ତାଳଚେର, ୬ା୭(ନି.ପ୍ର.)- ତାଳଚେର କୃଷି ଜିଲାରେ ଚଳିତବର୍ଷ ୫୮,୩୬୪ ହେକ୍ଟର ଜମିରେ ଖରିଫ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଛି। ହେଲେ ଅନିୟମିତ ବର୍ଷା ଏବେଠାରୁ ଚାଷୀଙ୍କୁ ହତାଶ କଲାଣି। ଆଗାମୀ ଦିନରେ ଭଲ ବର୍ଷା ନ ହେଲେ ଚାଷ କାର୍ଯ୍ୟ ବାଧାପ୍ରାପ୍ତ ହେବାର ଯଥେଷ୍ଟ ସମ୍ଭାବନା ଥିବା କୁହାଯାଉଛି।
ତାଳଚେର, କଣିହାଁ ଓ ପାଲଲହଡା ବ୍ଲକକୁ ନେଇ ତାଳଚେର କୃଷି ଜିଲା ଗଠିତ। ଚଳିତ ବର୍ଷ କୃଷି ଜିଲାରେ ୩୦,୯୨୫ ହେକ୍ଟର ଜମିରେ ଧାନ ଓ ୨୭,୪୩୦ ହେକ୍ଟରରେ ଅଣଧାନ ଫସଲ ଚାଷ କରାଯିବ। ସେଥିରୁ ତାଳଚେର ବ୍ଲକରେ ୭୬୪୫ ହେକ୍ଟର ଜମିରେ ଧାନ ଓ ୪୨୧୫ ହେକ୍ଟରରେ ଅଣଧାନ, କଣିହାଁ ବ୍ଲକରେ ୧୨,୬୧୫ ହେକ୍ଟରରେ ଧାନ ଓ ୧୩,୪୧୯ ହେକ୍ଟରରେ ଅଣଧାନ ଏବଂ ପାଲଲହଡା ବ୍ଲକରେ ୧୦,୬୬୫ ହେକ୍ଟର ଜମିରେ ଧାନ ଓ ୯୭୬୦ ହେକ୍ଟର ଜମିରେ ଅଣଧାନ ଚାଷ ପାଇଁ ସ୍ଥିର କରାଯାଇଛି। ସେହିପରି ୨୦,୬୦୮ ହେକ୍ଟର ଜମିରେ ବୁଣା ଓ ୧୦,୨୭୨ ହେକ୍ଟରରେ ଧାନ ରୁଆ ହେବ। ଅଦ୍ୟାବଧି କୃଷି ଜିଲାରେ ୧୭,୦୩୧ ହେକ୍ଟର ଜମିରେ ଧାନ ବୁଣା ହୋଇଛି। ତାଳଚେର ବ୍ଲକରେ ୫୬୭୧ ହେକ୍ଟର ମଧ୍ୟରୁ ୫୬୨୫, କଣିହାଁରେ ୭୩୨୧ ହେକ୍ଟରରୁ ୭୧୭୬ ଓ ପାଲଲହଡାରେ ୭୬୭୦ରୁ ୪୫୦୦ ହେକ୍ଟର ଜମିରେ ଧାନ ବୁଣା ସରିଛି। ସେହିପରି ତାଳଚେର ବ୍ଲକରେ ୨୯୧୫ ହେକ୍ଟର, କଣିହାଁରେ ୧୦,୨୩୪ ଏବଂ ପାଲଲହଡ଼ା ବ୍ଲକରେ ୭୫୯୭ ହେକ୍ଟରରେ ଅଣଧାନ ଚାଷ କରାଯାଇଛି। ଏଥିସହ କୃଷି ଜିଲାରେ ୧୦,୨୭ ହେକ୍ଟର ଜମିରେ ତଳି ପଡିବାକୁ ଥିଲା। ସେଥିରୁ ଏବେସୁଦ୍ଧା କେବଳ ୪୩୦ ହେକ୍ଟର ଜମିରେ ତଳି ପକାଯାଇଛି। ଆବଶ୍ୟକ ବର୍ଷା ଅଭାବରୁ ଏତେ କମ୍ ଜମିରେ ତଳି ପଡ଼ିଥିବା କୁହାଯାଉଛି। ସାଧାରଣତଃ ଜୁନରେ ୨୨୫.୧ ମିଲିମିଟର ବର୍ଷା ହେବା କଥା। କିନ୍ତୁ ତାଳଚେର ବ୍ଲକରେ ୨୧୯, କଣିହାଁରେ ୧୩୯.୫ ଏବଂ ପାଲଲହଡା ବ୍ଲକରେ ୨୦୨.୧ ମି.ମି. ବର୍ଷା ହୋଇଥିବା ସରକାରୀ ଭାବେ ରେକର୍ଡ କରାଯାଇଛି। ସମଗ୍ର କୃଷି ଜିଲା ପାଇଁ ୩୨୧୧ କୁଇଣ୍ଟାଲ ବିହନ ଆବଶ୍ୟକ ଥିବା ବେଳେ ମିଳିଛି ୧୦୪୮ କୁଇଣ୍ଟାଲ। ସେଥିରୁ ତାଳଚେର ବ୍ଲକକୁ ୧୧୯, କଣିହାଁକୁ ୧୧୯ ଏବଂ ପାଲଲହଡା ବ୍ଲକକୁ ୮୧୦ କୁଇଣ୍ଟାଲ ମିଳିଛି। ଏ ସମ୍ପର୍କରେ ଜିଲା କୃଷି ଅଧିକାରୀ ଲକ୍ଷ୍ମୀନାରାୟଣ ଶତପଥୀ କହିଛନ୍ତି, ଆବଶ୍ୟକ ତୁଳନାରେ କମ୍ ବର୍ଷା ହୋଇଛି। କିନ୍ତୁ ଜୁଲାଇ ଓ ଅଗଷ୍ଟ ମାସର ବର୍ଷା ଚାଷ ପାଇଁ ଅଧିକ ଉପଯୋଗୀ ସାବ୍ୟସ୍ତ ହୋଇଥାଏ। ତେଣୁ ଆଶା କରାଯାଉଛି ଏହି ଦୁଇ ମାସରେ ଭଲ ବର୍ଷା ହେବ। ଅଣଋଣୀ ଚାଷୀମାନେ ଫସଲବୀମା ଯୋଜନା କରିବାକୁ ଜିଲା କୃଷି ଅଧିକାରୀ ପରାମର୍ଶ ଦେଇଛନ୍ତି।
