ଭୁବନେଶ୍ୱର,୫ା୮(ବ୍ୟୁରୋ) : ସୋସିଆଲ ମିଡିଆ ଧରାଇଛି ଅଭିଯୁକ୍ତ। ଜଣେ ବ୍ୟକ୍ତି ନିଜର ଟୁଇଟ୍ରରେ ଅଭିଯୋଗ କରିବା ପରେ ପୋଲିସ କାର୍ଯ୍ୟାନୁଷ୍ଠାନ ନେଇଛି। ଭୁବନେଶ୍ୱର ରେଳ ଷ୍ଟେଶନଠାରେ ଥିବା ପିଙ୍କ୍ ଅଟୋ ଷ୍ଟାଣ୍ଡ ପଛରେ ରବିବାର ଖୁଲମଖୁଲା ଜୁଆ ଖେଳ ହେଉଥିଲା। ଏହାକୁ ଦେଖି ପ୍ରିୟବ୍ରତ ପଣ୍ଡା ନାମକ ଯୁବକ ନିଜ ଟୁଇଟର ଆକାଉଣ୍ଟରେ ଫଟୋସହ ପୋଷ୍ଟ କରିଥିଲେ। ଆଉ ଏହି ଟୁଇଟ୍କୁ କ୍ରାଇମ୍ବ୍ରାଞ୍ଚ ଆଇଜି ଅରୁଣ ବ୍ରେଥା ହସ୍ତଗତ କରିଥିଲେ। ସେ ତୁରନ୍ତ ଏ ବାବଦରେ କାର୍ଯ୍ୟାନୁଷ୍ଠାନ ନେବା ପାଇଁ ଭୁବନେଶ୍ୱର ଡିସିପି ଓ ଜିଆରପି ଅଧିକାରୀଙ୍କୁ ଜଣାଇଥିଲେ। ଏହାପରେ ଡିସିପି ଓ ଜିଆରପି ମିଳିତ ଚଢାଉ କରି ୩ଜଣ ଜୁଆଡିଙ୍କୁ ଗିରଫ କରିଛି। ସେମାନେ ହେଲେ ୟୁନ୍ଟ୍-୩ ମସ୍ଜିଦ୍ କଲୋନୀର ଏସ୍.କେ ସାରାଫତ ଅଲ୍ଲୀ,ଏସ୍.କେ ସେହେଜାଦ ଓ ଏସ୍.କେ ରମଜାନଙ୍କୁ ଜିଆରପି ଗିରଫ କରି କୋର୍ଟ ଚାଲାଣ କରିଛି। ଏ ନେଇ କ୍ରାଇମ୍ବ୍ରାଞ୍ଚ ଆଇଜି ଅରୁଣ ବ୍ରେଥା କହିଛନ୍ତି, ସୋସିଆଲ ମିଡିଆ ବର୍ତ୍ତମାନ ଟିକନିଖି ଖବରର ପ୍ଲାଟ୍ଫର୍ମ ପାଲଟିଛି। ତେଣୁ ଯେଉଁ ଲୋକମାନେ ସୋସିଆଲ ମିଡିଆରେ ମୋ ପାଖକୁ ତାଙ୍କ ସମସ୍ୟା ପଠାନ୍ତି। ତାହାକୁ ଯଥାସମ୍ଭବ ସମାଧାନ କରିବା ପାଇଁ ଉଦ୍ୟମ କରିଥାଏ।
