ଆତଙ୍କ ଖେଳିଯାଇଛି। ଲକ୍ଷାଧିକ ଟଙ୍କା ଖର୍ଚ୍ଚରେ ସୌରବାଡ଼ ଅଚଳ ହୋଇ ପଡ଼ିଥିବା, ଟ୍ରେଞ୍ଜଗୁଡ଼ିକ ପୋତିଯାଇଥିବାରୁ ହାତୀମାନେ ସହଜରେ ଜଙ୍ଗଲ ପାର୍ଶ୍ୱରେ ଥିବା ଗ୍ରାମଗୁଡ଼ିକୁ ପଶିବାରେ ସଫଳ ହେଉଛନ୍ତି । ଏହାକୁ ନେଇ ବନାଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ତିନିକୋଶିଆ ସଂରକ୍ଷିତ ଜଙ୍ଗଲକୁ ଲାଗି ରହିଥିବା ଗ୍ରାମ ସାତରାଣ୍ଡ, ତେରେଲଡିହି, ଧିରିଗୁଠ, ଭାଲୁକାଶୁଣି, ଆମ୍ବଝର, ଚେକାମରା ଆଦି ଗ୍ରାମରେ ଧନଜୀବନ ନଷ୍ଟ ହେବାର ଆଶଙ୍କା ରହିଛି। ଅଞ୍ଚଳବାସୀ ରାତ୍ରି ଅନିଦ୍ରା ହୋଇ ଗଁା ମୁଣ୍ଡରେ ଅସୁରକ୍ଷିତ ଅବସ୍ଥାରେ ପାଳି କରି ଜଗି ରହୁଛନ୍ତି । ବନ ବିଭାଗ ପକ୍ଷରୁ ରେଞ୍ଜର, ଫରେଷ୍ଟର, ଗାର୍ଡ଼, ସବୁଜ ବାହିନୀ ଜଙ୍ଗଲରେ ହାତୀର ଗତିବିଧିକୁ ଲକ୍ଷ୍ୟ କରି ଜଙ୍ଗଲ ଚାରିପାର୍ଶ୍ୱରେ ରହି ଡାକବାଜି ଯନ୍ତ୍ର ଦ୍ୱାରା ଗ୍ରାମବାସୀଙ୍କୁ ସଚେତନ କରାଉଥିବା ଜଣାପଡ଼ିଛି ।